Pelavöl ku Bernabe sa Ikonio
14
Ta Pelavöl ku Bernabe ba da palea shi a ja sama Ikonio,
se ineñ lantela dantu jadji Nashian nna judio,
se ineñ faa fala amea shi ku uan möi nna judio këlë,
ku a shime nna griego.
2 Mandji se nna judio ineñ shi na ja këlëf ai se lanta nna nguë ineñ shi na sa judiof se ineñ të añimu dëneñ të manga tëjantu ku nna namain dëneñ.
Hechos 14.1-28
3 Tadashi se Pelavöl ku Bernabe mdja ala uan sapa tempu,
ja faa fala ku valëntë ja jonfa Shiölö,
ja da lazhan gavu da fala galasa dëli,
ja da ineñ pödë pa ineñ fë shinali ku ja ngangandji amea dëneñ.
4 Se nna nguë palea sai bi sa pachidu:
zhugan ineñ bi sa pachi nna judio,
se utu ineñ bi sa pachi nna apostol.
5 Mandji se nna judio ku zhugan nna nguë ineñ shi na sa judiof,
zhunta ku nna gövöndölö dëneñ,
se ineñ lanta valadji pa ineñ fë ineñ machi ja da ineñ ku budu.
6 Se ta ineñ ba sëbë,
se ineñ jölë ba Listra ku Derbe,
ku bi sa dantu tela Likaonia ku loso loso ineñ shi sa lome dëneñ,
7 ala se ineñ ten bi ska pegua evanjelio.
A da Pelavöl ku budu
8 Se uan masebu ku ja ta Listra ku bi sa lezhadu,
pakë ëli bi sa ojogo fo djia shi a pali ëli,
ku ëli jabötu na bi sa nda ie zhaf.
Se masebu se bi ska tusan,
9 ja tëndë Pelavöl,
ku ta ba ku öiö ba ëli,
se ëli pia ëli gavu,
ta ëli ba bë fa ëli sa ku jonfa valadji pa ëli kula,
10 se ëli faa ëli ku falagochi atu:
«¡Lanta pa bo ta mdjadu!».
Se masebu sata se ëli jomesa ja nda.
11 Tadashi se ta ineñ bë jö shi Pelavöl fë,
se nguë tudu jomesa ja ta kidëlë ku fala tela nna nguë likaonia:
«¡Nna nashian tudu se vla fë shimafan pöjödölö,
se ineñ dësë bi toja no!».
12 Se Bernabe se ineñ ja sama nashian nna griego Seus,
se Pelavöl se ineñ ja sama nashian Ermes,
pakë ëli se bi ska faa fala.
13 Se padjil nashian Seus,
ku jadji nashian dëli bi sa lome poto shi a ja lanta palea,
se ëli bi ku kau ku jambe floli,
se ëli ku möi pöjödölö ineñ sai,
se bi ngongo fë saklifisu da ineñ.
14 Mandji se ta nna apostol Bernabe ku Pelavöl,
ba tëndë jö sai,
se ineñ të bitidu dëneñ të baga baga,
zha se ineñ daua ba dantu möi pöjödölö ja ta kidëlë ja faa:
15 «Nna masebu,
¿jama fë namsëdji ska fë jö ineñ sai?
No ten sa nna pöjödölö shimafan namsëdji,
ku bi pegua nova gavu da namsëdji,
pa namsëdji lega ja sono sono ineñ se tudu pë,
pa namsëdji tan vla Nashian shi sa vivu,
ku se mindji ösë ku tela,
ku omali ku jö ineñ shi sa dantu dëneñ tudu.
16 Tempu baezha ëli bi lega se nna nguë tela tudu lë tuludöguë jamangandji dëneñ,
17 mandji se ëli na chama da lazhan gavu da tuludöguë dëlif,
ja fë ja gavu,
ja da no aua sëbidu fo ösë ku tempu gavu pa ja totolo fuluta,
pa ja të manchimentu ku liguilia dantu kusan no».
18 Se benga zha pa faa ineñ jö ineñ sai,
apudjimidu se ineñ fë pa pövu na fë saklifisu da ineñf.
19 Tadashi se bi zhugan nna judio fo Antiokia ku Ikonio,
se faa pövu utu ja patadu tëjantu ku Pelavöl,
se ineñ sa fa da ëli ku budu,
se a sea ëli san ölöluia palea,
ja mazhna fa ëli sa mölidu.
20 Mandji se ta nna balë ludja ëli pë metadji se ëli lanta fo san se ëli tan vlame lantela dantu palea.
Ta da amaian shi se ëli ku Bernabe ma ja se ineñ ba loso Derbe.
Pelavöl ku Bernabe tan vla Antiokia
21 Se ta a pegua evanjelio dantu palea sai jaba ku ineñ fë uan sapa balë,
zha se Pelavöl ku Bernabe tan vla Listra,
Ikonio ku Antiokia,
22 se ineñ da nna balë foshi ku añimu pa ineñ gada jonfa,
se ineñ ten faa ineñ:
Pa ske sa nguë dantu gövöndölö Nashiolo ske fë fata pa no ma mavida monchi.
23 Se ineñ lanta nna jasa jasa pë dantu unian unian guëzha,
se ta ineñ lezha ku zhedu böjö,
se ineñ pë öma liba dëneñ ja da ineñ Shiölö shi ku ineñ këlë dëli iai.
24 Ta ineñ pasa fo Pisidia,
se ineñ ba da Panfilia.
25 Se ta ineñ pegua fala Nashian jaba tela Perge,
se ineñ lolo ba loso Atalia.
26 Fo ala se ineñ ma uan navian ba Antiokia,
jamian shi a da ineñ galasa Nashian dajantu tabaia shi ku ineñ fë iai.
27 Ta ineñ ba da ala,
se ineñ të uan zhunta ku guëzha se ineñ da ineñ lazhan ja ngangandji shi Nashian fë ku ineñ,
amea shi ëli bla poto da nna nguë ineñ shi na sa judiof pa ten paadji të jonfa.
28 Se ineñ mdja ala ku nna balë uan sapa tempu.