Pudul ku Zhuan sa deenchi Zhunta shi Ngandji
4
Ontolo Pudul ku Zhuan bi ska faa ku pövu,
se bi lome dëneñ nna jasa jasa padjil ku jatan guada jadji Nashiolo ku nna saduseo.
2 Ja bi ska mëtë ineñ pashian pakë Pudul ku Zhuan bi ska shina pövu kuzhu ja pegua ja faa nguë mölë bebezha tan ske lanta bi vida,
amea shi Djisu tan lanta bi vida.
Hechos 4.1-31
3 Tadashi se ineñ të Pudul ku Zhuan se,
dajantu ku nöchi bi ska ma bebezha,
se a mëtë ineñ pë djili ba toja amaian shi.
4 Mandji se uan sapa nna nguë ineñ shi tëndë nova ba këlë,
se namolo nna nguë ineñ shi,
ja jonta napai moso,
se bi sa milidji shinku.
5 Ta da amaian shi,
se nna gövöndölö ku nna jasa jasa pövu ku nna meeth dalë të uan zhunta Jerusalen.
6 Se ala bi sa ku jasa jasa padjil Anas,
ku Kaifas,
ku Zhuan,
ku Alejandro ku utu nna nguë zhenchi jadji jasa padjil.
7 Se ineñ fë pa ma Pudul ku Zhuan ba deenchi dëneñ se ineñ pongota ineñ:
—¿Ku kë pödë,
ö ku namu kë nguë,
namsëdji fë jö sai?
8 Tadashi se Pudul,
shia ku Spitu Santu,
kundji ineñ:
—Nna gövöndölö pövu ku nna jasa jasa pövu.
9 Ödjai se a ska juzhga no tëjantu ku uan ja gavu ku no fë ku uan ojogo,
¡se a ja pongota no kë amea shi a kula ëli!
10 Ta pa namsëdji ku pövu Israel tudu sëbë fa masebu se sa deenchi namsëdji iai,
ëli sa kuladu dezhupaga ku namu Djisukilitu Nasaret,
nguë shi namsëdji da pë kusu iai,
mandji se Nashian tan lanta ëli bi vida.
11 Djisukilitu se sa:
“Budu shi namsëdji nna nguë fë jadji zhuga ta iai,
se ba vla fë jasa budu”.
12 Se na të zhugan utu nguë ku të savasan,
pakë na të basu dösë utu namu ku a da nna pöjödölö ku amea dëli se no ja paadji sa savaduf».
13 Tadashi ku nna gövöndölö bë amea shi Pudul ku Zhuan bi ska faa fala ku valëntë,
ku ineñ ba sëbë fa ineñ bi sa nna nguë shin latela,
shin vadu,
se ineñ gua ku böjö betu se ineñ ba jönsë fa ineñ bi bi ta ku Djisu.
14 Vlame,
ta ineñ bë fa masebu shi a kula ie ten bi sa ala ku ineñ,
se ineñ na tan bi të ja pa ineñ faaf.
15 Dajantu shi se ineñ da odji pa chila ineñ fo dantu Zhunta shi Ngandji ba öluia,
se ineñ mdja ja pufia ku ineñ ineñ me.
16 Ja faa:
«¿Kë ja no ske fë ku nna napai ineñ sai?
Pakë sa vedadji fa amea dëneñ se taba shinali ja shiga ku a ja bë;
se nna nguë ineñ shi ja ta Jerusalen tudu sëbë,
se no na paadji nagaf.
17 Mandji,
se pa no pota pa jö sai na ja bai ja panta panta dantu pövu,
no ske faa ineñ kuzhu,
valadji pa ineñ na tan faa namu sai ku zhugan nguëf».
18 Se ineñ sama ineñ se ineñ da ineñ odji pa ineñ chama ja faa fala ku shina nguë ja tëjantu ku namu Djisu.
19 Mandji se Pudul ku Zhuan kundji ineñ ja faa:
«¿Sa dëtu deenchi Nashian pa no tëndë namsëdji mashi ku ëli?
¡Juzhga tuludöguë namsëdji!
20 No na paadji chama faa jö ineñ shi no bë ku no tëndëf».
21 Se ta ineñ tan lonja öiö da ineñ,
se ineñ lega ineñ bai.
Dajantu nna pövu,
se ineñ na tan bë amea shi pa ineñ jatiga ineñf:
nna nguë tudu bi ska da Nashian ilö dajantu jö ineñ shi shiga iai,
22 pakë masebu shi a kula iai amea shinali sa iai bi sa ku mashi ku deshi danu jatulu.
Nna balë Djisu ska lezha da Nashiolo
23 Se ta a lega ineñ,
se Pudul ku Zhuan tan vla ba toja nna nguë dëneñ se ineñ da ineñ lazhan jö ineñ shi shiga ineñ tudu ku nna jasa jasa padjil ku nna jasa jasa pövu.
24 Se ta ineñ tëndë,
se ineñ lanta fala ba van ku lezha da Nashiolo,
ja faa:
«Shiölö shi ja fë ja tudu,
ku se mindji ösë ku tela,
ku omali ku jö ineñ shi sa dantu dëneñ tudu,
25 bo,
amea Spitu Santu,
se bi faa fo böjö pai no David,
shividölö bo:
“¿Ja fë nna nguë na ja këlë Nashianf ja të tavadji?
¿Ja fë ineñ ja mazhna ja shipë shipë?
26 Nna alë san tela ja fë vadu pa ba pezha
se nna gövöndölö ja zhunta fë uan soso
tëjantu ku Shiölö
ku tëjantu ku Kilitu”.
27 *»Pakë anta vedadji se ineñ zhunta dantu palea sai tëjantu ku shividölö santu bo,
Djisu,
ku se sa nguë shi bo ma,
se Erodes ku Ponsio Pilatu zhunta,
ku nna nguë na ja këlë Nashianf ku pövu Israel.
28 Valadji pa ineñ fë jö shi fo tempu baezha ku pödë bo ku vintadji bo se bo ska mazhna pa shiga iai.
29 Öseshi,
Shiölö,
pa bo ma jö ineñ shi ineñ ska faa no ku pa bo da nna shividölö bo tëndëmentu pa ja pegua fala bo shin zhugan mendu.
30 Dajantu shi,
pa bo tezha öma bo valadji pa kula ku pa fë shinali ku ja ngangandji amea namu shividölö santu bo Djisu».
31 Se ta ineñ lezha jaba,
se jamian shi ineñ bi sa zhuntadu iai sugudji,
se Spitu Santu bi liba nguë tudu,
se ineñ tudu sa fa ja pegua Fa Nashian shin zhugan mendu.
Tadu vida nna balë Djisu
32 *Se nna nguë ineñ shi këlë tudu bi sa ku uan kusan ku uan alma soso.
Se ineñ na bi ska fë shiölö zhugan gagavuf,
shina ineñ bi ska pachi ja tudu.
Hechos 4.32–5.14
33 Se nna apostol,
ku pödë ngandji ku bi ska da ineñ lazhan gavu amea shi Shiölö Djisu tan lanta bi vida.
Se galasa Nashian bi ska buka pë liba dëneñ batanchi,
34 se amea sai se na bi të zhugan nguë ku dishamentu dantu dëneñf.
Ja sa nguë shi bi të uan gagavu ö jadji,
ku matu ta ëli ja vëndë,
se ëli ja bi ku djiëlu shi ëli vëndë,
35 se a ja ma ba da nna apostol valadji pa ineñ se pachi nguë tudu amea dishamentu dji nguë.