Pudul ku Kornelio
10
Dantu palea Sesarea bi ska ta uan masebu ku a ja sama ëli Kornelio.
Ëli bi sa feshali sodadji roma ku sa nna nguë uachi shi a ja sama ineñ Italiano.
2 Kornelio bi sa uan masebu gavu,
se ëli ku nna nguë jadji dëli tudu bi ska shivi ku ja da Nashiolo ondolo.
Vlame se ëli ten ja zhuda nna judio ineñ shi sa puvili,
se ëli ja ska lezha olatuvëdji da Nashiolo.
Hechos 10.1-48
3 Uan djia,
bi sa la tëishi tadji,
se ëli të uan suian.
Ëli bë uan anzhu Nashian bababa se iaba lome dëli se bi ska faa ëli:
—¡Kornelio!
4 Se ëli pia anzhu se gavu ku mendu monchi se ëli pongota ëli:
—¿Kë ja bo dishia,
Shiölö?
Se anzhu kundji ëli:
—Nashian tëndë lezha bo tudu se ëli ten bë amea shi bo ja zhuda nna puvili shimafan uan ja gavu.
5 Manda zhugan napai öseshi ba palea Jope valadji pa ineñ fë pa bi uan masebu ku a ja sama ëli Shiman,
ku namu dëli ten sa Pudul.
6 Ëli ja ta jadji ku Shiman shi ku ja tabaia ku peli,
ku jadji dëli ja ta bodo domali.
7 Se ta anzhu se faa ku Kornelio tan bai,
se ëli sama nna shividölö dëli dösu ku uan sodadji jonfadu dantu nna nguë ineñ shi ja shivi ëli.
8 Se ëli da ineñ lazhan jö ineñ shi pasa tudu se ëli manda ineñ ba Jope.
Pudul të uan suian
9 Ta da amaian shi,
solomedjian,
öshi ontolo ineñ bi sa jamangandji ja Jope,
se Pudul subili ba jamian van dötë jadji ba lezha.
10 Se faku bi ska da ëli se ëli bi ngongo kumu uan kuzhu.
Mandji öshi a bi ska fë vadu jö shi pa ëli kumu,
se ëli bë uan ja shimafan suian.
11 Se ëli bë ösë betu,
se ëli bë uan ja shimafan uan taba panu ngandji,
ku sa maladu ponto jatulu jatulu,
se bi ska dësë bi san.
12 Se liba panu se bi sa ku klase limaia ope jatulu tudu ku ineñ shi ja sea öguë san ku paatu paatu dösë.
13 Se uan falagochi faa ëli:
—Lanta,
Pudul,
pa bo mata pa bo kumu.
14 Se Pudul kundji se faa ëli:
—¡Shiöla,
na!
Jabötu amu na sa kumu zhugan ja sunzhu ñi nozhodu ie zhaf.
15 Se ope shi fë dösu,
se falagochi se tan faa ëli:
—Jö shi Nashian ja limpa,
bo na ja sama sunzhuf.
16 Se jö sai fë ope tëishi,
se öshi öshi se a tan vlame ma ja tudu ba ösë.
17 Mandji se ta Pudul,
sa fa ja mazhna kumi jö ineñ se ëli bë dantu suian sai;
se sa öshi napai ineñ shi Kornelio manda bi ma ëli iai,
bi ska pongota jadji shi sa dji Shiman,
se ineñ ba da böjö poto.
18 Se ineñ sama,
ja pongota i shi uan Shiman ja ta ala,
ku a ten ja sama ëli Pudul.
19 Se öshi ontolo Pudul ska mazhna jö ineñ se ëli bë iai,
se Spitu Santu faa ëli:
«Ja pia,
napai tëishi ska jua bo.
20 Ta mdjadu,
pa bo dësë pa bo na da butanja pa bo ku ineñ baif,
pakë amu se manda ineñ bi».
21 Tadashi se Pudul dësë se ëli faa napai ineñ sai:
—Amu sa iai,
amu se sa nguë shi namsëdji ska jua.
¿Kë ja fë namsëdji bi iai?
22 Se ineñ kundji ëli:
—No bi fo pachi feshali sodadji roma Kornelio,
uan masebu dëtu ku ja da Nashian ondolo,
ku a ja da lazhan gavu tëjantu ku ëli dantu tela nna pövu judio tudu.
Se uan anzhu santu da ëli odji pa ëli bi sama bo pa bo ba jadji dëli valadji pa ëli ba tëndë jö shi bo të pa bo faa ëli.
23 Tadashi se Pudul faa ineñ pa ineñ lantela,
se ineñ mdja ala.
Pudul ska faa fala dantu jadji Kornelio
Ta da amaian shi,
se ëli lanta se ëli ku ineñ bai ku zhugan nna namain mashi ku sa nguë palea Jope.
24 Ta da amaian shi se ineñ ba da palea Sesarea.
Se Kornelio bi sa ala ja gada ineñ ku uan sapa nna pusumu dëli ku nna jamada chipa chipa dëli.
25 Se öshi Pudul ba da lome jadji,
se Kornelio së bi ma ëli,
se ëli da dajözhöiö deenchi dëli,
se ëli da ëli ondolo.
26 Mandji se Pudul lanta ëli,
se faa ëli:
—Ta mdjadu,
pakë amu ten sa uan napai,
shimafan bo.
27 Se Pudul ku ëli lantela jadji ja da lazhan,
se ëli bë uan möi pöjödölö zhuntadu pë ala.
28 Tadashi se ëli faa ineñ amea sai:
—Namsëdji tudu sëbë gavufa alë no na ja lega pa nna judio ja zhunta ku utu nguë patadu ñi pa ten ja sa ku ineñf.
Mandji se Nashian msa amu fa na ta pa amu ja sama zhugan nguë sunzhufa ñi zhogoveaduf.
29 Dajantu shi,
se ta a manda ba sama amu,
se amu bi shinke amu pë pöpa öpa.
Öseshi lega pa amu pongota namsëdji:
¿Ja fë namsëdji fë pa amu bi iai?
30 Tadashi se Kornelio kundji ëli:
—Ödjai se fë jatulu djia,
bi sa la tëishi tadji,
ku amu bi sa jadji amu ja lezha,
ja pia,
se së deenchi amu ku supichi uan masebu bishidu ku uan bitidu ku ja chila blin.
31 Se ëli faa amu:
“Kornelio,
Nashian tëndë lezha bo,
se chila djimolo bo a ten ja lambela deenchi Nashiolo.
32 Dajantu shi,
manda uan nguë ba palea Jope,
pa ba fë pa Shiman bi,
nguë shi ku a ten ja sama ëli Pudul,
ëli ja ta jadji Shiman,
nguë shi ja tabaia ku peli,
lome bodo domali,
ta ëli ja bi,
ëli ske faa ku bo”.
33 Se amea sai se amu manda pa ba sama bo,
se bo fë gavu ku bo bi.
Öseshi,
no tudu sa iai deenchi Nashiolo,
valadji pa no tëndë jö ineñ shi Shiölö manda bo pa bo faa no tudu.
Pudul pegua dantu jadji Kornelio
34 Tadashi se Pudul ma fala,
se faa:
—Öseshi se amu sëbë fa anta vedadji Nashian na ja pia uan nguë mashi ku utu nguëf,
35 shina dantu tela tudu ëli ja pia nna nguë ineñ shi ja da ëli ondolo ku ja fë ja ku djustishi.
36 Nashian da nova dëli bi da pövu Israel,
ja pegua nova gavu padji amea Djisukilitu,
ku se sa Shiölö nguë tudu.
37 Namsëdji tudu sëbë nova se ku a panta panta dantu Judea tudu,
ku bi jomesa fo Galilea,
fo djia bachizha shi Zhuan bi pegua iai.
38 Amu ska faa ja tëjantu ku Djisu Nasaret:
amea shi Nashian ma ëli ku Spitu Santu ku pödë,
ku kë amea shi ëli bi ska be ja fë fidu gavu,
ja kula nna nguë ineñ shi ku bi sa iadu pë basu djiabu,
pakë Nashian bi sa ku ëli.
39 »Se no da lazhan gavu da jö ineñ shi ku ëli fë dantu tela nna judio ku Jerusalen;
ku se a chila ëli vida folo pindjadu pë uan liba taaba.
40 Mandji se Nashian lanta ëli bi vida ta da tëishi djia,
se ëli fë pa no tan vlame bë ëli.
41 Se na sa pövu tudu se bë ëlif,
shina no moso;
nna nguë ineñ shi Nashian bi bi ma fo tempu,
no ineñ shi kumu ku bëbë ku ëli ta ëli tan lanta bi vida fo dantu nna nguë mölidu.
42 Se ëli manda no ba no pegua da pövu,
ku pa no da ineñ lazhan gavu fa ëli se sa nguë shi Nashian pë pa sa Jues da nna nguë vivu ku nna mölidu.
43 Ëli se sa nguë shi nna pantafala tudu da lazhan gavu,
pa nguë shi tudu këlë dëli,
valadji pa pada pekadu dëneñ amea namu dëli.
Spitu Santu bi liba utu nguë patadu
44 Ontolo Pudul bi ska fala ineñ sai,
se Spitu Santu ten bi liba nna nguë ineñ shi tudu bi sa ala ja tëndë shina ja sai.
45 Se nna namain ineñ shi ku ja gada kutumu kuta napai ku bi bai ku Pudul ala iai tudu gua ku böjö betu fa a shime liba nna nguë ku na sa judiof se ja gagavu Spitu Santu ten ta bi liba dëneñ.
46 Pakë ineñ bi ska tëndë amea shi ineñ ja faa utu fala pata patadu,
ku ineñ ja alaba Nashiolo.