3 Se ëli bi ska da ineñ lazhan amea shi bi sa gavu pa Kilitu padësë,

pa ëli tan lanta fo dantu nna nguë mölë bebezha.

Ëli bi ska faa ineñ:

«Djisu se amu ska pegua da namsëdji iai se sa Kilitu».

4 Tadashi se zhugan ineñ ten këlë,

se ineñ zhunta ku Pelavöl ku Silas.

A shime uan sapa nna griego ku ten bi ska adola Nashiolo,

ku uan sapa naamain dondolo.

5 Tadashi se nna judio ineñ shi na ska këlëf,

ma pashian se ineñ zhunta ku zhugan nna nguë fëfëiu,

se ineñ lanta taba pedji dantu tela sai,

se ineñ kabela poto jadji Jason ja jua Pelavöl ku Silas valadji pa ineñ juzhga ineñ deenchi pövu.

6 Mandji se ta ineñ na dajonta ku ineñ alaf,

se ineñ sa Jason san ku zhugan utu nna namain ba deenchi nna jasa jasa tela,

ja ta kidëlë:

«Nna napai ineñ shi,

ku ska mbasa nna nguë mundu ntëlelele iai,

se ineñ ten bi iai,

7 se Jason ma ineñ jadji dëli,

ineñ na ska fë jö shi Sesar mandaf,

se ineñ ja faa tan të uan alë ku sa Djisu».

8 Ta nguë tudu tëndë jö sai,

se nna nguë tela ku nna jasa jasa tela tudu mdja ku tavadji.

9 Mandji se ineñ ma Jason ku nna nguë ineñ se tudu uan pagu djiëlu se a lega ineñ tudu.

10 Se öshi öshime ku nöchi ma,

se nna namain da Pelavöl ku Silas ba Berea.

Se ta ineñ ba da ala se ineñ ba dantu jadji Nashian nna judio.

11 Se ineñ bi sa nna nguë gavu mashi ku nna nguë ineñ shi bi sa Tesalonika,

pakë ineñ ma nova sai ku sinchidu gavu se djia tudu se ineñ bi ska golo Fa Nashiolo ja ua shi jö shi a ska pegua da ineñ iai tudu sa vedadji.

12 Se amea sai se uan sapa nna judio këlë,

ku zhugan naamain griego dondolo ku zhugan ponodu napai.

13 Mandji se ta nna judio Tesalonika ba sëbë fa a shime Pelavöl ten ske bi sa Berea ja pegua Fa Nashiolo,

se ineñ ten ba da ala,

valadji pa ineñ ba fë djiskatudjia ja lanta pövu.

14 Mandji se öshi öshime se nna namain da Pelavöl bai ja pasa bodo domali,

mandji se Silas ku Timoteo mdja Berea.

15 Se nna nguë ineñ shi bi ska be ku Pelavöl iai se ma ëli ba toja Atenas.

Zha se ineñ tan vla ku odji pa Silas ku Timoteo ba toja ëli dandjian ta ineñ ja paadji,

se ineñ ten bai.

16 Mandji se ta Pelavöl bi sa Atenas ja gada ineñ,

se bi ska duia ëli spitu amea shi ëli toja palea sai bi sa shia nna nashian balu.

17 Se fë ku ëli bi ska pufia djia tudu dantu jadji Nashian nna judio ku utu nna griego ineñ shi ten ja adola Nashiolo,

se djia tudu se ëli bi ska da lazhan mete dölöluia ku nna nguë ineñ shi ja sa zhunta pë ala.

18 Se zhugan nna nguë tëndëmentu betu ku a ja sama ineñ epikureo ku estoiko ten të djisputa ku ëli,

zhugan ineñ bi ska faa:

«¿Kë ja falaböjö se ska fala?».

Se utu ineñ bi ska faa:

«Tan kë ja ëli sa peguadölö nna nashian pata patadu ineñ shi novu».

Ineñ bi ska faa shi pakë Pelavöl bi ska pegua evanjelio Djisu ku dji tan lanta nguë bi vida.

19 Tadashi se ineñ ma ëli ba uan zhunta jamian shi a ja sama Areopago,

ja faa:

«¿No ja fo sëbë kë i shi sa shina ja novu se bo ska faa iai?

20 Pakë bo ska ma zhugan shizhu patadu bi da no,

se no ngongo sëbë ja sa jö ineñ sai».

21 Se sa fa nna nguë atenas ku nna nguë utu tela patadu ku bi ska ta ala,

ineñ na ja sa tave zhugan jaf shina ku fala ö tëndë uan ja novu.

22 Tadashi se Pelavöl,

ta mdjadu metadji Areopago,

se ëli ma fala:

«Nna masebu atenas,

ku jö ineñ se tudu se amu ska bë fa,

namsëdji sa nna nguë guëzha amea shishizhu.

23 Pakë ta amu ska be ja pia jamian santu santu namsëdji,

se amu bë uan datali ku sa skividu latela ineñ sai:

“DA UAN NASHIAN KU A NA JÖNSËF”.

Ëli se namsëdji ja adola shinke namsëdji jönsë iai,

se sa nguë shi amu bi pegua da namsëdji.

24 ^*»Nashian shi fë mundu ku jö ineñ shi sa dantu dëli tudu,

ëli se sa Shiölö ösë ku tela.

Ëli na ja ta jadji Nashian ku a ja fë öma nna pöjödölöf,

25 ñi ëli na ja lega pa öma pöjödölöf shivi ëlifa,

shimafan ja ëli ja dishia uan kuzhuf;

ëli se ja da no tudu vida,

fiezha ku ja tudu.

26 Se fo uan ponodu napai se ëli fë tela tela tudu,

valadji pa ineñ ja ta tela tudu,

se ëli msa ineñ tempu tudu ku dantu ubulu ineñ shi ku ta pa ineñ ja ta.

27 »Jö ineñ se tudu sa ja Nashian fë valadji pa nguë tudu ja jua ëli,

jativie ja papa ëli ku öma,

a ja paadji dajonta ku ëli,

benga zha pa ëli na sa löndji fo zhugan nof.

28 Pakë dantu ëli se no ja bibe,

se no ja solo,

se no ja sa;

amea shi zhugan nna tuludöguë skëvëdölö griego ten vlame faa:

“No sa nna minadjimina dëli”.

29 Dajantu shi,

öshi no sa nna minadjimina Nashiolo,

no na ta pa ja mazhna fa Nashian sa shimafan oro,

plata ö utu budu ö fesan ku napai ja fë ku shizhu dëneñ.

30 »Mandji se Nashian,

lega pasa tempu shi nguë tudu bi sa danadu iai,

öseshi se ëli ja da nguë tudu odji,

jamian tudu,

pa nguë tudu tan vla ku ope tashi.

31 Pakë ëli pë uan djia ku se sa djia shi ëli ske juzhga mundu ku djustishi,

amea masebu shi ku ëli se ma.

Se dajantu shi se ëli da nguë tudu jonfa fa ëli lanta ëli fo dantu nna nguë mölidu».

32 Mandji se ta ineñ ba tëndë ja lanta nguë bi vida,

se zhugan ineñ sa fa ja li ëli,

se utu ineñ se faa ëli:

«No tan ske bi vlame tëndë bo tëjantu ku jö sai utu tempu».

33 Se amea sai se Pelavöl së fo metadji dëneñ.

34 Mandji se zhugan nguë këlë,

se zhunta ku Pelavöl.

Dantu ineñ se bi sa ku Dionisio,

ku bi sa nguë Areopago,

ku a shime uan mooso ku a ja sama ëli Damaris ku utu nguë mashi.