Nna shividölö seta
6
Dantu djia ineñ sala,
se amea shi nna balë bi ska be ja këësë,
se nna judio ineñ shi ja faa fala griego bi ja të tavadji tëjantu ku nna nguë ineñ shi ja faa fala ebreo,
fa a na ja tëndë ku nna mainviva dëneñ gavu ola pachi manchimentu djia tuduf.
2 Tadashi se nna uan deshi ku dösu zhunta nna möi balë se ineñ faa ineñ:
«Na sa gavu pa no nna apostol lega pegua Fa Nashian pë pa no ska shivi mezhaf.
Hechos 6.1-7
3 Nna namain,
namsëdji ja jua dantu namsëdji me,
nna masebu seta ku a ja da lazhan gavu tëjantu ku ineñ,
pa ineñ ten sa shia ku pödë Spitu Santu ku tëndëmentu,
valadji pa ineñ ja fë sulvisu sai.
4 Pa amea se pa no nna apostol ja sa ku tempu pa no ja lezha ku fë sulvisu pegua nova Nashiolo».
5 Se jö sai faa gavu da möi nguë tudu,
se ineñ ma Taban,
uan masebu ku sa shia jonfa ku Spitu Santu,
se a ma Filipa,
ku Prokoro,
ku Nikanor,
ku Timon,
ku Parmenas,
ku Nikolas,
uan nguë antiokia ku bi vla fë judio.
6 Se a ma ineñ ba deenchi nna apostol,
se ineñ lezha da ineñ se ineñ pë öma öma liba dëneñ.
7 Se Fa Nashian sa fa ja panta panta,
se namolo nna balë sa fa ja këësë monchi dantu Jerusalen,
se uan sapa nna padjil tudu ten ba tëndë jonfa.
A ska të Taban
8 Se Taban,
uan masebu ku sa shia galasa ku pödë Nashiolo,
bi ska fë zhugan ja ngangandji ku shinali dantu pövu.
Hechos 6.8–8.3
9 Tadashi se lanta zhugan nguë dantu jadji Nashian nna judio ku a ja sama ineñ nna Sëlëva Legadu,
ku zhugan nna judio loso Sirene,
ku dji Alejandria,
ku Silisia ku nna nguë loso loso Asia,
jomesa ja të djisputa ku Taban.
10 Mandji se dajantu ku ineñ na bi paadji ku ëlif,
pakë ëli bi ska faa fala ku tëndëmentu shi Spitu Santu bi ska da ëli.
11 Tadashi se ineñ da utu nna nguë djiëlu pa mucha da ëli pa ineñ faa ineñ tëndë amea shi ëli bi ska faa fala zhogoveadu tëjantu ku Moises ku tëjantu ku Nashiolo.
12 Se amea sai se ineñ lanta pövu,
ku nna jasa jasa pövu ku nna meeth dalë,
se ineñ da ba liba dëli se ineñ të Taban se ineñ ma ëli pa deenchi Zhunta shi Ngandji.
13 Se ineñ ma zhugan nguë pa da fanchila,
se ineñ bi ska faa:
—Masebu se na sa chama faa fala zhogoveadu ku jadji santu sai ku alë Moises ie zhaf.
14 No tëndë ëli faa Djisu Nasaret ske të jadji Nashiolo të lolo,
pa ëli ten tuka kutumu shi Moises gua pë da no iai.
15 Se ta nna nguë ineñ shi tudu bi ska tusan dantu Zhunta shi Ngandji ba ku öiö ba pia Taban,
se ineñ bë fesan dëli shimafan sa dji uan anzhu.