Pegua Taban deenchi Zhunta shi Ngandji
7
Se jasa jasa padjil pongota ëli:
—¿Jö ineñ shi a ska faa tëjantu ku bo iai tudu sa vedadji?
2 Se ëli kundji:
—Nna namain ku nna pai,
¡namsëdji tëndë amu!
Nashian shi sa ku gloria se së pai no Abraam ku supichi djia shi ontolo ëli bi ska ta Mesopotamia,
anta pa ëli ba Aran ba ta.
3 Se ëli faa ëli:
“Së fo tela bo ku nna nguë dantu jadji bo,
pa bo ba tela shi amu ske msa bo”.
4 Tadashi se Abraam së fo tela nna nguë kaldea se ëli ba ta Aran.
Se ta da tempu sai se pai dëli mölë,
se Nashian ma ëli bi tela sai,
ku namsëdji ska ta öseshi iai.
5 »Mandji se ëli na da ëli tela se pa sa gavu dëlif,
ñi uan jamian pa ëli pë opef,
mandji se ëli plomëtë fa ëli ske bi da ëli,
pa ta ëli ja mölë pa paadji sa ja nna minadjimina dëli,
öshi ontolo Abraam na bi sa ku zhugan ponodu minaf.
6 Se Nashian faa ëli amea sai:
“Nna minadjimina dëli tudu ske bibe shimafan zhenchi patadu dantu tela utu dji nguë,
se a ske fë ineñ sëlëva se a ske fë ineñ machi dantu sentu jatulu danu”.
7 Mandji,
se Nashian ten faa:
“Amu ske da tela ineñ shi ja fë ineñ sëlëva jatigu,
zha se ineñ ske së fo tela sala se ineñ ske bi shivi amu jamian sai”.
8 »Se Nashian fë ku Abraam bechi shi ku të shinali kuta nguë napai dji nguë.
Se dajantu shi,
se ta Abraam ja pali mina dëli Isaak,
se ëli kuta napai dëli ta da ötu djia jamian shi ku a pali ëli,
se fo Isaak ba toja Jakob,
se fo Jakob ba toja nna uan deshi ku dösu nna paipai tompu tompu.
9 »Se nna mina Jakob,
ku se bi sa nna paipai no,
ba të pashian namain dëneñ Sandzhe,
se ineñ vëndë ëli valadji pa ma ëli ba Ejipto.
Mandji se Nashian,
bi sa ku Sandzhe,
10 se ëli chila ëli fo dantu djisgalasa dëli tudu.
Se ëli da ëli tëndëmentu valadji pa ëli të föböli deenchi Faraon,
alë Ejipto,
ku se pë ëli pa ëli sa gövöndölö ejipto ku dantu jadji dëli tudu.
11 »Se tadashi se da uan fomu dantu tela Ejipto ku Kanan,
se bi ku uan sapa mavida,
se nna paipai no na bi të jö shi pa ineñ kumuf.
12 Mandji se ta Jakob ba tëndë fa Ejipto të tulugu,
se ëli manda nna paipai no ba ala pimëlu vadji.
13 Se ta ineñ tan bai ope shi fë dösu,
se Sandzhe fë pa nna namain dëli jönsë ëli,
se amea sai se faraon jönsë zhenchi shi sa dji Sandzhe.
14 Tadji mashi,
se Sandzhe da odji pa ma pai dëli Jakob ku nna nguë jadji ineñ tudu bi,
se ineñ bi sa deshi seta ku shinku pöjödölö ineñ se tudu.
15 Se amea sai se Jakob ba Ejipto ba ta,
se ala se ëli mölë,
ku nna paipai no tudu.
16 Se oso dëneñ tudu a ma ba Sikem se a pë dantu spitula shi Abraam bi kumpa ku uan fi djiëlu fo öma nna mina Jamor fo Sikem.
17 »Se ta bi ska da tempu shi pa Nashian kumpli jö ineñ shi ëli bi plomëtë Abraam ai,
se pövu Israel sa fa ja këësë monchi dantu Ejipto se ineñ vla fë uan möi.
18 Se ba toja ku lanta liba Ejipto uan alë patadu ku na jönsë Sandzhef.
19 Se alë se fë pövu no danadu se ten fë nna paipai no machi,
se ëli fë ineñ afoshi pa ineñ lega nna mina mongo mongo dëneñ pa tudu mölë.
20 »Dantu tempu se a pali Moises,
se ëli bi sa uan namina ku uan fumözhö patadu,
ku ngongo deenchi Nashiolo,
se a kia ëli ku tëishi mëdji dantu jadji pai dëli.
21 Mandji se ta a lega ëli ta pë ala,
se mina naamain faraon me,
se fë lazhan dëli shimafan mina döma dëli.
22 Se amea sai se a shina Moises jö ineñ shi ja të ku tëndëmentu nna nguë ejipto,
se ëli bi sa uan masebu ngandji ku palavulu ku fidu kuzhu.
23 »Se ta kumpli deshi danu jatulu,
se ëli sinchi dantu kusan dëli pa ëli ba ua nna namain dëli,
ku sa nna pövu Israel.
24 Mandji se ta ëli bë uan nguë ejipto ku bi ska fë uan nguë dëneñ machi,
se Moises se ba pezha da ëli,
se ëli fë djustishi ja chila masebu ejipto se vida folo.
25 Se Moises bi ska mazhna fa nna namain dëli bi ska tëndë fa amea dëli se Nashian ske fë pa ineñ sa legadu,
mandji se ineñ na bi ska tëndë shif.
26 »Ta da amaian shi,
se Moises dajonta ku nna nguë dösu ku bi ska pezha se,
ta ëli bi ngongo pë padji dantu ineñ,
se ëli faa ineñ:
“Namsëdji sa namain,
¿ja fë namsëdji ska da namsëdji me ku kuzhu?”.
27 »Mandji se nguë shi bi ska da pusumu dëli ku kuzhu ai pizha Moises,
se faa ëli:
“¿Kë nguë pë bo pa bo sa gövöndölö ku jues liba no?
28 ¿Jativie bo ten ngongo chila amu vida folo,
amea shi onte bo ten chila nguë ejipto vida folo?”.
29 Ta ëli tëndë ëli jö se,
se Moises jölë se ba tela Median.
Ala se ëli ja ta shimafan nguë utu tela patadu,
se ëli pali mina dösu.
30 »Ta pasa deshi danu jatulu,
dantu jamian sölö sölö,
lome iki Sinai,
se uan anzhu së ëli ku supichi dantu fögö fo alba sarsa ku bi ska dëdë.
31 Se Moises gua ku böjö betu da jö ineñ se ëli ska bë iai,
se ta ëli iaba ala valadji pa ëli bë gavu,
se ëli tëndë fala Shiölö,
ku faa ëli:
32 “Amu se sa Nashian nna paipai bo,
Nashian Abraam,
Isaak,
ku Jakob”.
Se Moises jomesa ja timbla da mendu,
se ëli na tan bi tividu piaf.
33 »Tadashi se Shiölö faa ëli:
“Chila ja mëtëpope,
pakë bo ska pope san tela santu.
34 Anta vedadji se amu bë amea shi pövu amu ku ja ta Ejipto ska ma mavida,
se amu tëndë fala djimi dëneñ,
se amu dësë pa amu bi chila ineñ fo basu nna nguë ejipto.
Öseshi,
bi pa amu manda bo ba Ejipto”.
35 »Moises se me,
ku ineñ bi jölë fo dantu dëneñ ja faa:
“¿Kë nguë pë bo pa bo sa gövöndölö ku jues liba no iai?”.
Se Nashian manda ëli bai shimafan gövöndölö ku nguë shi ske chila ineñ fo Ejipto,
amea pödë anzhu shi bi së ëli ku supichi fo dantu alba sarsa iai.
36 Se Moises chila nna paipai no fo Ejipto,
se ëli fë uan sapa ja ngangandji ku shinali dantu tela sala,
dantu Omali Böbö,
ku dantu jamian sölö sölö amea deshi danu jatulu.
37 »Se Moises sai se faa nna nguë Israel:
“Nashian ske lanta uan pantafala da namsëdji,
fo dantu tuludöguë nna namain namsëdji me,
shimafan amu,
namsëdji ske ja tëndë ëli”.
38 Se djia shi Israel bi sa zhuntadu dantu jamian sölö sölö,
bi sa Moises se me nguë shi bi sa metadji ta anzhu bi ska faa ku ëli liba iki Sinai ku nna paipai namsëdji,
ëli se sa nguë shi ma fala shi ku të vida pa ëli bi da no lazhan.
39 »Mandji se nna paipai no na bi ngongo tëndë ëlif,
shina se ineñ naga ëli,
se ineñ tan vlame ba Ejipto fo dantu kusan dëneñ.
40 Se ineñ faa Aaron:
“Ta pa bo fë zhugan nashian balu da no pa ja be deenchi no,
pakë Moises shi chila no fo tela Ejipto iai,
no na sëbë jö shi shiga ëlif”.
41 Tadashi se ineñ fë nashian balu ku sa shimafan mina kau,
se ineñ fë saklifisu da nashian balu sai se ineñ fë uan taba fesa pa da nashian balu se ineñ fë iai ondolo.
42 Dajantu shi,
se Nashian safa fo ineñ se ëli lega ineñ pa ineñ ja adola ntela dösë.
Mandji se amea sai se sa skividu dantu lavulu nna pantafala:
“Nna nguë jadji Israel,
¿öguë namsëdji fë saklifisu da amu ku kuzhu
dantu deshi danu jatulu dantu jamian sölö sölö?
43 Mandji se namsëdji fë jadji da nashian balu Molok,
ku ntëla nashian balu Refan,
ku öguë nashian balu ineñ shi namsëdji me
fë pa namsëdji ja da ilö.
Dajantu shi se ëli ske zhuga namsëdji
ba fundu Babilonia ba ta ala shimafan djili”.
44 »Nna paipai no bi të uan limada Nashiolo dantu jamian sölö sölö ku limada bechi Nashiolo,
ku a bi fë amea shi Nashian manda Moises pa ëli fë,
ta ëli bi faa ëli pa ëli fë amea shi ëli bi bë.
45 Nna paipai no ma jadji Nashiolo se shimafan uan gavu,
se nna nguë ineñ shi ku Josue ba iai se ma be ku ineñ ta ineñ ngana nna pövu tela tela ineñ shi bi sa öma nna namigu dëneñ,
ku Nashian chila ineñ fo deenchi dëli.
Se ala se bi sa ba toja djia alë David.
46 »Ku ëli bi të galasa deenchi Nashiolo,
se pindji pa ëli paadji lega ëli pa ëli fë uan jadji da Nashian Jakob.
47 Mandji se mina dëli alë Salomon se sa nguë shi fë jadji sai.
48 Se ten fë ku Nashian shi Atu mashi na ja ta jadji ku a ja fë ku öma nna pöjödölöf.
Amea shi pantafala faa:
49 “Ösë se sa töli amu
se san tela se sa jamian shi amu ja pë ope amu.
¿Kë klase jadji namsëdji ja fo fë da amu?,
se Shiölö faa:
¿a kë jamian djiskansa amu sa?
50 ¿Na sa öma amu se fë jö ineñ se tudu ua?”.
51 »¡Nna jasa lizhu,
kusan ödu ku ola lizhu!
Namsëdji tudu sa uan soso ku nna paipai namsëdji:
¡Olatuvëdji se namsëdji ja ska tanja ku Spitu Santu!
52 ¿A kë pantafala ineñ shi nna paipai namsëdji na bi pëtëpëf?
Ineñ se chila nna nguë ineñ shi bi pegua ta nguë shi Dëtu tan ske bi bi vida folo,
se öseshi se namsëdji vëndë ëli se namsëdji chila ëli vida folo,
53 namsëdji,
ku ma alë shi ku amea nna anzhu ku namsëdji na tëndëf».
Mölë Taban
54 Ta ineñ tëndë jö ineñ sai,
se mëtë ineñ pashian fo kusan dëneñ,
se ineñ bi ska kumu denchi tëjantu ku ëli.
55 Mandji se Taban,
ku bi sa shia ku Spitu Santu,
dëdë öiö dëli pë ösë se ëli bë gloria Nashiolo,
ku Djisu ku bi sa mdjadu benda dëtu Nashiolo.
56 Tadashi se ëli faa:
«Namsëdji pia,
amu ska bë ösë tudu betu,
ku Mina Napai Dösë mdjadu benda dëtu Nashiolo».
57 Mandji se ineñ sa fa ja ta kidëlë ku falagochi,
ja tapa olea dëneñ,
se ineñ tudu vaa ba liba dëli,
58 se ineñ chila ëli fo dantu palea se ineñ jomesa ja da ëli ku budu,
se nna nguë ineñ se tudu chila panu dëneñ pë deenchi uan namasebu ku a ja sama ëli Saulo.