Pelavöl sa vadji loso loso Masedonia ku tela Gresia
20
Ta djiskatudjia se manja,
se Pelavöl sama nna balë,
se ta ëli da ineñ añimu jaba,
zha se ëli lega ineñ pë se ëli së valadji pa ëli ba loso loso Masedonia.
2 Se ta ëli pasa pasa loso loso ineñ sai,
ja da nna balë añimu uan sapa vëdji,
se jabamentu se ëli ba da Gresia,
Hechos 20.1-12
3 se ëli mdja ala tëishi mëdji.
Se ta ëli ba sëbë fa nna judio bi ska ngongo fë ëli mali ta ëli bi ska ma navian pa ëli ba Siria,
se ëli mazhna pa ëli tan vla Masedonia.
4 Se bi ska be ku ëli Sopater mina Pirro,
ku sa nguë Berea;
Aristarko ku Segundo,
ku sa nna nguë Tesalonika;
Gaio,
nguë Derbe;
ku Timoteo,
Tikiko ku Trofimo,
ku tudu sa nna nguë loso loso Asia.
5 Se ineñ tudu be deenchi se ineñ ba gada no Troas.
6 Mandji se no lantela navian ba Filipos ta a pasa fesa Ampan shin levadura,
ta da shinku djia se no zhunta ku ineñ Troas,
ala se no mdja seta djia.
Pelavöl ba ta öiö Troas
7 Ta da pimëlu djia sumanu se no zhunta pa no pachi ampan.
Se öshi Pelavöl bi ske së ja vadji ta pamasedu ja bla,
se ëli bi ska faa ku nna balë,
dantu uan tempu löngö ba toja mete nöchi.
8 Se van liba jochian shi liba,
jamian shi ineñ bi sa zhuntadu bi sa ku uan sapa lapanta.
9 Se uan namasebu ku a ja sama ëli Eutiko,
ku bi ska tusan lome zhnali se ëli bi sa jansadu,
se ëli jomesa ja djuni öshi Pelavöl bi ska pegua tempu löngö.
Ta ëli vla gogo djuni,
se ëli pono fo van jochian liba fë tëishi da san se a lanta ëli mölidu.
10 Tadashi se Pelavöl dësë,
se tovesa pë liba dëli se ablasa ëli,
se faa:
«Namsëdji na jaba kusanf,
pakë ëli sa vivu».
11 Zha se ëli tan subili ba liba,
se ëli pachi ampan se ëli kumu,
se ëli tan bai ja faa fala tempu löngö ba toja pamasedu,
se amea sai se ëli ten bai.
12 Se a ma namasebu se vivu ba jadji dëneñ,
se ineñ tudu mdja ku besa.
Pelavöl ba vadji fo Troas ba Mileto
13 Se no,
be deenchi ku navian ba toja Ason,
pa no ba ala ba ma Pelavöl,
pakë amea dishamentu dëli,
bi sa pa ëli pasa san tela.
Hechos 20.13-38
14 Ta ëli dajonta ku no Ason,
se no ma ëli bi liba navian se no ba Mitilene.
15 Se fo ala se no tan ma navian amaian shi,
se no ba da deenchi Kio,
ta tan da amaian shi se no jonla poto Samos,
ta da amaian shi se no ba da Mileto.
16 Pelavöl bi mazhna pa ëli na pasa Efesof,
valadji pa ëli na tada loso loso Asiaf,
pakë ëli bi ngongo pa ëli ba batë Jerusalen dandjian anta pa da djia fesa Pentekostes shi ja paadji fë.
Pegua Pelavöl ku nna jasa jasa guëzha Efeso
17 Se fo Mileto,
se Pelavöl manda pa sama nna jasa jasa guëzha Efeso.
18 Ta ineñ bi bë ëli,
se ëli faa ineñ:
«Namsëdji sëbë amea shi amu fë ja dantu tempu se ku amu bi sa ku namsëdji iai,
fo pimëlu djia shi ku amu bi loso loso Asia.
19 Se amu shivi Shiölö amea shipë ku adöiö,
benga zha pa amu bi sa dantu lasu nna judio.
20 Namsëdji tudu sëbë fa amu na bi sa tave pa amu pegua jö ineñ shi sa ja gavu tudu da namsëdjif,
mandji se amu shina namsëdji ja deenchi pövu ku dantu jadji jadji tudu.
21 Ja da nna judio,
ku nna nguë ineñ shi na sa judiof lazhan gavu,
tëjantu ku ta pa tan ja vla ku ope tashi ba Nashiolo ku pa ten këlë Shiölö no Djisukilitu.
22 »Se öseshi pa namsëdji sëbë fa amu ska Jerusalen basu odji Spitu Santu shinke amu sëbë jö ineñ shi ska gada amu ala.
23 Jö shi moso amu sëbë sa fa jamian palea tudu,
Spitu Santu ja da amu lazhan amea shi amu ske pasa djili ku padësë.
24 *Mandji se zhugan jö ineñ sai amu na ja pë jasaf,
ñi na sa ja ngandji dantu vida amuf,
sumanu pa amu paadji jaba tabaia sai ku pa amu ten paadji fë ku liguilia sulvisu shi Shiölö Djisu da amu pa amu fë iai,
amea shi pa paadji da lazhan gavu evanjelio galasa Nashiolo.
25 »Se öseshi,
namsëdji tëndë,
amu sëbë fa zhugan namsëdji ineñ se ku amu ska bai ja pegua tëjantu ku gövöndölö Nashiolo iai,
na tan ske bë jala amu mashif.
26 Dajantu shi,
se ödjai se amu ska da namsëdji lazhan gavu fa amu sa nasenchi sangui namsëdji tudu,
27 pakë amu na jöndë zhugan jaf se amu pegua shizhu Nashian da namsëdji.
28 »Dajantu shi,
se amu faa pa namsëdji ja ska pinchidu tuludöguë namsëdji ku ögö jabala ineñ se Spitu Santu pë namsëdji liba shimafan nna obispu valadji pa namsëdji fë lazhan guëzha Nashiolo,
ku ëli ngana ku tuludöguë sangui dëli.
29 Pakë amu sëbë fa ta amu ske lega namsëdji iai,
dantu namsëdji ske lantela zhugan jösölö djiga fëfëiu ku ske ngongo jaba ku ögö jabala.
30 Se dantu namsëdji me se ske lanta zhugan napai ku ske ja shina nguë ja fanchila valadji pa ineñ ja sea nna balë pa ja lë ineñ.
31 Dajantu shi,
pa namsëdji ja sa vatu,
ja lambela fa fo tëishi anu,
solo ku nöchi,
se amu na chama panta unian unian namsëdji ku adöiöf.
32 »Se öseshi,
nna namain,
amu pindji Nashian da namsëdji ku novu galasa dëli,
nova ku sa ku pödë valadji pa ëli tan fë namsëdji këësë ku pa ëli ten da namsëdji ja gagavu dantu nna nguë ineñ shi sa santu tudu.
33 »Amu na sa leva ñi plata,
ñi oro ñi bitidu zhugan namsëdji zhaf.
34 Namsëdji tudu sëbë gavu fa ku öma ineñ sai se amu ja tabaia da tuludöguë dishamentu amu ku dji nna jamada amu.
35 Se sa jö ineñ shi amu shina namsëdji fa,
ta a ja tabaia ödu amea sai se a ja paadji zhuda nna nguë ineñ shi sa ku dishamentu,
ja lambela fala Shiölö Djisu,
ta ëli faa:
“Besa ja sa gavu ta a ja da mashi ku ta ja ma”».
36 Ta ëli faa jö ineñ sai jaba,
se Pelavöl dajözhöiö ku ineñ tudu se ëli lezha.
37 Tadashi se ineñ tudu bi ja sula ku dödö ja ablasa ëli se ineñ ja da ëli beso.
38 Mandji se jö shi bi fë ineñ modoia mashi sa jö shi ëli bi faa ineñ amea shi ineñ na tan bi ske bë jala dëli mashif.
Zha se ineñ tudu lë ëli ba da navian.