Saulo, balë Djisu
9
Mandji se,
Saulo na chama faa ja ku pashian tëjantu ku nna balë Shiölö Djisuf,
amea shi pa ëli fo chila ineñ vida folof.
Dajantu shi,
se ëli ba deenchi jasa jasa padjil
2 se ëli pindji ëli jaata ku pödë valadji pa ëli ja be jadji jadji Nashian nna judio dji Damasko,
pa ëli ba jua nna nguë ineñ shi sa nguë Jamangandji,
dantu naamain ku napai,
pa ëli ma ineñ ba djili Jerusalen.
Hechos 9.1-19
3 Mandji se ta ëli bi ska da lome palea Damasko,
öshi öshi se uan fögö dösë ku ja chila blin se ludja ëli pë metadji.
4 Se ëli pono da san,
se ëli tëndë uan falagochi ku bi ska faa ëli:
—Saulo,
Saulo,
¿ja fë bo ska pëtëpë amu?
5 Se ëli pongota:
—¿Kë nguë sa bo,
Shiölö?
Se falagochi se kundji ëli:
—Amu se sa Djisu,
nguë shi bo ska pëtëpë.
6 Mandji lanta pa bo lantela dantu palea,
ala se a ske da bo lazhan jö shi ta pa bo fë.
7 Se mendu ma napai ineñ shi bi ska be ku Saulo tudu,
pakë ineñ bi ska tëndë fala,
mandji se ineñ na bi ska bë zhugan nguëf.
8 Tadashi se Saulo lanta fo san,
mandji se ta ëli ba bla öiö se ëli na bi paadji bë zhugan jaf.
Se amea sai se a fala ëli öma se a ma ëli ba Damasko.
9 Se ala se ëli bi sa tëishi djia sebu,
shin kumu ñi bëbë zhugan kuzhu.
10 Bi sa dantu Damasko uan balë Djisu ku a ja sama ëli Ananias,
ku se sa nguë shi Shiölö bi sama dantu uan suian:
—¡Ananias!
Se ëli kundji ëli:
“Amu sa iai,
Shiölö”.
11 Se Shiölö faa ëli:
—Lanta pa bo ba jadji Judas,
mete dölöluia shi a ja sama Dëtu,
se bo ja pongota kë nguë sa Saulo dji Tarso,
pakë ëli sa ala ja lezha,
12 se ëli bë dantu suian uan masebu ku a ja sama ëli Ananias,
ku lantela se pë öma liba dëli valadji pa ëli tan të vita.
13 Tadashi se Ananias kundji:
—Shiöla,
amu tëndë uan sapa kuzhu tëjantu ku masebu sai,
da ja fëfëiu ineñ shi ëli fë nna pövu santu bo dantu Jerusalen.
14 Se öseshi se ëli bi iai,
ku pödë nna jasa jasa padjil,
pa ëli bi të nna nguë ineñ shi ja lezha ku namu bo.
15 Mandji se Shiölö faa ëli:
—Bai,
pakë masebu se sa nguë ku amu ma pa ba da nna nguë na ja këlë Nashianf tudu lazhan namu amu,
nna alë ku a shime nna mina Israel.
16 Se amu ske msa ëli amea shi ëli ske ta pa ëli padësë monchi dajantu namu amu.
17 Tadashi se Ananias ten lantela ba jadji sai,
se ëli pë öma liba Saulo;
se ëli faa ëli:
«Namain amu Saulo,
Shiölö Djisu,
ku se sa nguë shi së bo ku supichi jamangandji iai,
manda amu bi valadji pa bo tan të vita ku pa bo ten të Spitu Santu».
18 Se öshi öshime se pono zhugan ja shimafan jama pishi fo öiö dëli,
se ëli tan të vita.
Se ëli lanta se a bachizha ëli.
19 Zha se ëli kumu se ëli tan ngaia foshi.
Hechos 9.19-32
Saulo sa Damasko ja pegua
Se Saulo mdja ala ku nna balë Djisu ineñ shi ja ta Damasko,
20 se öshi öshi se ëli jomesa ja pegua dantu jadji Nashian nna judio,
ja faa Djisu se sa Mina Nashiolo.
21 Se nna nguë ineñ shi bi ska tëndë ëli tudu ja mdja ku böjö betu,
se ineñ bi ska pongota:
—¿Nguë sai na se sa nguë shi bi sa Jerusalen ja pëtëpë nna nguë ineñ shi ja lezha ku namu se ua?
¿Se ëli na bi iai pa ëli bi të ineñ pa ëli ma ineñ ba da nna jasa jasa padjil ua?
22 Mandji se Saulo bi ska faa fala ku foshi mashi,
se nna judio ineñ shi sa Damasko tudu vla mbasadu,
amea shi ëli ska msa ineñ fa Djisu se sa Kilitu.
Saulo ska jölë da nna judio
23 *Se ta pasa uan sapa djia,
se nna judio tudu ku uan fala soso fa pa ineñ chila ëli vida folo,
24 mandji se Saulo ba tëndë mazhnamentu fëfëiu dëneñ.
Se ineñ bi ska ludjila böjö poto tela tudu djia ku nöchi valadji pa ineñ chila ëli vida folo.
25 Tadashi se nna balë ma ëli nöchi se ineñ da ëli ba basu dantu uan ojali fo uan fuladu ögö budu.
Saulo sa Jerusalen
26 Ta ëli ba da Jerusalen,
se ëli bi ngongo zhunta ku nna balë Djisu;
mandji se nguë tudu bi ska mendu ëli,
pakë ineñ na bi ska këlë fa anta vedadji ëli ten sa balë Djisuf.
27 Tadashi se Bernabe ma ëli a jasa dëli se ëli ma ëli ba deenchi nna apostol.
Se Saulo da ineñ lazhan amea shi ëli bë Shiölö Djisu jamangandji,
ku se bi faa ku ëli,
ku kë amea shi ëli dantu Damasko,
pegua namu Djisu ku valëntë.
28 Se ëli ten mdja ku ineñ,
se ëli bi ska ndanda ku ineñ jamian tudu dantu Jerusalen,
se ëli bi ska faa fala ku valëntë ku namu Shiölö.
29 Se ëli bi ska da lazhan ku ten ja të djisputa ku nna judio ineñ shi ja faa fala griego,
mandji se ineñ bi ska ngongo chila ëli vida folo.
30 Ta nna namain ba tëndë jö ineñ sai,
se ineñ ma Saulo ba palea Sesarea,
se fo ala se a da ëli ba Tarso.
31 Tadashi se guëzha tudu,
dantu loso loso Judea,
ku dji Galilea ku Samaria,
ba të padji,
se ineñ bi ska bibe ja da Shiölö ondolo.
Se ineñ bi ska be ja këësë ku namolo,
ku ja të foshi fo Spitu Santu.
Pudul kula Eneas
32 Se Pudul,
ku bi ska be ja pasa loso loso tudu,
se ëli ten ba ua nna santu santu ineñ shi ja ta loso Lida.
Hechos 9.32-43
33 Ala se ëli dajonta ku uan ojogo ku a ja sama Eneas,
ku bi sa ötu anu ku ëli sa liba jaama.
34 Se Pudul faa ëli:
—Eneas,
Djisukilitu kula bo,
lanta pa fo fë jaama bo.
Se öshi öshi se ëli lanta.
35 Se nna nguë ineñ shi bi ja ta Lida ku Saron tudu ten bi bë ëli,
se ineñ tudu këlë Shiölö Djisu.
Pudul lanta Dorkas fo dantu nna nguë mölë bebezha
36 Bi të dantu palea Jope uan balë Djisu ku a ja sama Tabita,
ku tukadu ba fala griego sa Dorkas.
Ëli bi ja bai ja fë fidu ja gagavu monchi ku ja zhuda nna puvili.
37 Se uan djia ineñ sai se danchi ma ëli se ëli mölë.
Se ta a laba ëli jaba,
se a pë ëli jochian shi liba.
38 Palea Jope bi sa peetu ku loso Lida,
jamian shi Pudul bi sa.
Se ta nna balë Djisu tëndë fa ëli sa ala,
se ineñ manda napai dösu pa ba luga ëli:
“Anta pulusensa,
bi Jope dandjian”.
39 Se Pudul ten lanta se ten be ku ineñ.
Ta ëli ba ala,
se a ma ëli ba jochian shi liba.
Se nna mainviva tudu,
bi ska sula,
ja msa ëli jaminzha ku bitidu ineñ shi Dorkas bi ska fë djia shi ontolo ëli bi sa ku ineñ.
40 Se Pudul fë pa jölë nguë tudu fo jochian;
zha se ëli dajözhöiö se ëli lezha.
Se ëli vla öiö da mochi,
se ëli faa:
—¡Tabita,
lanta!
Se ëli bla öiö,
se ta ëli bë Pudul se ëli fë ku öguë.
41 Se Pudul ma ëli öma,
se lanta ëli.
Zha se ëli sama nna santu ku nna mainviva,
se ëli msa ineñ vivu.
42 Se nova se panta panta jamian palea Jope tudu,
se uan sapa dji nguë këlë Shiölö.
43 Se Pudul mdja Jope uan böjö tempu,
jadji uan masebu ku a ja sama Shiman,
ku ja tabaia ku peli.