Zhunta nna jasa jasa guëzha Jerusalen
15
Dantu tempu sai,
se zhugan nna nguë ku së fo Judea ba Antiokia jomesa ja shina nna namain kuzhu ja faa ta pa ineñ sa kutadu napai dëneñ valadji pa ineñ sava amea shi alë Moises fala.
2 Se Pelavöl ku Bernabe të uan tavadji ngandji ku ineñ,
se dajantu shi se Pelavöl ku Bernabe ku utu nna namain subili ba Jerusalen valadji pa ineñ paadji ba faa tavadji se ku nna apostol ku nna jasa jasa guëzha tela sala.
Hechos 15.1-35
3 Se guëzha Antiokia manda ineñ ja Jerusalen,
se ta ineñ bi ska bai se ineñ pasa Fenisia ku Samaria,
se ineñ da ineñ lazhan amea shi nna nguë ku na sa judiof tudu ten këlë Djisu.
Se nova se faa gavu da namain tudu.
4 Se ta Pelavöl ku Bernabe ba da Jerusalen,
se guëzha ma ineñ ku bembe gavu,
pachi nna apostol ku nna jasa jasa guëzha,
se ineñ da ineñ lazhan jö ineñ shi Nashian fë amea dëneñ.
5 Mandji se zhugan nguë ku sa nna nguë pachi fariseo,
ku ten këlë Djisu,
se lanta se faa:
«Ske sa gavu pa nna nguë ineñ shi na sa judiof,
ku ten këlë Djisu,
pa fë ineñ pa ineñ kuta napai dëneñ a shime pa ineñ ten ja gada alë Moises».
6 Se nna apostol ku nna jasa jasa guëzha,
të uan zhunta valadji pa ineñ ba sëbë jö shi pa ineñ fë.
7 *Ta ineñ jaba ku tavadji shi bi të iai,
se Pudul lanta se faa:
«Namain amu,
namsëdji tudu sëbë fa fo jomesadu se Nashian sama amu fo dantu namsëdji valadji pa amu pegua nova gavu da nna nguë ku na sa judiof pa ineñ ten paadji këlë.
8 *Se Nashiolo,
ku jönsë kusan nguë tudu,
se msa ineñ fa ëli ngongo ku ineñ,
dajantu shi se ëli da ineñ aen amea Spitu Santu shimafan ta ëli ten da no.
9 Se Nashian na pia amea shi no ku ineñ sa pataduf,
shina amea jonfa se ëli ten limpa kusan dëneñ tudu.
10 Se öseshi,
¿jama fë a ska tenta Nashiolo,
ja pë liba nna balë ineñ se uan jalga ku ñi no ineñ sai ñi nna paipai no na bi paadji gagaf?
11 ¡Na paadji sa shif!
Sa gavu mashi,
shimafan ineñ,
no këlë fa no sa savadu dajantu galasa Shiölö no Djisu».
12 Tadashi se dantu zhunta da filili valadji pa fo tëndë Bernabe ku Pelavöl,
ta ineñ da lazhan amea shinali ku ja ngangandji fo Nashiolo ku bi fë jö ineñ sai dantu nna nguë ineñ shi na sa judiof.
13 Se ta ineñ faa fala jaba,
se Sanchagu,
ku sa namain Djisu ma fala,
se ëli faa:
«Nna namain amu,
tëndë amu.
14 Shiman da no lazhan amea shi Nashian msa nna nguë ineñ shi na sa judiof föböli dëli fo jomesadu,
dajantu pa ëli ma ineñ shimafan pövu dëli.
15 Se sa fala ineñ shi ku nna pantafala Nashian bi skëvë,
amea shi sa dantu Fa Nashiolo.
16 “Ta ku jö se ja pasa se amu tan ska bi
pa amu tan vlame jözhë limada dalë David shi lolo iai pë.
Se amu ten ske jözhë ja fea feadu pë,
se amu tan ske lanta ëli,
17 valadji pa utu nna nguë mundu nguintëlu nguintëlu ja jua Shiölö,
pa nna nguë na ja këlë Nashianf,
tudu ja lezha ku namu amu.
Se sa amea shi Shiölö fala,
18 ku se a jönsë fo tempu tempu antigu”.
19 »Dajantu shi,
se amu juzhga fa ta pa chama pë topu nna nguë ineñ shi na sa judiof ku ja këlë Nashiolo iai.
20 Shina pa skëvë ja faa ineñ pa ineñ ja chama kumu ja nozhodu ineñ shi a fë da nna nashian balu,
pa ineñ ten chama fë ja nda ölöluia,
ku pa ineñ na tan kumu jañi limaia ineñ shi a ja ia gochifa ñi pa na tan ja kumu sanguif.
21 Pakë fo tempu tempu antigu dantu tela tudu bi sa ku nna nguë ineñ shi ja pegua alë Moises dantu jadji Nashian nna judio,
jamian shi a ja lëë djasubudu tudu».
Jaata da nna nguë ineñ shi na sa judiof
22 Tadashi se nna apostol ku nna jasa jasa guëzha,
ku nna nguë guëzha tudu mazhna pa ineñ ma zhugan nna nguë dantu nna balë tudu valadji pa da ineñ ba Antiokia ku Pelavöl ku Bernabe.
Se ineñ ma Judas,
ku a ten ja sama ëli Barsabas,
ku Silas,
ku sa uan masebu dondolo dantu nna namain tudu,
23 se ineñ da uan jaata bai ku ineñ ja faa:
«No nna apostol ku nna jasa jasa guëzha ku nna namain tudu,
da namsëdji manten,
nna namain no ineñ shi na sa judiof ku tudu ja ta Antiokia,
Siria ku Silisia.
24 »No tëndë fa zhugan nna nguë ku së fo dantu no,
shinke no da ineñ zhugan odji,
se bai ku tavadji ja buia alma namsëdji ku ja da odji pa kuta namsëdji napai ku pa ja gada alë.
25 Dajantu shi,
se no tudu ku uan fala soso mazhna pa no ma zhugan nna namain dantu no valadji pa ineñ ba bë namsëdji ku nna namain kilidu no ku sa Pelavöl ku Bernabe,
26 ku sa nna nguë ku tudu pë vida dëneñ pepe mölë dajantu namu Shiölö no Djisukilitu.
27 Se fë ku no ska da Judas ku Silas bi da namsëdji,
valadji pa ineñ da namsëdji lazhan jala jala jö ineñ se no ska skëvë da namsëdji iai.
28 »Pakë Spitu Santu bë gavu,
a shime ku no,
pa no na pë liba namsëdji zhugan jalga mashi ku jö ineñ shi fë fata ief:
29 pa nna namsëdji ja chama kumu ja ku a ja ma fë saklifisu da nna nashian balu,
ñi pa namsëdji na ten ja kumu sangui limaia ku iai gochif,
pa namsëdji ten ja ata ku fë ja nda ölöluia.
Se shi namsëdji ja ata ku jö ineñ sai,
namsëdji ske ja fë ja gavu.
Bembe gavu ku namsëdji».
30 Amea sai se ta ineñ lega ineñ,
se ineñ dësë ba Antiokia,
se ineñ zhunta nna nguë guëzha tudu se ineñ da ineñ jaata sai.
31 Se ta ineñ lëë,
se da ineñ uan liguilia dajantu nova gavu shi ineñ tëndë iai.
32 Se Judas ku Silas ku ten bi sa pantafala,
se ineñ faa ku nna namain uan böjö tempu ja da ineñ añimu ku pa ineñ ten ma foshi.
33 Ta ineñ pasa uan tempu ala,
se ineñ tan lega nna namain ku padji,
valadji pa ineñ tan ba toja nna nguë ineñ shi manda ineñ ba ala.
34-35 (Mandji se Silas ba sinchi gavu pa ëli mdja ala).
Se Pelavöl ku Bernabe ten mdja Antiokia,
ja shina ineñ ja ku ten ja pegua evanjelio Shiölö Djisukilitu,
ku utu nna namain mashi.*+
Pelavöl safa fo Bernabe
36 Ta pasa zhugan djia,
se Pelavöl faa Bernabe:
«No bai pa no ba ua nna namain ineñ shi sa ku no tela ineñ shi no pegua nova Shiölö iai,
pa no ba bë amea shi ineñ ska bai».
Hechos 15.36–16.10
37 Se Bernabe bi ngongo ma Zhuan be ku ineñ,
nguë shi ku a ten ja sama ëli Marko,
38 *mandji se Pelavöl na bë gavu pa ma ëli bef,
pakë Marko bi safa fo ineñ fo Panfilia se ëli na lë ineñ ba tabaiaf.
39 Se jö se fë ineñ të uan tavadji ngandji dantu dëneñ ku se fë ku uan nguë safa fo utu nguë.
Bernabe ma Marko be ku ëli se ineñ ma uan navian ba Chipre,
40 se Pelavöl ma Silas be ku ëli,
se nna namain lezha da ineñ ku ngongo ku galasa Shiölö,
se ëli ten bai,
41 se ëli pasa Siria ku Silisia ja da nna guëzha guëzha añimu,
pa ineñ ja bai ja jonfa Shiölö Djisu.