Vadji Pelavöl ba Jerusalen
21
Se ta no lega ineñ pë,
se no ma uan navian se no vla dëtu ba Kos,
se ta da amaian shi,
se no ba da Rodas,
se fo ala se no ten ba da Patara.
2 Se ta no dajonta ku uan navian ku bi ska Fenisia,
se no subili se no bai.
Hechos 21.1-14
3 Se ta no bë Chipre,
se no pasa benda skedji,
se no ten bai ku jasa Siria,
se no ba da Tiro,
ala se navian bi ta pa chila jalga.
4 Se ala se no dajonta ku nna balë,
se no mdja ku ineñ ala seta djia.
Se ineñ bi ska faa Pelavöl,
amea Spitu Santu pa ëli na subili ba Jerusalenf.
5 Mandji,
se ta pasa djia ineñ sai,
se no së fo ala se no tan vla vadji no.
Se nna balë tudu,
ku a shime nna main ku nna mina,
lë no ba toja öluia palea,
se ala se no dajözhöiö lalea se no lezha.
6 Zha se no lega ineñ se no subili ba navian,
se ineñ tan vla jadji dëneñ.
7 Se no be deenchi ku vadji no ku navian fo Tiro ba toja Tolemaida,
se no da nna namain dala manten,
se no ten mdja uan djia ku ineñ.
8 *Ta da amaian shi,
se no së se no ba da palea Sesarea.
Se no ba jadji Filipa,
pantafala,
ku bi sa uan namasebu seta ineñ sai,
9 ëli bi sa ku nna mina naamain vidjin jatulu ku ten bi ska pantafala.
10 *Se no bi sa ala uan sapa djia,
se dësë fo Judea uan pantafala ku a ja sama ëli Agabo.
11 Se ëli bi ua no se,
ëli ma boto Pelavöl,
se ëli mala ope dëli ku öma,
se ëli faa:
«Jö sai se Spitu Santu fala:
“Amea sai se nna judio ineñ shi ja ta Jerusalen,
ske mala shiölö boto sai,
se ineñ ske ma ëli ba da nna nguë ineñ shi na sa judiof”».
12 Ta a tëndë jö sai,
se no ku nna nguë jamian sai pindji Pelavöl pa ëli na subili ba Jerusalenf.
13 Mandji se Pelavöl kundji no:
«¿Kë ja fë namsëdji ska sula ku ja kabela amu kusan?
Pakë amu sa plesteñi,
na sa pa mala amu mosofa,
shina a shime pa amu ten ba Jerusalen ba mölë dajantu namu Shiölö Djisu».
14 Se ta no na paadji panta ëlif,
se no lega ëli,
ja faa:
«Pa fë vintadji Shiölö».
15 Ta pasa djia ineñ sai,
se no fë vadu se no subili ba Jerusalen.
Hechos 21.15-26
16 Se zhugan nna balë Sesarea ten lë no bai se no ba jadji Mnason,
jamian shi no bi ske sa.
Ëli bi sa nguë Chipre,
uan nna pimëlu pimëlu balë.
Pelavöl ba bë Sanchagu
17 Ta no ba da Jerusalen,
se nna namain ma no ku liguilia ngandji.
18 Ta da amaian shi se Pelavöl ku no ba ua Sanchagu,
se nna jasa jasa guëzha tudu bi sa ala zhuntadu.
19 Se ta a da ineñ manten jaba,
se Pelavöl da ineñ lazhan amea jö ineñ shi Nashian bi fë dantu nna nguë ineñ shi na sa judiof amea sulvisu dëli.
20 Se ta ineñ tëndë,
se ineñ da Nashian gloria,
zha se ineñ faa Pelavöl:
«Bo bë,
namain,
jantu milidji nna judio ku ba këlë,
se ineñ tudu ontolo ja të dishamentu ngandji ku alë Moises.
21 Mandji se ineñ tudu tëndë fa bo ska shina nguë pa nna judio ineñ shi tudu ja ta ku nna nguë ku na sa judiof tudu safa fo alë Moises.
Se bo ja faa ineñ pa ineñ na kuta nna mina dëneñ napai dëneñf,
ñi pa ineñ na bibe amea kutumu nof.
22 ¿Kë ja no ske fë?
Pakë pövu tudu ske zhunta pakë ineñ tëndë fa bo sa iai.
23 »Ske sa gavu pa bo lë shizhu no:
Dantu no sa ku napai jatulu ku ta pa ineñ kumpli uan bechi.
24 Ma ineñ be ku bo,
ma pachi kutumu limpa öguë dëneñ pa bo da pagu jö ineñ ta bo ja lapa ineñ jasa.
Se amea sai se nguë tudu ske sëbë fa zhugan lazhan ineñ sai tëjantu bo iai na sa vedadjif,
shina bo ten ja bibe ja gada alë.
25 *»Mandji se tëjantu ku nna nguë ineñ shi na sa judiof ku ten ja këlë,
no skëvë uan jaata da ineñ ku jö ineñ shi no mazhna pa ineñ na ja gada zhugan jö ineñ sef.
Moso pa ineñ ja chama kumu ja ku a ma fë saklifisu da nna nashian baluf,
pa ineñ na tan ja kumu sanguifa ñi limaia ku iai gochif ku pa ineñ na ja fë ja nda ölöluiaf».
A të Pelavöl ba djili
26 Tadashi se Pelavöl ma nna masebu ineñ sai,
se ta da amaian shi se ëli ku ineñ tudu limpa öguë dëneñ,
zha se ëli lantela jadji Nashiolo,
valadji pa ëli ba da lazhan djia shi a ske jaba ku limpa öguë ku se ineñ tudu ske ta ma ja dëneñ bai.
27 Mandji se ta bi ske kumpli seta djia ineñ sai,
se zhugan nna judio loso loso Asia bë Pelavöl dantu jadji Nashiolo,
se ineñ lanta uan pedji ngandji dantu möi pöjödölö se ineñ ta öma ba ëli,
Hechos 21.27–22.29
28 ja ta kidëlë:
«¡Nna masebu Israel,
namsëdji zhuda no!
Nguë sai se sa masebu shi ja nda jamian tudu ja shina nguë tudu ja tëjantu pövu no,
ku alë Moises ku jamian sai.
Se vlame,
ba toja ku ëli ma zhugan nna griego bi dantu jadji Nashiolo,
ja zhogovea jamian santu sai».
29 *Pakë a bi bë ëli dantu palea ku Trofimo nguë shi sa nguë efeso,
se ineñ mazhna fa Pelavöl bi ma ëli ba dantu jadji Nashiolo.
30 Se lanta uan pedji dantu palea,
se nguë tudu ku jölë,
se a fala Pelavöl se a chila ëli fo dantu jadji Nashiolo ja sea ëli san ba öluia,
se öshi öshi se a sua poto poto.
31 Se ineñ bi ske chila ëli vida folo,
ta a da feshali shi ngandji nna sodadji roma lazhan fa palea Jerusalen tudu sa ku tavadji.
32 Tadashi se ëli se ma zhugan nna feshali ku nna sodadji se ineñ dësë ku jölë ba jamian nna möi pöjödölö.
Se ta ineñ ba bë feshali ku nna sodadji dëli,
se ineñ chama da Pelavöl ku kuzhu.
33 Tadashi se feshali manda pa të Pelavöl pa mala ëli ku guian dösu.
Zha se ëli pongota ëli kë nguë sa ëli se kë ja ëli fë.
34 Mandji se dantu möi pöjödölö ineñ sai,
se zhugan ineñ bi ska ta kidëlë da uan kuzhu se utu nguë da utu kuzhu.
Se ta feshali na bi paadji jua vedadji pedji sef,
se ëli da odji pa ma ëli ba libadoto.
35 Ta a ba da libadoto se nna sodadji bi ta pa ma ëli pasa van dajantu budu budu möi pöjödölö ineñ sai,
36 pakë pövu bi ska lë ineñ tashi ja ta kidëlë:
«¡Pa ëli mölë!».
Pelavöl ska faa ku pövu
37 Se ta nna sodadji bi ska mëtë ëli ba libadoto,
se Pelavöl pongota feshali:
—¿Amu paadji faa bo uan kuzhu?
Se feshali kundji ëli:
—¿Bo ja faa fala griego?
38 Tadashi,
¿bo na se sa masebu ejipto shi tempu baezha lanta uan pedji ku ma milidji jatulu napai ba dantu uan jamian sölö sölö ua?
39 Se Pelavöl faa ëli:
—Na,
amu sa judio,
nguë tela shi a ja sama Tarso,
ku sa uan palea ngandji Silisia,
mandji se amu pindji bo anta pulusensa,
pa bo lega amu pa amu faa ku pövu.
40 Se ta feshali lega ëli,
se Pelavöl ta mdjadu,
se ëli fë pövu shinali ku öma pa ineñ jaböjö.
Se öshi nguë tudu da filili,
se ëli faa ineñ ku fala tela ebreo.