22
Se Pelavöl faa ineñ:
«Nna pai ku nna namain,
namsëdji tëndë öseshi jö shi amu ska faa tëjantu ku amu».
2 Ta ineñ tëndë fa Pelavöl ska faa ineñ ku fala ebreo,
se ineñ da filili.
Se Pelavöl tan faa ineñ:
3 *«Amu sa judio,
se a pali amu Tarso dji Silisia,
mandji se a kia amu dantu palea sai,
se amu shina kuzhu basu meeth Gamaliel,
ku shina ja dëli sa amea shi pa no lë alë nna paipai no,
se amu ku dishamentu ngandji da Nashiolo shimafan ta zhugan namsëdji sa ödjai djia.
4 *Amu bi ska pëtëpë nna nguë Jamangandji sai ba toja mölë,
se amu bi ska të ineñ ja mëtë ineñ pë djili,
naamain ku napai,
5 se amea sai se nna jasa jasa padjil ten paadji da lazhan gavu da amu ku nna nguë Zhunta nna jasa jasa pövu tudu.
Ba toja ku amu të fo pachi dëneñ jaata pa të nna namain no judio ineñ shi ja ta Damasko,
se amu bi ba ala valadji pa amu ba ma ineñ ba djili Jerusalen valadji pa jatiga ineñ.
6 »Mandji se öshi amu ska bai ja da lome palea Damasko,
ola solomedjian,
se öshi öshi se uan fögö dösë ngandji ku ja chila blin se ludja amu pë metadji.
7 Se amu pono da san se amu tëndë uan falagochi ku bi ska faa amu:
“Saulo,
Saulo,
¿ja fë bo ska pëtëpë amu?”.
8 »Se amu pongota:
“¿Kë nguë sa bo,
Shiölö?”.
»Se ëli kundji amu:
“Amu se sa Djisu Nasaret,
nguë shi bo ska pëtëpë”.
9 Se nna nguë ineñ shi bi ska be ku amu ten bë fögö sai,
mandji se ineñ na tëndë falagochi shi bi ska faa ku amuf.
10 »Se amu pongota ëli:
“¿Kë ja ta pa amu fë,
Shiölö?”.
Se Shiölö faa amu:
“Lanta ku pa bo lantela Damasko.
Ala se ske da bo lazhan jö shi ta pa bo fë tudu”.
11 »Se nna jamada amu fala amu öma ba toja Damasko pakë chila blin fögö djidjidu shiki bi lega amu sebu.
12 Tadashi se bi uan nguë ku a ja sama ëli Ananias,
uan masebu gavu ku bi ja lë alë Moises,
se nna judio ineñ shi ja ta ala tudu bi ska da lazhan gavu dëli.
13 Se ëli bi lome amu se ëli faa amu:
“Namain amu Saulo,
¡tan të vita!”.
Se ola shime se amu tan të vita,
se amu paadji bë ëli.
14 »Zha se ëli faa:
“Nashian shi sa dji nna paipai no ma bo valadji pa bo jönsë vintadji dëli,
ku pa bo ten bë nguë shi Dëtu,
ku pa bo tëndë fala böjö dëli.
15 Pakë bo se ske da pöjödölö tudu lazhan gavu da jö ineñ se bo bë ku bo tëndë iai.
16 Se öseshi,
¿ja bo ska gada?
Lanta,
pa bo bachizha pa bo laba pekadu bo tudu,
ja sama namu dëli”.
17 »Se ta amu tan bi Jerusalen,
se amu ba jadji Nashiolo ba lezha,
se amu të uan suian.
18 Amu bë Shiölö se ëli faa amu:
“Dandjian,
së fo Jerusalen öseshi öseshi,
pakë ineñ na ske ma lazhan gavu ineñ shi bo ska faa tëjantu amu ief”.
19 »Se amu faa:
“Shiöla,
ineñ tudu sëbë fa amu bi ja bai ja nda unian unian jadji Nashian nna judio ja të ineñ ba djili ku ja da nna nguë ineñ shi ja këlë bo iai ku valasöchi,
20 *se djia shi a bi ska jölë sangui Taban nguë shi ja da lazhan gavu bo iai,
amu bi sa ala plesteñi,
ja faa aen ku mölë dëli,
ja ludja panu nna nguë ineñ shi bi ska chila ëli vida folo”.
21 »Mandji se Shiölö faa amu:
“¡Bai,
pakë amu ske manda bo ba jamian löndji,
ba nna nguë ineñ shi na sa judiof!”».
22 Se möi pöjödölö bi ska tëndë Pelavöl ba toja öshi ëli faa fala ineñ sai.
Tadashi se ineñ lanta fala ba van se ineñ ta kidëlë:
«¡Chila masebu sai fo mundu sai!
¡Pakë ëli na mësë pa ëli sa vivuf!».
23 Se öshi ineñ ontolo ska ta kidëlë,
ja zhuga bitidu dëneñ ta ku ja zhuga opo ba van.
Pelavöl sa öma feshali roma
24 Se feshali da odji pa tan ma Pelavöl ba libadoto,
se ëli manda golo ëli ja da ëli ku valasöchi valadji pa sëbë ja fë zha ku pövu tudu ska ta kidëlë tëjantu dëli.
25 Mandji se ta a mala ëli ku guian pa da ëli ku valasöchi,
se Pelavöl faa feshali sodadji roma shi bi sa ala iai:
—¿Ja sa legadu dantu alë pa namsëdji ja da uan nguë roma ku valasöchi anta a juzhga ëli?
26 Ta feshali tëndë jö sai,
se ëli bai se ëli ba da jasa nna sodadji lazhan,
ja faa ëli:
«¿Kë ja bo ske fë?
Pakë masebu se sa uan nguë roma».
27 Se jasa nna sodadji iaba lome Pelavöl,
se ëli faa ëli:
—Da amu lazhan,
¿bo sa uan nguë roma?
Se ëli faa:
—Shiën,
amu sa.
28 Se feshali faa ëli:
—Amu ku uan sapa djiëlu se amu ma da pagu amu sa nguë roma.
Tadashi se Pelavöl faa ëli:
—Mandji se amu sa fo djia shi a pali amu.
29 Ta fë shi,
se nna nguë ineñ shi bi ska golo ja da Pelavöl ku valasöchi iai öshi öshi se ineñ safa fo ëli.
Ku ba toja tuludöguë jasa nna sodadji,
ta ineñ ba sëbë fa ëli sa uan nguë roma,
se mendu ma ineñ dajantu ku ineñ mala ëli.
Pelavöl sa deenchi Zhunta shi Ngandji nna judio
30 Ta da amaian shi,
se feshali,
ku bi ngongo sëbë vedadji jö shi fë ku nna judio bi ska të pedji ku Pelavöl,
se ëli manda pa chila guian fo ëli,
se ëli da odji pa zhunta nna jasa jasa padjil ku nna nguë Zhunta shi Ngandji.
Zha se ëli ma Pelavöl se ëli pë ëli deenchi dëneñ.
Hechos 22.30–23.10