Pelavöl ska da lazhan dëli deenchi alë Agripa
26
Tadashi se Agripa faa Pelavöl:
«A lega bo pa bo paadji faa fala döguë bo».
Se Pelavöl lanta öma,
se ëli jomesa ja faa fala ja pezha da öguë dëli amea sai:
2 «Ö alë Agripa,
amu sa ku besa dajantu ku amu paadji faa fala ödjai deenchi bo valadji pa amu paadji pezha da öguë amu da jö ineñ shi nna judio ska faa tëjantu ku amu.
3 Pakë amu sëbë gavu fa bo jönsë kutumu nna judio tudu ku jö ineñ shi ineñ ja ma të tavadji dantu ineñ.
Dajantu shi se amu luga bo pa bo tëndë amu ku pashiensa.
4 »Nna judio tudu sëbë vida amu fo ta amu bi sa mashivin,
ku fo jomesadu se amu bi sa dantu tela amu,
ku a shime Jerusalen.
5 *Vlame ineñ tudu ten sëbë fa amu fo jomesadu,
shi ineñ ja ngongo da lazhan gavu,
fa amu bi ja bibe shimafan fariseo,
ku se sa uachi shi ödu mashi dantu këlë no.
6 Se öseshi se a bi juzhga amu dajantu alagada shi sa ku amu da plomesa ineñ shi Nashian fë nna paipai no.
7 Se plomesa shi nna zhenchi deshi ku dösu no ska gada pa ineñ ma ja ska shivi Nashian olatuvëdji djia ku nöchi.
Se sa dajantu alagada sai,
ö pai shialë Agripa,
se nna judio të ja tëjantu ku amu.
8 ¿Ja fë namsëdji ja mazhna jö sai shimafan ja ku a na ja këlëf fa Nashian ja lanta nna nguë mölidu tan bi vidaf?
9 *»Pakë,
tuludöguë amu bi ska këlë fa ta pa amu fë uan sapa kuzhu tëjantu ku namu Djisu Nasaret.
10 Se sa jö shi ku amu fë dantu Jerusalen.
Ku pödë nna jasa jasa padjil se amu mëtë uan sapa nna santu santu pë djili se,
ta a ja chila ineñ vida folo,
se amu ja da aen amu.
11 Se uan sapa vëdji se amu ja jatiga ineñ dantu jadji Nashian nna judio ja fë ineñ afoshi pa ineñ faa fala zhogovea.
Se amu bi sa ku pashian dëneñ ba toja ku amu ja pëtëpë ineñ ba toja palea tela pata patadu.
12 »Se jö sai se bi ska ma amu ba vadji ja palea Damasko ku pödë ku odji nna jasa jasa padjil.
13 Se ola solomedjian,
ö pai shialë,
öshi amu bi ska bai jamangandji se amu bë uan fögö dösë,
ku bi ska dëdë mashi ku solo,
se ku blin dëli se ludjila no amu ku nna nguë ineñ shi ku amu bi ska bai.
14 Se ta no tudu pono da san,
se amu tëndë uan falagochi ku bi ska faa ku amu ku fala tela ebreo:
“Saulo,
Saulo,
¿ja fë bo ska pëtëpë amu?
Sa uan ja ödu ja ma ope bo ja ligui da pian pian”.
15 »Tadashi se amu pongota:
“¿Kë nguë sa bo,
Shiölö?”.
Se Shiölö kundji amu:
“Amu sa Djisu,
nguë shi bo ska pëtëpë.
16 Öseshi lanta,
pa bo ta mdjadu pa bo tëndë amu.
Pakë dajantu jö sai se amu bi së bo ku supichi,
valadji pa amu pë bo shimafan shividölö ku pa bo ten da nguë lazhan gavu jö ineñ shi ku bo bë fo amu ku jö ineñ shi amu tan ske msa bo.
17 Amu ske fë pa bo sa legadu fo tuludöguë pövu bo ku dji nna nguë ineñ shi na sa judiof.
Se sa nna nguë ineñ shi amu ska da bo be öseshi,
18 valadji pa bo bla ineñ öiö,
valadji pa ineñ vla fo dantu jamian kulu kulu ba jamian fögö djidjidu,
ku pa ineñ ten së fo basu pödë Satanas ba dji Nashiolo,
valadji pa amea jonfa amu,
pa ineñ ten ma padadu pekadu dëneñ ku pachi gagavu dantu nna pövu santu”.
19 »Se fë,
ö pai shialë Agripa,
ku amu na fë jasa lizhu ku suian dösë sef.
20 *Shina amu jomesa ja pegua pimëlu da nna nguë ineñ shi ja ta Damasko,
ku nna nguë ineñ shi ja ta Jerusalen,
ku da nna nguë loso loso Judea,
zha se ku nna nguë ineñ shi na sa judiof,
amu pegua da ineñ tudu pa ineñ tan vla ku ope tashi ku pa ineñ tan vla Nashiolo,
ja fë fidu ja dondolo ja msa fa ineñ bai ku ope tashi.
21 Dajantu jö sai se nna judio të amu dantu jadji Nashiolo se ineñ bi ngongo chila amu vida folo.
22 Mandji se Nashian zhuda amu bi toja ödjai,
se amea sai se ontolo se amu sa dëtu,
ja da nguë ngangandji ku nguë kichi kichi tudu lazhan gavu.
Se amu na faa shina jö ineñ shi ku nna pantafala ku Moises bi bi faa ske pasa ief:
23 *fa Kilitu ske padësë se ëli se ske sa pimëlu nguë shi ske lanta fo mölë,
valadji pa ëli pegua nova fögö djidjidu da tuludöguë pövu dëli ku da nna nguë ineñ shi na sa judiof».
Agripa kundji Pelavöl
24 Se ta Pelavöl ba da ponto pezha döguë dëli sai,
se Festo ta uan fala kidëlë ja faa:
—¡Bo ska dana,
Pelavöl!
Shina ja monchi monchi se fë bo ska dana.
25 Mandji se Pelavöl kundji ëli:
—Amu na ska dananf,
pai gövöndölö Festo,
jö ineñ se amu ska faa iai sa vedadji shishizhu.
26 Alë sëbë jö ineñ sai,
se amu tividu faa jö ineñ sai deenchi dëli.
Amu sa suguladu fa ëli ten sëbë jö ineñ sai,
pakë zhugan jö ineñ se na sa ja shiga dantu uan bligadu jöndjiduf.
27 Ö alë Agripa,
¿bo këlë nna pantafala?
Amu sëbë fa bo këlë.
28 Tadashi se Agripa faa Pelavöl:
—Uan fi ja mashi se bo ske fë pa amu vla fë kitan.
29 Se Pelavöl faa:
—Nashian ja ngongo pa sa uan fi kuzhu ö pa sa monchi,
pa na sa bo mosof,
shina a shime nna nguë ineñ shi ska tëndë fala amu ödjai ku tudu sa shimafan amu,
shin guian ineñ sai.
30 Ta ëli faa jö ineñ sai,
se alë lanta,
a shime gövöndölö,
ku Berenise ku nna nguë ineñ shi bi tusan ku ineñ,
31 se ta ineñ së bai apachi se ineñ bi ska faa ku ineñ me:
«Masebu se na fë zhugan ja fëiu pa ëli mësë pa chila ëli vida folofa ñi pa ëli sa dantu djilif».
32 Se Agripa faa Festo:
«A bi fo lega masebu sai,
ja pa sa ja ëli se pindji pa ëli ba bë Sesarf».