3 Se ja faa ëli:

—¿Jama fë bo fo jadji nna nguë na sa judiof,

se bo kumu ku ineñ?

4 Tadashi se Pudul jomesa ja da ineñ lazhan amea shi jö ineñ se pasa tudu.

5 Se ja faa ineñ:

—Amu bi sa dantu palea Jope ja lezha se amu bë uan ja shimafan suian.

Se amu bë uan ja ku tan kë uan taba panu maladu fo ponto jatulu jatulu,

se bi ska dësë fo ösë bi toja jamian shi ku amu bi sa.

6 Se ta amu pia gavu,

se amu toja klase limaia ope jatulu ku ku limaia zhenchi mematu,

ku ineñ shi ja sea öguë san ku paatu paatu dösë.

7 Se amu tëndë uan falagochi ku bi ska faa amu:

“Lanta,

Pudul,

pa bo mata pa bo kumu”.

8 »Se amu kundji ëli:

—“¡Shiöla,

na!,

pakë zhugan ja sunzhu ñi nozhodu na sa lantela böjö amu ie zhaf”.

9 »Tadashi se ope shi fë dösu se falagochi shi fo ösë tan kundji amu:

“Jö shi Nashian ja limpa,

bo na ja sama sunzhuf”.

10 Se jö sai fë ope tëishi,

se a tan vlame ma ja tudu ba ösë.

11 »Dantu tempu se me,

ja pia,

se bi napai tëishi dantu jadji shi amu bi ja ta,

ku fo palea Sesarea se a manda bi jua amu.

12 Se Spitu Santu faa amu pa amu bai ku ineñ shin da butanja.

Se a shime nna namain sëishi ineñ sai ten be ku amu,

se no lantela jadji masebu sai.

13 Se ëli da no lazhan amea shi dantu jadji dëli se uan anzhu së ëli ku supichi,

ku ta mdjadu ku faa ëli:

“Da zhugan napai ba palea Jope valadji pa ba ma Shiman ku a ten ja sama ëli Pudul bi iai.

14 Ëli ske da bo uan nova ku amea dëli se bo ske sava ku nna nguë dantu jadji bo tudu”.

15 »Se ta amu jomesa ja faa fala,

se Spitu Santu ten bi liba dëneñ amea shi ten bi liba no fo jomesadu iai.

16 ^*Tadashi se amu ba lambela jö ineñ shi Shiölö bi faa:

“Zhuan anta vedadji bi bachizha ku aua,

mandji se a ske bachizha namsëdji ku Spitu Santu”.

17 Mandji se,

shi Nashian ten da ineñ tuludöguë gagavu shime ku no ta no bi këlë Shiölö Djisukilitu,

¿kë nguë sa amu pa amu na lega Nashian fë jö shi ëli ngongo fëf?

18 Tadashi ku nna apostol tëndë jö ineñ sai,

se ineñ tudu jaböjö,

ja da Nashian ilö ja faa:

—Se öshi,

se Nashian ten da nna nguë ineñ shi na sa judiof fölöshö jamian pa ineñ tan vla ku ope tashi ku pa ineñ ten të vida chindadji.

19 ^*Fo djia mölë Taban,

se a jomesa ja pëtëpë ineñ,

ja fë nna nguë ineñ shi këlë iai machi.

Se dajantu shi se zhugan ineñ jölë ba utu pachi tela tela ba toja Fenisia,

Chipre ku Antiokia.

Mandji se ineñ bi ska pegua nova gavu Djisu da nna judio moso.

20 Mandji se dantu ineñ ten bi të zhugan nguë ië Chipre ku loso Sirene,

ku ta ineñ ba da Antiokia se ineñ jomesa ja faa ku nna nguë ineñ shi ja faa fala griego,

ja pegua nova gavu Shiölö Djisu.

21 Se pödë Shiölö bi sa ku ineñ,

se fë se uan sapa nguë këlë Shiölö.

22 Ta nna nguë guëzha Jerusalen tëndë nova jö ineñ shi ska pasa ala,

se ineñ manda Bernabe ba Antiokia.

23 Ta Bernabe ba da ala ku ëli bë amea shi Nashian da ineñ galasa,

se ëli sinchi liguilia se ëli da ineñ añimu pa ineñ këlë Shiölö Djisu ku kusan dëneñ tudu,

pa ineñ mdja ja jonfa Shiölö.

24 Pakë ëli bi sa uan masebu gavu,

ku ten bi sa shia Spitu Santu ku jonfa.

Se fë se uan sapa dji nguë ten këlë Shiölö.

25 Zha se Bernabe ba tela Tarso valadji pa ëli ba jua Saulo.

26 Se ta ëli dajonta ku ëli,

se ëli ma ëli ba Antiokia.

Se ineñ ta ala ku nna nguë guëzha uan anu,

ja shina nguë uan sapa kuzhu.

Se Antiokia se bi sa pimëlu jamian shi a sama nna balë Djisu ku namu kitan.

27 Dantu djia ineñ sai se zhugan pantafala dësë fo Jerusalen ba Antiokia.

28 ^*Se uan ineñ,

ku a ja sama Agabo,

lanta mdjadu se amea Spitu Santu se da lazhan fa ske bi uan fomu ödu liba mundu nguintëlu nguintëlu,

ku anta vedadji ku jö se ten pasa dantu tempu shi Klaudio bi sa Sesar Roma.

29 Tadashi se nna balë mazhna pa ineñ zhuda nna namain ineñ shi ja ta Judea,

amea jö ineñ shi ja sa ku nguë.

30 Se amea sai,

se ineñ ten fë,

se a manda djiëlu ba da nna jasa jasa guëzha amea Bernabe ku Saulo.