Pelavöl ska faa ku Felis
24
Ta pasa shinku djia,
se jasa jasa padjil Ananias dësë ba palea Sesarea ku zhugan nna jasa jasa pövu ku uan nguë djustishi ku a ja sama Tertulo,
valadji pa ëli ba deenchi gövöndölö ba faa jö ineñ shi a fala tëjantu ku Pelavöl.
2-3 Se ta a ma ëli bi,
se Tertulo jomesa ja faa ëli kuzhu deenchi Felis,
ja faa:
«Ö gövöndölö Felis,
basu bo se no djogo padji ngandji,
se uan sapa ja ska bai gavu dantu pövu,
dajantu amea shi bo ska ma ja bai.
Se jamian tudu ku ola tudu se no ja jönsë jö sai ku dezhupaga monchi.
Hechos 24.1-27
4 Mandji pa no na fonta bo tempu löngö,
no pindji bo pa bo tëndë uan fi kuzhu amea gavu shi a jönsë ku bo.
5 Pakë no bë fa masebu se sa uan djisgalasa ku jamian tudu ëli ja bai ja fë pa të pedji dantu nna judio.
Se ëli se sa jasa uachi nna nasareno.
6 Se ëli bi ngongo zhogovea jadji Nashiolo,
dajantu shi se no të ëli,
se no bi ngongo juzhga ëli dantu alë no.
7 Mandji se Lisias,
feshali nna sodadji roma,
chila ëli fo öma no ku uan foshi ödu.*+
8 Tuludöguë bo,
ta bo ja golo ëli,
bo ske paadji jönsë vedadji jö ineñ shi no të tëjantu ku ëli».
9 Se nna judio tudu faa jö shime,
ja faa jö ineñ sai tudu sa vedadji.
10 Se ta gövöndölö fë Pelavöl shinali pa ëli faa fala.
Se Pelavöl faa:
«Amu sëbë fa sa tempu löngö zha ku bo sa jues liba tela sai,
se fë ku vintadji gavu se amu ske faa fala döguë amu.
11 Amea shi bo ja fo bë,
na sa fë uan deshi djia ku dösu ku amu subili ba Jerusalen ba adola Nashianf.
12 Se nna nguë ineñ se ma amu bi deenchi bo iai,
na bë amu ja të djisputa ku zhugan nguë dantu jadji Nashiolof,
ñi se amu lanta pövu dantu jadji Nashian nna judiofa ñi zhugan jamian dantu paleaf.
13 Ñi ineñ na paadji puva zhugan jö ineñ se ku ineñ faa tëjantu ku amu öseshif.
14 »Mandji se,
jö sai se amu ja jonfesa:
fa amu ja adola Nashian nna paipai no ja lë Jamangandji shi ku ineñ ja sama uachi,
mandji se amu ja këlë jö ineñ shi a ja shina dantu alë tudu se amu ja këlë jö ineñ shi sa skividu dantu nna pantafala.
15 Se amu pë alagada ku Nashiolo,
ku ten sa ku nna napai ineñ sai,
fa nna nguë mölidu tudu tan ske lanta bi vida fo nna nguë dëtu ku nna nguë fëfëiu tudu.
16 Dajantu shi se fë olatuvëdji amu ja ngongo sa ku kusan limpi deenchi Nashiolo ku deenchi nna napai.
17 *»Mandji se pasa tempu löngö ku amu lega tela amu,
se öseshi se amu tan bi Jerusalen valadji pa amu ma djimolo bi tela amu ku pa amu ten ma ja bi.
18 Se sa jö shi amu bi ska fë,
ku zhugan nna judio Asia dajonta ku amu ja limpa öguë dantu jadji Nashiolo.
Zhugan möi pöjödölö na bi ska bai ku amufa,
ñi amu na bi sa dantu zhugan djiskatudjiaf.
19 Nna nguë ineñ shi bë amu bi sa zhugan nna judio loso loso Asia,
se ineñ se bi ta pa sa iai deenchi bo valadji pa ineñ faa jö ineñ shi ineñ të ku amu,
shi ja sa fa ineñ të zhugan ja tëjantu ku amu.
20 Ö pa nna nguë ineñ se me faa i shi ineñ bë zhugan ja fëiu ku amu fë,
ta amu ba deenchi Zhunta shi Ngandji,
21 *shi na ja sa jö shi moso ku amu faa ku fala atu deenchi dëneñf:
“¡Dajantu lanta nna nguë mölidu bi vida se a ska juzhga amu ödjai deenchi namsëdji!”».
22 Tadashi se Felis,
ku bi sëbë gavu jö ineñ shi tëjantu ku dji Jamangandji sai,
se ëli pota zhunta,
ja faa:
«Ta feshali Lisias ja bi,
se amu ske jönsë lazhan namsëdji jaba».
23 Se ëli manda feshali sodadji roma pa ludja Pelavöl,
mandji pa ëli sa legadu ku pa lega pa nna jamada dëli ja fë lazhan dëli.
24 Ta pasa zhugan djia se Felis bi ku miela dëli Drusila,
ku bi sa judio.
Se ëli manda sama Pelavöl se ëli tëndë dëli faa ja tëjantu ku jonfa Kilitu Djisu.
25 Mandji se ta Pelavöl faa ineñ ja tëjantu ku djustishi,
ku domina tuludöguë dishamentu ku juisio shi ske bi,
se mendu ma Felis se ëli faa:
«¡Ödjai da dagoli zha!
Bo paadji bai.
Ta ske da tempu amu tan ske sama bo».
26 Felis ten bi ska gada pa Pelavöl da ëli djiëlu valadji pa ëli sota ëli,
dajantu shi se ëli bi ska sama ëli uan sapa ope pa ëli da lazhan ku ëli.
27 Mandji se ta pasa dösu anu se Felis chama sa gövöndölö se Porsio Festo ma jamian dëli.
Mandji se Felis bi ngongo sa gavu ku nna judio,
se fë ëli lega Pelavöl pë djili.