3 se ta fë ku ineñ tudu sa ku fisu shime,

ku bi sa fë limada peli,

se ëli mdja ku ineñ pa ineñ zhunta fë tabaia.

4 Se djasubudu tudu se ëli ja pufia dantu jadji Nashian nna judio,

ja ska jua amea shi pa nna judio ku nna griego vla fë balë.

5 Se ta Silas ku Timoteo fo loso loso Masedonia bi,

se Pelavöl ma tempu dëli tudu ja pegua nova gavu,

ja da nna judio lazhan gavu fa Djisu se bi sa Kilitu.

6 Mandji se ta nna judio të butanja ku Pelavöl ku ineñ ja suta ëli,

se ëli sugudji opo fo bitidu dëli shimafan shinali amea shi ineñ naga ëli se ëli faa ineñ:

«Pa sangui namsëdji sa liba tuludöguë jasa namsëdji;

amu sa limpi;

fo öseshi be deenchi amu ska toja nna nguë ineñ shi na sa judiof».

7 Tadashi se Pelavöl së fo jadji Nashian nna judio se ëli ba jadji uan masebu ku a ja sama Tisio Justo,

ku bi ja adola Nashiolo,

ku bi ja ta lome jadji Nashian nna judio.

8 Se Krispo,

ku sa jasa jasa jadji Nashian nna judio,

këlë Shiölö ku nna nguë jadji dëli tudu.

Se a shime uan sapa nna nguë korinto,

ku tëndë nova,

se ten këlë se a bachizha ineñ.

9 Uan nöchi se Shiölö faa Pelavöl dantu uan suian:

«Na menduf,

ja bai ja faa fala ku pa bo na jaböjöf,

10 pakë amu sa ku bo,

se zhugan nguë na ske paadji pë öma dëli liba bo pa fë bo malif,

pakë amu sa ku uan sapa pövu dantu palea sai».

11 Se fë ku Pelavöl mdja ala uan anu ku sëishi mëdji,

ja shina pövu Fa Nashiolo.

12 Mandji se tempu shi Galion bi sa gövöndölö loso Akaia,

se nna judio tudu zhunta se ineñ lanta ja tëjantu ku Pelavöl se ineñ ma ëli ba jadji djustishi.

13 Se ineñ faa ëli:

«Masebu sai ska fë pa nguë tudu adola Nashian uan amea patadu ku jö shi alë ja fala».

14 Se ta Pelavöl bi ske faa fala,

se Galion faa nna judio:

«Shi ja sa uan pedji ö uan ja fëiu ödu,

amu ja fo tëndë namsëdji.

15 Mandji se shi ja sa ja ku ja tëjantu ku faa fala,

ku namu namu ku dji alë namsëdji,

namsëdji ja fo jözhë pë ku namsëdji me,

pakë amu na ngongo sa jues jö ineñ sef».

16 Se fë se ëli manda pa jölë ineñ fo jadji djustishi.

17 Tadashi se ineñ tudu vaa ba liba Sostenes,

ku se bi sa jasa jasa jadji Nashian nna judio,

se ineñ da ëli pajada deenchi jadji djustishi.

Mandji se Galion na sa tave jö sef.

18 Se Pelavöl tan mdja Korinto uan böjö tempu.

Zha se ëli tan lega nna namain dala,

se ëli ku Prisila ku Akila lantela uan navian se ineñ vla Siria.

Se ëli folo jasa dëli öshi ineñ bi sa Senkreas,

da uan bechi ku ëli bi fë.

19 Ta ineñ ba da Efeso,

se Pelavöl lega Prisila ku Akila pë ala se ëli lantela dantu uan jadji Nashian nna judio,

se ëli bi ska pufia ku nna judio.

20 Se ineñ luga ëli pa ëli mdja ala ku ineñ uan tempu mashi,

mandji se ëli na mdjaf,

21 mandji se öshi ëli bi ska lega ineñ se ëli faa ineñ:

«Shi Nashian ja ngongo,

amu tan ske bi bë namsëdji».

Se ëli ma navian ba Efeso.

22 Ta ëli ba da palea Sesarea,

se ëli subili ba da nna nguë guëzha manten,

zha se ëli tan dësë ba Antiokia.

23 Se ta ëli pasa uan tempu löngö ala,

se Pelavöl ba ua uan unian unian guëzha ineñ shi sa Galasia ku dji Frigia,

ja da nna balë tudu añimu.

24 Dantu tempu sai tadashi se bi da Efeso uan judio ku a ja sama ëli Apolos,

nguë tela shi a ja sama Alejandria.

Ëli bi sa uan masebu ku tëndëmentu betu ku ten bi sëbë Fa Nashiolo gavu.

25 A bi shinali ëli jamangandji Shiölö,

ku uan spitu gavu,

se ëli bi ska faa fala ku ten ja shina nguë kuzhu ku uan tëndëmentu suguladu amea Djisu,

benga zha pa ëli bi jönsë bachizhamentu Zhuan moso.

26 Se ëli bi ska faa fala ku valëntë dantu jadji Nashian nna judio,

mandji se ta Prisila ku Akila tëndë ëli,

se ineñ ma ëli ba apachi se ineñ da ëli lazhan amea shi gavu mashi jamangandji Nashiolo.

27 Se ta Apolos bi ngongo ba Akaia,

se nna namain da ëli añimu se ineñ skëvë da nna balë da ala valadji pa ineñ ma ëli.

Ta ëli ba da ala,

se ëli zhuda uan sapa nna nguë ineñ shi ku dajantu galasa ku ten këlë,

28 pakë ëli bi ska të tavadji ku nna judio,

se ëli bi ska msa ineñ dantu Fa Nashiolo amea shi Djisu se bi sa Kilitu.