Timoteo ska nda odji ku Pelavöl ku Silas
16
Se ta Pelavöl ba da Derbe ku Listra,
ala se ëli bi sa ku uan balë ku a ja sama Timoteo,
mina uan naamain judio ku ten ja këlë,
mandji se pai dëli sa griego.
2 Se nna namain guëzha Listra ku dji Ikonio tudu bi ska da lazhan gavu Timoteo.
3 Se Pelavöl bi ngongo pa Timoteo be ku ëli,
mandji se ëli manda pa kuta ëli napai dëli,
dajantu pa nna judio ineñ shi ja ta jamian ineñ se tudu,
pakë nguë tudu bi sëbë fa pai dëli bi sa griego.
4 Se ta ineñ bi ska pasa palea palea,
se ineñ bi ska da ineñ lazhan odji ineñ shi nna apostol ku nna jasa jasa guëzha ku bi sa Jerusalen bi da,
valadji pa ineñ gada ineñ.
5 Se amea sai se guëzha guëzha tudu bi ska jonfa ku foshi mashi,
se bi ska bai këësë namolo ngandji mashi djia tudu.
Pelavöl bë suian
6 Se ineñ pasa fo loso loso Frigia ku dji Galasia,
se Spitu Santu na lega pa ineñ pegua nova loso loso Asiaf,
7 se ta ineñ ba da lome Misia,
se ineñ jua amea shi pa ineñ ba Bitinia,
mandji se Spitu Djisu na lega ineñf.
8 Se ineñ pasa lome Misia,
se ineñ dësë ba Troas.
9 Ta da nöchi se Pelavöl bi të uan suian;
ëli bë uan masebu ku sa nguë loso loso Masedonia,
ku bi sa mdjadu,
ja luga ëli ja faa:
«¡Pasa bi Masedonia bi zhuda no!».
10 Ta Pelavöl bë suian se moso,
öshi öshi se no ten fë vadu valadji pa ba Masedonia,
ku uan këlë dantu no fa Nashian ska sama no valadji pa no ba pegua evanjelio da nna nguë Masedonia.
Pelavöl sa Filipos ja pegua
11 Se no ma uan navian fo Troas,
se no be dëtu ba da ië shi a ja sama Samotrasia,
se ta da amaian shi se no ba da Neapolis.
Hechos 16.11-40
12 Se fo ala se no ba Filipos,
ku bi sa uan nna loso nna nguë roma ku se bi sa uan taba palea dantu pachi loso loso Masedonia.
Se no mdja ala zhugan pono djia.
13 Se ta da djasubudu se no së ba loga loga tela,
lome uan lubela,
jamian shi no mazhna fa bi fo të uan jamian ku nna judio ja lezha.
Se no tusan ala ja da lazhan ku zhugan naamain ku tudu bi sa zhuntadu pë ala.
14 Uan ineñ se a ja sama Lidia,
ku ëli bi sa nguë palea shi a ja sama Tiatira,
ku se bi ska vëndë panu böbö kulu.
Se mooso sai ku ja adola Nashian,
bi ska tëndë,
se Shiölö bla kusan dëli ku olantena valadji pa ëli këlë nova shi Pelavöl bi ska fala.
15 Se ta a bachizha ëli ku nna nguë jadji dëli tudu,
se ëli pindji no ja faa:
«Shi namsëdji ja juzhga fa amu sa uan balë jonfadu Shiölö,
namsëdji ja fo lantela bi mdja jadji amu».
Se ëli fë no afoshi se no mdja ala.
16 Uan djia se no bi ska jamian shi a ja lezha,
se no dajonta ku uan namina miela ku bi sa ku spitu golo kuzhu se ëli ja sëbë jö ineñ shi ja ske pasa nguë tudu.
Ëli bi sa uan sëlëva,
ku jö sai se ëli bi ska ngana djiëlu da nna shiölö dëli.
17 Se namooso se jomesa ja lë no ku Pelavöl ja ta kidëlë,
ja faa:
«¡Nna masebu ineñ se tudu sa shividölö Nashian shi Atu mashi,
se ineñ ska da namsëdji monova jamangandji shi pa namsëdji sava!».
18 Se ëli se bi ska fë jö sai dantu uan sapa djia,
ba toja ku na tan bi ska fë gavu da Pelavöl mashif,
se vla öiö da ëli se ëli faa spitu fëiu shi bi sa ku ëli iai:
«Amu da bo odji ku namu Djisukilitu,
pa bo së fo ëli».
Se ola shime se spitu se së fo ëli.
19 Mandji se ta ba da nna shiölö namooso se ötëndë fa ineñ ske pëndë amea fölöshö shi ku ineñ bi ska ngana djiëlu,
se ineñ ma Pelavöl ku Silas ba mete döluia deenchi nna jasa jasa pövu.
20 Se a ma ineñ ba deenchi djustishi,
se ineñ faa ineñ:
«Nna namain ineñ se,
ku ineñ tudu sa judio,
se ineñ se ja bi ku tavadji dantu tela sai,
21 se ineñ ska shina nguë kutumu ku na ja sa legadu pa no mafa ñi pa no fëf,
pakë no sa nna nguë roma».
22 Tadashi se pövu lanta pedji ku Pelavöl ku Silas,
se nna nguë djustishi manda pa chila ineñ gödödji pa da ineñ ku valasöchi.
23 Ta a da ineñ ku sapa valasöchi ineñ se jaba,
se a mëtë ineñ pë djili,
se a da ludjadölö djili odji pa ludja ineñ ku suguladu shi ngandji mashi.
24 Se ta ludjadölö djili tëndë odji se,
se mëtë ineñ pë jamian shi fundu mashi dantu djili se mala ineñ ope ku tuludöpa pizha pizhadu.
25 Mandji se ta da mete nöchi,
se Pelavöl ku Silas sa fa ja lezha ku janta da Nashiolo,
se utu nna djilima ten bi ska tëndë ineñ.
26 Moso se uan tavada basu dösan ödu sa fa ja sugudji djili se ba toja dötë.
Se öshi öshi se poto djili tudu bla se guian tudu sota fo ope nna djilima ineñ se tudu.
27 Se ta ludjadölö djili jölë bi joda ku ëli toja poto djili tudu betu,
se ëli chila uan jatana pa ëli chila vida öguë dëli folo,
pakë ëli bi mazhna fa nna djilima tudu bi jölë bebezha.
28 Mandji se Pelavöl ta uan fala kidëlë,
ja faa:
«¡Na fë öguë bo zhugan ja fëfëiuf,
no tudu ontolo sa iai!».
29 Se ludjadölö djili pindji pa da ëli uan lapanta,
se ëli jölë ba dantu dantu,
ja ska timbla da mendu,
se ëli da dajözhöiö ope Pelavöl ku Silas.
30 Ta ëli chila ineñ bi ola se ëli pongota ineñ:
—Nna masebu,
¿kë ja ta pa amu fë valadji pa amu sava?
31 Se ineñ faa ëli:
—Këlë Shiölö Djisu,
amea sai se bo ku dantu jadji bo tudu ske sava.
32 Se ineñ faa ëli ku nna nguë ineñ shi sa dantu jadji tudu nova Shiölö.
33 Tadashi,
ola nöchi shime,
se ludjadölö djili limpa ineñ fida tudu;
zha se öshi öshime,
se a bachizha ëli ku nna nguë ineñ shi sa jadji dëli tudu.
34 Se ëli ma ineñ ba jadji dëli se ëli da ineñ kumu,
se ëli ku zhenchi dëli tudu bi sa ku liguilia dajantu ku ineñ këlë Nashiolo.
35 Ta da pamasedu,
se nna nguë djustishi manda zhugan nna guada pa ba faa ludjadölö djili ku odji pa chila Pelavöl ku Silas fo djili.
36 Se ludjadölö djili faa Pelavöl:
—Nna nguë djustishi da amu odji pa amu lega namsëdji bai,
öseshi namsëdji ja fo be ku padji.
37 Mandji se Pelavöl faa nna guada:
—No sa nna nguë roma,
se ineñ da no ku valasöchi deenchi pövu shinke ineñ juzhga no,
se ineñ mëtë pë djili.
¿Mandji se öseshi se ineñ ngongo chila no fo djili jöndjidu?
Na,
gavu pa ineñ bi ku öguë dëneñ bi chila no fo djili.
38 Se nna guada da nna nguë djustishi lazhan,
se mendu ma ineñ ta ineñ ba tëndë nova se faa Pelavöl ku Silas sa nna nguë roma.
39 Se ta ineñ bi da deenchi dëneñ,
se ineñ pindji ineñ pedan se ineñ chila ineñ fo djili,
se ineñ pindji ineñ pa ineñ së fo dantu tela sai.
40 Ta Pelavöl ku Silas,
së fo djili se ineñ ba jadji Lidia,
ala se ineñ ba bë nna namain guëzha,
se ineñ da ineñ añimu,
zha se ineñ së fo tela sai.