2 Se ëli pongota ineñ:

—¿Namsëdji sa ku Spitu Santu ta namsëdji këlë?

Se ineñ kundji ëli:

—Na,

ñi no na sa tëndë fa të Spitu Santu ie zhaf.

3 Tadashi se ëli faa:

—¿A kë amea shi a bachizha namsëdji?

Se ineñ faa:

—Ku bachizha Zhuan.

4 ^*Se Pelavöl da ineñ lazhan:

—Zhuan bi ska bachizha nguë ku bachizha shi pa tan vla ku ope tashi,

ëli bi ska faa pövu pa këlë nguë shi bi tashi dëli iai,

ku se sa Djisu.

5 Ta ineñ tëndë jö se,

se a bachizha ineñ ku namu Shiölö Djisu.

6 Se ta Pelavöl pë öma liba dëneñ,

se Spitu Santu ten bi liba dëneñ,

se ineñ jomesa ja faa utu fala pata patadu ku ten ja pantafala.

7 Se ineñ tudu bi sa vala uan deshi napai ku dösu.

8 Se Pelavöl lantela dantu jadji Nashian nna judio se ëli faa fala ku valëntë dantu tëishi mëdji.

Ëli bi ska pufia tëjantu ku gövöndölö Nashiolo,

ja jua amea shi pa ineñ fo këlë.

9 Mandji se zhugan ineñ bi naga pa ineñ këlë,

se ineñ bi ska da fëiu da Jamangandji.

Se amea sai se Pelavöl safa fo ineñ se ëli tan fë uan ono apachi ku nna balë,

se djia tudu se ineñ bi ska pufia dantu skuela uan masebu ku a ja sama ëli Tirano.

10 Amea sai se ëli fë ba toja dösu anu,

se sa amea shi se nna judio ku nna griego ineñ shi ku bi ja ta loso loso Asia tudu tëndë nova Shiölö.

11 Se Nashian bi ska fë uan sapa ja ngangandji amea öma Pelavöl,

12 ba toja amea shi ku a ja ma tea panu ku tea bitidu ineñ shi bi da öguë Pelavöl,

se ja kula ineñ fo danchi dëneñ tudu,

se spitu fëfëiu tudu ja së fo ineñ.

13 Mandji se zhugan nna judio ku bi ska chila spitu fëfëiu fo nguë se ineñ bi ska ngongo lezha ku namu Shiölö Djisu liba nna nguë ineñ shi bi sa ku spitu fëfëiu iai,

ja faa:

«Ku namu Djisu,

nguë shi Pelavöl ska ma pegua,

amu da namsëdji odji pa namsëdji së».

14 Jö sai sa ja nna mina seta seta uan masebu ku a ja sama Eseva,

ku bi sa jasa jasa padjil nna judio,

bi ska fë.

15 Mandji se uan djia se spitu fëiu kundji ineñ:

«Amu jönsë Djisu,

se amu ten sëbë kë nguë sa Pelavöl,

mandji namsëdji,

¿kë nguë sa namsëdji?».

16 Se masebu se ku sa ku spitu fëiu vaa ba ineñ se ëli domina ineñ tudu,

ku foshi se da ineñ tudu pajada,

amea shi ku bi ta pa ineñ jölë fo jadji gödödji ku öguë baga bagadu.

17 Se ta nna judio ku nna griego ineñ shi ja ta Efeso,

tëndë jö sai se mendu ma ineñ tudu,

se a ja da namu Shiölö Djisu gloria.

18 Se uan sapa nna nguë ineñ shi tudu këlë iai,

ja bi se ja jonfesa deenchi pövu fidu ja fëfëiu dëneñ.

19 Se uan sapa nna nguë ineñ shi bi ska fë öfia ma lavulu dëneñ bi se a fë uan mampuna se a kama deenchi nguë tudu.

Se ta a ba fë kuenta jö ineñ shi kuta lavulu ineñ sai,

se ba së deshi milidji shinku djiëlu plata.

20 Se amea sai se nova Shiölö bi ska këësë ku ten ja bai ja panta panta ja msa pödë dëli.

21 Ta jö ineñ se tudu shiga jaba,

se Pelavöl mazhna dantu spitu dëli pa ëli ba Jerusalen,

ja pasa loso loso Masedonia ku Akaia.

Se ëli bi ska faa:

«Ta amu ske sa ala,

ske fë fata pa amu ten ba ua Roma».

22 Tadashi se ëli manda nna shividölö dösu dëli,

Timoteo ku Erasto,

ba Masedonia,

se ëli se mdja Asia uan böjö tempu.

23 Dantu tempu sai se bi të uan taba djiskatudjia tëjantu ku Jamangandji.

24 Pakë uan nguë tabaia ku onfelu plata ku a ja sama ëli Demetrio ku bi ja fë mina jadji kichi kichi nashian balu shi a ja sama Artemisa,

se bi ska fë pa nna tabaiadölö bi ja ngana uan sapa djiëlu.

25 Se ëli zhunta ku utu nna tabaiadölö fisu sai,

se ëli faa ineñ:

«Nna jamada,

namsëdji sëbë fa fo fisu sai se no ja chila djiëlu no.

26 Mandji se namsëdji ten sëbë fa masebu se a ja sama ëli Pelavöl iai,

sa jamian tudu ja faa ku uan sapa pövu ku na sa Efeso mosofa shina loso loso Asia tudu.

Ëli ska faa jö ineñ se ku a ska fë ku öma iai na sa nashianf.

27 Se jö sai na sa uan ja ödu mosof,

pa fë pa no pëndë nongosu no fa,

shina pa ten nozho taba jadji main nashian no Artemisa,

ku pa tuludöguë main nashian,

ku nna nguë loso loso Asia ku nna nguë mundu nguintëlu nguintëlu tudu ja adola pa chila pödë dëli fo ëli».

28 Ta ineñ tëndë jö ineñ sai,

se mëtë ineñ pashian,

se ineñ jomesa ja ta kidëlë:

«¡Ilö Artemisa,

nashian nna nguë efeso!».

29 Se lanta uan djiskatudjia ngandji dantu palea.

Se a sea zhugan nguë ba dantu teatro,

se ineñ të Gaio ku Aristarko nna jamada Pelavöl ku bi sa nna nguë loso loso Masedonia.

30 Se Pelavöl bi ngongo lantela pa ëli ba fala ku pövu,

mandji se nna balë na lega ëlif.

31 A shime zhugan nna jasa jasa loso loso Asia,

ku bi sa nna jamada Pelavöl,

se da lazhan ba da ëli ja luga ëli pa ëli na lantela dantu teatrof.

32 Se bi të djiskatudjia dantu zhunta.

Zhugan ineñ bi ska ta kidëlë da uan kuzhu se utu nguë da utu kuzhu,

se nna nguë ineñ shi bi sa monchi mashi na bi sëbë ja fë ineñ sa zhuntadu pë alaf.

33 Se nna judio pizha uan masebu ku a ja sama ëli Alejandro ba deenchi,

se zhugan nguë dantu möi pöjödölö chila ëli valadji pa ëli ma fala.

Tadashi se Alejandro lanta öma ja pindji filili valadji pa ëli paadji pezha deenchi pövu.

34 Mandji ta a ba sëbë fa ëli ten sa judio,

se nguë tudu jomesa ja ta kidëlë ku fala soso amea ola dösu:

«¡Ilö Artemisa,

da nna nguë efeso!».

35 Se ta skëvan zhunta,

da pövu padji se ëli faa:

«Nna nguë efeso,

¿kë nguë sa masebu shi ku na sëbë fa palea nna nguë efeso se sa ludjadölö jadji nashiolo shi ngandji Artemisa ku estatua dëli shi dësë fo ösëf?

36 Se öshi jö ineñ se a na ja paadji nagaf,

fë fata pa namsëdji manja pa namsëdji na fë uan ja fëiu ku jölëf.

37 Pakë namsëdji ma nna napai ineñ se bi iai,

benga pa ineñ na fë zhugan ja pözhölufa ñi ineñ na zhogovea main nashian nof.

38 »Se shi Demetrio ku nna jamada fisu shime ja sa ku uan ja të tave tëjantu ku uan nguë,

dajantu shi se të jadji nguë juzhga nguë ku nna gövöndölö.

Se ala se namsëdji ja ma guela tëjantu uan nguë ku utu nguë ba ala.

39 Se shi ontolo namsëdji ja sa ku utu dishamentu,

gavu pa jözhë pë dantu zhunta shi dëtu.

40 Se ku amea se ja tudu sa iai ku jö ineñ shi dödjai a ja paadji faa no ska fë djiskatudjia.

¿Kë ja no paadji faa da butanja sai,

shi na të zhuganf?».

41 Ta ëli faa jö sai,

se ëli baga zhunta.