Bernabe ku Saulo ska da ineñ ja bai
13
Dantu guëzha Antiokia bi sa ku nna pantafala Nashiolo ku nna meeth:
Bernabe,
Shiman ku a ten ja sama ëli Nagul,
Lusio ku sa nguë loso loso Sirene,
Manaen ku ëli bi ikia ku alë Erodes shi se bi sa gövöndölö shi fë jatulu,
ku Saulo.
2 Se uan djia ku ineñ bi ska fë sulvisu da Shiölö ku zhedu böjö,
se Spitu Santu faa:
Namsëdji safa Bernabe ku Saulo da amu valadji pa ineñ fë tabaia shi ku amu sama ineñ.
Hechos 13.1-13
3 Ta ineñ chama lezha ku zhedu böjö jaba,
se ineñ pë öma liba dëneñ zha se ineñ manda ineñ bai.
Bernabe ku Saulo sa ië Chipre
4 Se Spitu Santu manda Bernabe ku Saulo bai,
se ineñ dësë ba loso loso Seleusia,
fo ala ku navian se ineñ ba uan ië ku a ja sama Chipre.
5 Ta ineñ ba da Salamina,
se ineñ jomesa ja pegua fala Nashiolo dantu jadji Nashian nna judio.
Se ineñ ten bi sa ku Zhuan shimafan shividölö dëneñ.
6 Se ineñ pasa liba ië sai ba toja Pafos.
Ala se ineñ dajonta ku uan nguë döfia,
uan judio pantafala fanchila ku a ja sama ëli Barjesus.
7 Se ëli bi sa ku gövöndölö Sergio Pelavöl,
ku sa uan masebu jotadu ku tëndëmentu.
Se ëli manda ba sama Bernabe ku Saulo,
pakë ëli bi sa ku vintadji pa ëli tëndë fala Nashiolo.
8 Mandji se Elimas,
pai döfia (se sa sinchidu shi sa ku namu dëli),
ja jua amea shi pa ëli safa gövöndölö fo jonfa sai.
9 Tadashi se Saulo,
ku a ten ja sama ëli Pelavöl,
ku bi sa shia Spitu Santu,
dëdë öiö pë ëli,
10 se faa ëli:
«¡Mina dödjiabu,
namigu djustishi tudu,
ku ja sa shia ngaña nguë ku ja da fanchila tudu!
¿Kë djia bo ske chama mba jamangandji dëtu Shiölö?
11 Öseshi,
se öma Shiölö ske liba bo,
se bo ske vla sebu,
se bo na tan ske bë solof ba toja uan tempu».
Se öshi öshime se sombolo ku jamian kulu pono da liba dëli,
se ëli sa fa ja papa jamian,
ja jua uan nguë pa ma ëli bai ku öma.
12 Ta gövöndölö bë jö ineñ se ska pasa ala iai,
se ëli këlë,
ku böjö betu da jö ineñ shi a ska shina ëli tëjantu ku Shiölö.
Pelavöl ku Bernabe sa Pisidia
13 Pelavöl ku nna jamada dëli ma uan navian fo Pafos se ma ineñ ba Perge fo Panfilia,
mandji se Zhuan safa fo ineñ se tan vla Jerusalen.
14 Se ineñ pasa fo Perge ba Antiokia loso Pisidia.
Se djasubudu se ineñ lantela jadji Nashian nna judio se ineñ tusan.
Hechos 13.14-52
15 Se ta a lëë lavulu alë Moises ku dji nna pantafala jaba,
se nna jasa jasa jadji Nashian nna judio faa ineñ:
«Nna namain,
namsëdji ten ja të uan fala pa da pövu añimu,
namsëdji paadji fala».
16 Tadashi se Pelavöl,
ta mdjadu se ëli lanta öma ja pindji filili,
se ëli faa:
«Namsëdji tëndë,
nna nguë Israel,
ku namsëdji ineñ shi sa nguë utu tela ku ja da Nashian ondolo,
tëndë amu.
17 »Se Nashian pövu Israel ma nna paipai no,
se ëli lanta pövu se ineñ ba van öshi ontolo ineñ bi ska ta shimafan zhenchi patadu dantu tela Ejipto.
Se Nashian ku baasu lantadu se ëli chila ineñ fo tela sala.
18 Se ëli gaga ineñ dantu jamian sölö sölö amea deshi danu jatulu.
19 Zha se ëli të tela seta seta ineñ se të fea fea dantu Kanan,
se ëli ma tela ineñ sai se ëli da pövu dëli Israel shimafan gagavu.
20 Jö ineñ se tudu pasa dantu sentu jatulu ku deshi shinku danu.
»Zha se ëli da ineñ fo nna jues ba toja djia pantafala Samuel.
21 Tadashi se ineñ pindji ëli uan alë,
se Nashian da ineñ Saul mina Kis,
ku sa nguë zhenchi Benjamin,
se ëli bi sa alë liba dëneñ deshi danu jatulu.
22 Se ta Nashian chila Saul folo,
se ëli pë alë David,
ku jantu dëli se a da lazhan gavu ja faa:
“Amu bë David,
mina Isai,
uan masebu ku sa ku kusan amea amu,
pakë ëli ja fë jö ineñ shi amu ja ngongo”.
23 »Se fo minadjimina David,
amea plomesa dëli,
se Nashian ske da uan savadölö bi da Israel,
ku se sa Djisu.
24 *Anta pa Djisu bi,
se Zhuan bi pegua bachizha shi ja tëjantu pa tan vla ku ope tashi da pövu Israel tudu.
25 *Se ta Zhuan bi ska jaba ku sulvisu dëli,
se ëli faa:
“¿Kë nguë namsëdji mazhna fa sa amu?
Amu na se sa ëlif,
mandji se tashi amu ska bi uan nguë ku amu na të ondolo shi pa amu sota jodo ja mëtëpope dëlif”.
26 »Nna namain,
nna minadjimina Abraam,
ku nna nguë ineñ shi ku ja da Nashian ondolo ku sa dantu namsëdji,
da namsëdji ineñ sai a da nova savasan sai bi da.
27 Pakë nna nguë ineñ shi ja ta Jerusalen ku nna gövöndölö dëneñ na bi jönsë Djisuf,
ñi ineñ na tëndë fala ineñ shi nna pantafala bi ja lëë djasubudu tuduf,
ineñ tudu kumpli ta kondena ëli.
28 *Se benga zha ku ineñ na bë zhugan ja fëiu pa ineñ fo chila ëli vida folof,
se ineñ pindji Pilatu pa chila ëli vida folo.
29 *»Zha se,
ta ineñ fë jö ineñ shi tudu bi sa skividu tëjantu ku ëli,
se ineñ da ëli bi fo van taaba,
se ineñ da ëli spitula.
30 Mandji se Nashian tan lanta ëli fo dantu nna nguë mölidu.
31 *Se,
dantu uan sapa djia,
se a bë Djisu ku nna nguë ineñ shi bi subili ku ëli fo Galilea ba Jerusalen,
se ineñ öseshi se ska da lazhan gavu Djisu deenchi pövu.
32 »Se no ten ska pegua evanjelio sai da plomesa ineñ shi a bi fë nna paipai no.
33 Se Nashian kumpli jö ineñ se tudu ku no,
nna mina dëli,
ta ëli tan lanta Djisu bi vida.
Amea shi bi sa skividu dantu lavulu Salmos shi fë dösu:
“Bo se sa Mina amu.
Ödjai me se amu pali bo”.
34 »Se i shi moso ku ëli lanta ëli fo dantu nna nguë mölidu valadji pa ëli na tan poto poto zhugan djiaf,
se ëli faa shi:
Amu ske da namsëdji besa santu ku ja suguladu ineñ shi ku amu bi plomëtë David iai.
35 Dajantu shi se ëli tan vlame faa dantu utu Salmos:
“Bo na ske lega pa Santu bo poto potof”.
36 »Pakë anta vedadji se ta David shivi zhenchi dëli tudu amea shi bi sa vintadji Nashiolo,
se ëli mölë,
se ëli zhunta ku nna paipai dëli,
se öguë dëli poto poto.
37 Mandji se öguë nguë shi Nashian tan lanta bi vida ai na poto potof.
38 »Dajantu shi,
nna namain,
pa namsëdji sëbë jö sai:
fa amea Djisu moso se no ja ska pegua padadu pekadu tudu.
39 A na ja paadji pada zhugan nguë pekadu dajantu alë Moises mosofa,
mandji se ja sa nguë shi ja këlë se ëli ske sa padadu amea Djisu.
40 Namsëdji ja pinchidu,
pa jö ineñ shi nna pantafala bi faa iai na pono da liba namsëdji iai:
41 “Namsëdji pia,
nna nguë ja li nguë,
namsëdji ske ja mdja ku böjö betu,
pa namsëdji ja lanta san.
Pakë amu ske fë uan fidu ja djia namsëdji,
ku namsëdji zhugan djia na ske ja këlëfa,
ta uan nguë ske ja da namsëdji lazhanf”».
42 Ta Pelavöl ku nna jamada dëli së fo dantu jadji Nashian nna judio,
se ineñ pindji ineñ pa ineñ tan vlame bi djasubudu shi tan ja bi pa ineñ tan faa ineñ jö ineñ sai.
43 Se ta zhunta jadji Nashian nna judio baga,
se uan sapa nna judio ku nna nguë ineñ shi ja adola Nashiolo ku vla fë judio lë Pelavöl ku Bernabe.
Se ineñ faa ineñ pa ineñ na chama jonfa galasa Nashian zhugan djiaf.
44 Ta da djasubudu shi tan bi,
se pövu tudu zhunta pa tëndë fala Shiölö.
45 Mandji se ta nna judio bë amea shi möi pöjödölö tudu zhunta,
se ineñ të dishamentu ngandji se ineñ jomesa ja pufia ku jö shi Pelavöl bi ska fala ku ja ta ëli masan.
46 Tadashi se Pelavöl ku Bernabe ku valëntë se kundji ineñ:
«Da namsëdji se bi fë fata pa pegua fala Nashiolo pimëlu,
mandji se dajantu ku namsëdji zhuga patanta.
Se tuludöguë namsëdji me se mazhna fa namsëdji na mësë ondolo pa të vida chindadjif,
se fë ku öseshi ku no ske vla ba da nna nguë ineñ shi na sa judiof.
47 Pakë amea sai se Shiölö manda pa no:
“Amu pë bo pa bo sa fögö djidjidu da nna nguë na ja këlë Nashianf,
valadji pa bo se ma savasan ba toja jabamentu tela”».
48 Ta nna nguë ineñ shi na sa judiof tëndë jö ineñ sai,
se ineñ ma ku liguilia se ineñ da fala Shiölö ondolo.
Se nna nguë ineñ shi sa ala tudu këlë fa ineñ ske të vida chindadji.
49 Se amea sai se fala Shiölö sa fa ja panta panta dantu jamian loso loso ineñ se tudu.
50 Mandji se nna judio faa ku zhugan naamain ku ja adola Nashiolo ku tudu sa nguë dondolo ku zhugan napai döma dantu tela,
se ineñ fë pa vla Pelavöl ku Bernabe tashi,
se a jölë ineñ fo loso loso ineñ sai.
51 *Tadashi se ineñ,
sugudji opo fo ope dëneñ tëjantu ku palea sai,
se ineñ bai Ikonio.
52 Se nna balë mdja ala ku liguilia ku pödë Spitu Santu.