Mölë Sanchagu se Pudul sa djili
12
Dantu tempu shime,
se alë Erodes manda pa të zhugan nna nguë guëzha ba djili valadji pa ineñ ma mavida monchi.
2 Se ëli chila Sanchagu,
namain Zhuan,
vida folo ku uan jatana.
Hechos 12.1-19
3 Ta ëli ba bë fa jö se fë gavu da nna judio,
se ëli ten të Pudul.
Jö ineñ se tudu pasa dantu djia fesa Ampan shin levadura.
4 Se öshi ëli manda pa të ëli,
se a mëtë ëli pë djili,
se ëli da uachi sodadji jatulu unian unian nguë pa ja ludja ëli.
Pakë ëli bi ska mazhna pa ineñ ma ëli ba deenchi pövu ta fesa Paskua ja jaba.
5 Mandji se ta Pudul bi sa dantu djili,
se nna nguë guëzha na chama lezha da Nashian dajantu dëlif.
Uan anzhu chila Pudul fo djili
6 Ta da nöchi shime ku Erodes bi ske chila Pudul pa ma ëli ba deenchi pövu,
se Pudul bi ska djuni metadji sodadji dösu maladu ku guian,
se tan bi të sodadji dösu mashi böjö poto djili ja ludjila.
7 Moso se,
uan anzhu Shiölö së ineñ ku supichi,
se uan fögö dëdë ngan ngan ngan pë dantu djili.
Se anzhu da Pudul ku öma pintada se lanta ëli se faa ëli:
«¡Lanta dandjian!».
Se guian tudu pono fo öma Pudul.
8 Se anzhu faa ëli:
«Bishi kuzhu,
mëtë ja pope».
Amea sai se Pudul ten fë,
se anzhu tan faa ëli:
«Kubili ku bobolonda pa bo lë amu».
9 Se Pudul së ja lë ëli tashi,
mandji se ëli na bi sëbë fa jö ineñ shi anzhu se ska fë iai tudu sa vedadjifa,
shina ëli bi ska mazhna fa sa uan suian.
10 Se ineñ pasa nna pimëlu guada ku nna guada ineñ shi fë dösu,
se ineñ ba da böjö poto donfelu shi ku bi ja vla da palea,
se poto sai bla ku öma dëli,
se ineñ së.
Se ta ineñ nda ja pasa ölöluia,
se öshi öshi se anzhu sai safa fo ëli.
11 Tadashi se Pudul jölë bi joda,
se ëli faa:
«Öseshi se amu sëbë fa anta vedadji ku Shiölö manda anzhu pa bi chila amu fo öma Erodes,
ku fo jö shi nna pövu judio bi ska gada».
12 Ta da ëli ötëndë jö ineñ sai,
se ëli ba da jadji Malia main Zhuan,
ku a ten ja sama ëli Marko,
jamian shi uan sapa nguë bi sa zhuntadu ja lezha.
13 Se ta ëli jöjö poto shi ja da mete döluia,
se së bi tëndë uan namina miela shividölö ku a ja sama ëli Rode.
14 Se ta ëli ba jönsë falagochi Pudul,
se liguilia fë se ëli na bla potof,
shina ëli tan jölë ba dantu ba da lazhan fa Pudul sa böjö poto.
15 Se ineñ faa ëli:
—¡Ëli ska dana!
Mandji se ëli bi ska sugula ineñ fa sa shi.
Tadashi se ineñ bi ska faa:
—Ske sa anzhu dëli.
16 Mandji se Pudul ontolo bi ska sama.
Se ta ineñ bla poto ku ineñ bë ëli,
se ineñ tudu gua ku böjö betu.
17 Se Pudul fë ineñ shinali ku öma pa ineñ jaböjö,
se ëli da ineñ lazhan amea shi Shiölö chila ëli fo djili.
Se ëli faa ineñ:
«Namsëdji da Sanchagu ku nna namain lazhan jö sai».
Zha ëli së,
se ëli tan ba utu jamian patadu.
18 Ta pamasedu bla,
se bi të uan tavadji ngandji dantu nna sodadji ja mazhna jamian shi Pudul ja fo sa.
19 Mandji se alë Erodes ta jua ëli ku na bë ëlif,
se ëli golo nna guada,
se ëli da odji pa chila ineñ vida folo.
Zha se Erodes dësë fo loso loso Judea ba palea Sesarea se ëli mdja ala.
Hechos 12.19-25
Mölë alë Erodes
20 Se Erodes bi sa ku pashian ku nna nguë Tiro ku Sidon,
mandji se ineñ ku uan fala soso se bi deenchi dëli,
ta ineñ bi ngana föböli Blasto,
ku se sa shividölö shi ngandji dalë,
ineñ bi ska pindji padji.
Pakë ineñ bi ska të kumu fo tela alë.
21 Uan djia se Erodes manda sama ineñ,
se ëli bi sa ku bitidu lanlan,
se ëli tusan liba jadela dondolo djustishi dëli,
se ëli faa ku pövu.
22 Se pövu jomesa ja ta kidëlë:
«¡Falagochi uan nashiolo,
na sa dji uan napaif!».
23 Mandji se öshi öshi se uan anzhu Shiölö tuva ëli,
pakë ëli na da Nashian gloriaf;
se ëli lanja alma se bisu bisu kumu ëli.
24 Mandji se,
fala Nashian ska be ja këësë mashi ja panta panta.
25 Se ta Bernabe ku Saulo kumpli ku sulvisu dëneñ,
se ineñ tan vla fo Jerusalen,
se ineñ ma Zhuan be ku ineñ,
nguë shi a ten ja sama Marko.