Se Saulo ska pëtëpë guëzha
8
Se Saulo bi sa ala,
ja da aen da mölë Taban.
Se djia se me,
se a sa fa ja pëtëpë guëzha shi sa Jerusalen,
se nguë tudu sa fa ja panta ba loso loso Judea,
ku dji Samaria,
mandji se nna apostol moso se mdja ala.
2 Se zhugan napai ku ja adola Nashiolo da Taban spitula se ineñ fë dödö ngandji dajantu dëli.
3 *Se Saulo sa fa ja fë nna nguë guëzha machi,
se ëli ja lantela fo jadji jadji,
ja sea naamain ku napai se ëli ja mëtë ineñ pë djili.
Pegua nova gavu Samaria
4 Mandji se nna nguë ineñ shi tudu panta panta sa fa ja pegua evanjelio ja sa jamian ineñ shi ineñ bi ska be tudu.
Hechos 8.4-25
5 Tadashi se Filipa dësë ba palea Samaria se ëli bi ska pegua nova Kilitu.
6 Se pövu bi ska zhunta pë mdjadu,
se nguë tudu bi ska tëndë Filipa ku olantena da palavulu shi ëli bi ska fala,
pakë ineñ ten bi ska bë shinali ja ngangandji ineñ shi ku ëli bi ska fë.
7 Se uan sapa pöjödölö se spitu fëfëiu bi ska së fo ineñ,
ja ta kidëlë;
se uan sapa ojogo ku nna nguë lezhadu tudu bi ska sa kuladu.
8 Dajantu shi se palea sai bi sa shia liguilia.
9 Mandji se ala bi sa ku uan masebu ku a ja sama ëli Shiman,
ku tudjia ëli bi ska fë öfia ja ngaña nna pövu Samaria,
ja fë shimafan ja ëli sa uan nguë dondolo.
10 Se nguë tudu,
fo nna nguë ineñ shi kichi kichi mashi ba toja nna nguë ngangandji tudu bi ska tëndë,
ja faa:
«Se sa nguë shi a ja sama “Pödë Ngandji Nashiolo”».
11 Se nguë tudu bi ska lë ëli,
pakë fo tempu löngö se ëli bi ska ngaña nguë ku pödë öfia dëli.
12 Mandji se ta ineñ këlë nova gavu shi Filipa bi ska pegua da ineñ tëjantu ku gövöndölö Nashiolo ku namu Djisukilitu,
se a bachizha naamain ku napai tudu.
13 A shime Shiman ten këlë se ta a bachizha ëli,
se ëli jomesa ja lë Filipa ba jamian tudu,
ja leva shinali ku ja ngangandji ineñ shi ku ëli bi ska bë.
14 Ta nna apostol ineñ shi ja ta Jerusalen ba tëndë fa,
nna nguë samaria ten këlë nova Nashiolo,
se ineñ manda Pudul ku Zhuan ba ala.
15 Ta ineñ ba da ala,
se ineñ lezha da nna balë Samaria valadji pa ineñ ten të Spitu Santu.
16 Pakë ontolo,
Spitu Santu na bi sa dësë bi liba zhugan ineñf,
ineñ bi sa bachizhadu ku namu Shiölö Djisu moso.
17 Tadashi se Pudul ku Zhuan bi ska pë öma liba dëneñ,
valadji pa Spitu Santu bi ska liba dëneñ.
18 Se ta Shiman,
ba bë fa,
ta nna apostol ja fala nguë ku öma se Spitu Santu ja liba dji nguë,
se ëli ba da ineñ djiëlu.
19 Se ëli faa ineñ:
—Namsëdji ten da amu pödë sai,
valadji pa ja sa nguë shi amu ja pë öma liba dëli ten ja të Spitu Santu.
20 Tadashi se Pudul faa ëli:
—Pa djiëlu bo pëndë bo,
pakë bo mazhna pa bo kumpa gagavu fo Nashiolo ku ëli ja da nguë ku djiëlu.
21 Bo na të pachi ñi suleta dantu jö sef,
pakë kusan bo na sa dëtu deenchi Nashianf.
22 Dajantu shi,
tan vla ku ope tashi fo ja fëfëiu bo ku pa bo luga Shiölö,
jativie ëli ja pada mazhnamentu kusan fëiu bo.
23 Pakë amu ska bë fa,
bo ska be jamangandji pashian ku sëlëva masan.
24 Tadashi se Shiman kundji ineñ:
—Namsëdji luga Shiölö da amu,
pa zhugan jö ineñ se namsëdji faa iai na bi liba amuf.
25 Zha se ta ineñ da pövu lazhan gavu ku pegua fala Shiölö,
se Pudul ku Zhuan tan vla jamangandji ba Jerusalen,
se ineñ ja be jamangandji ja pegua evanjelio dantu uan sapa loso loso nna nguë samaria.
Filipa ku uan masebu etiopia
26 Se uan anzhu Shiölö faa Filipa:
«Lanta pa bo ba bosai,
jamangandji fo Jerusalen ba Gaza»,
ku sa dantu uan jamian sölö sölö.
Hechos 8.26-40
27 Tadashi se Filipa ten lanta se ëli ten bai,
se jamangandji se ëli dajonta ku masebu ku sa nguë etiopia,
uan napai japadu.
Ku bi sa uan nna mötölö dondolo,
ku se bi sa ludjadölö djiëlu Kandese,
miela dalë nna nguë etiopia,
ku bi ba Jerusalen ba adola,
28 se ëli tan bi ska tela dëli zha,
se ëli bi ska tusan dantu ja jölësan javalu dëli ja lëë lavulu pantafala Isaias.
29 Se Spitu Santu faa Filipa:
«Iaba lome dëli pa bo zhunta pë ja jölësan javalu sai».
30 Se ta Filipa iaba lome ja jölësan javalu sai dandjian,
se ëli tëndë amea shi masebu etiopia se ska lëë lavulu pantafala Isaias,
se ëli pongota ëli:
—¿Bo ska tëndë jö shi bo ska lëë?
31 Se masebu etiopia se kundji Filipa:
—¿Jama fë amu ja fo tëndë,
öshi na ten zhugan nguë pa shina amuf?
Se ëli pindji ëli pë chinka bi liba pa ëli tusan lome dëli.
32 Pachi dantu Fa Nashian shi ëli bi ska lëë iai bi sa i sai:
«Shimafan uan jabala,
se a ma ëli ba mölë;
se shimafan uan mina jabala ku nguli fala
deenchi nna nguë ineñ shi ska kuta jabelu dëli
amea sai se ëli na ten bla böjöf.
33 Se ëli a fë ëli machi se a na fë djustishi ku ëlif.
¿Kë nguë ske paadji faa ja nna minadjimina dëli?
Pakë a chila vida dëli fo tela».
34 Se masebu etiope se,
pongota Filipa:
«Da amu lazhan,
anta pulusensa,
¿da kë nguë pantafala se ska faa jö sai:
döguë dëli me ö da utu dji nguë?».
35 Tadashi se Filipa,
jomesa fo jamian shi ëli bi ska lëë dantu Fa Nashiolo,
se ëli pegua nova gavu Djisu.
36 Se ta ineñ ska be jamangandji,
se ineñ ba da uan jamian ku të aua,
se masebu etiope se faa ëli:
«Iai të aua,
¿kë ja ku ja fo fë pa na bachizha amuf?».
37 Se Filipa faa ëli:
«Shi bo ja këlë ku kusan bo tudu,
bo paadji».
Se ëli kundji:
«Aen,
amu këlë fa Djisu se sa Mina Nashiolo».*+
38 Se ëli manda pa ineñ da pala ja jölësan javalu,
se ineñ dësë ba jamian shi bi të aua,
se Filipa bachizha ëli.