Pudul kula uan ojogo
3
Uan djia se Pudul ku Zhuan subili ba jadji Nashian ba lezha ola la tëishi tadji.
2 Se lome jobo poto shi a ja sama Fumözhö bi sa ku uan masebu ku sa ojogo fo djia shi a pali ëli,
se a ja pë ëli djia tudu böjö poto lome jadji Nashiolo,
valadji pa ëli ja paadji pindji nna nguë ja ska lantela jadji Nashiolo ie djimolo.
Hechos 3.1-26
4 Se Pudul,
ku Zhuan,
pia ëli gavu,
se ëli faa ëli:
«¡Pia no!».
5 Tadashi se masebu ten vla öiö pia ineñ gavu,
ja gada pa nna nguë ineñ se da ëli uan kuzhu.
6 Mandji se Pudul faa ëli:
«Amu na të plata ñi orof,
mandji se jö shi amu të se amu ske da bo:
A namu Djisukilitu Nasaret,
¡lanta pa bo nda!».
7 Se Pudul fala ëli öma dëtu,
se lanta ëli.
Se öshi öshime se ope dëli ku fisu dope dëli ma foshi.
8 Se masebu ojogo se tava se ta mdjadu se ëli jomesa ja nda.
Zha se ëli lantela ku ineñ ba jadji Nashiolo ku maian ope dëli,
ja tava ja alaba Nashiolo.
9 Ta pövu tudu bë ëli ja nda ku ja alaba Nashiolo,
10 se nguë tudu bi jönsë ëli shimafan masebu shi ja pindji nguë pa chila ëli djimolo ku ja tusan deenchi böjö poto jadji Nashiolo shi ku a ja sama Fumözhö,
ineñ mdja ku böjö betu ku sombela da jö shi shiga ëli iai.
Pudul ska pegua deenchi poto jadji Nashiolo
11 Se masebu se na lega Pudul ku Zhuan zhugan vëdjif,
se nguë tudu gua ku böjö betu ja lë ineñ tashi ba toja jamian shi a ja sama Poto Salomon.
12 Se ta ëli bë jö sai,
se Pudul faa ineñ:
«Pövu Israel,
¿ja fë namsëdji ska gua ku böjö betu da jö se shiga iai ie?
¿Ja fë namsëdji ska pia no shimafan ja,
ku pödë shi sa ku no ku amea adola Nashian shi sa ku no,
se no fë pa masebu sai nda?
13 Nashian Abraam,
Nashian Isaak ku Nashian Jakob,
Nashian nna paipai no,
se da shividölö dëli Djisu gloria shi ngandji mashi.
Se namsëdji ma ëli ba da Pilatu se namsëdji me naga ëli,
benga pa ëli bi mazhna bebezha pa ëli sota ëli.
14 *Mandji se namsëdji naga nguë shi Santu ku sa Dëtu,
se namsëdji pindji pa sota uan nguë chila nguë vida folo.
15 Se amea sai se namsëdji chila vida fo nguë shi bi da nguë vida,
mandji se Nashian tan lanta ëli bi vida fo mölë,
ja ku no ja fo da lazhan gavu.
16 »Se amea jonfa ku namu Djisu,
se ëli tan pë masebu sai mdjadu ku namsëdji tudu jönsë ku ska bë iai.
Se jonfa shi a ja të ku pödë amea Djisu se kula ëli ntëlelele,
shimafan amea se namsëdji ska bë iai.
17 »Mandji öseshi,
nna namain,
amu sëbë fa namsëdji ku nna jasa jasa namsëdji na bi sëbë jö shi namsëdji bi ska fëf.
18 Mandji se Nashian kumpli jö ineñ se tudu amea shi ëli bi da lazhan ku böjö nna Pantafala dëli:
fa Kilitu dëli bi ske ta pa ëli padësë.
19 Dajantu shi,
valadji pa limpa pekadu namsëdji tudu,
pa namsëdji tan vla ku ope tashi.
20 Tadashi se ske bi tempu djiskansa fo pachi Shiölö,
se a ske da Kilitu bi da namsëdji ku se a bi fë vadu pë da namsëdji bebezha,
ku se sa Djisu.
21 Mandji se ske fata pa Djisu mdja ösë ba toja tempu shi a tan ske jözhë ja tudu pë,
amea shi Nashian bi faa fo tompu tompu amea nna santu santu pantafala.
22 Moises bi faa:
“Shiölö shi sa Nashian namsëdji ske lanta uan Pantafala dantu nna namain namsëdji shimafan amu,
namsëdji ja tëndë jö ineñ shi ku ëli ja faa namsëdji tudu.
23 Pakë nguë shi na ja tëndë jö shi Pantafala ja faaf a ske limpa ëli fo dantu pövu.”
24 »Se sa amea shi,
fo Samuel be deenchi nna pantafala tudu da lazhan djia ineñ sai.
25 Namsëdji,
se sa nna mina nna pantafala,
ku dji bechi shi Nashian bi fë ku nna paipai no ta ëli bi faa Abraam:
“Tela tela mundu sai tudu ske të besa tëjantu nna minadjimina bo”.
26 Ta Nashian tan lanta shividölö dëli bi vida fo mölë,
se ëli manda ëli bi da namsëdji pimëlu valadji pa ëli da namsëdji besa pa nguë tudu tan vla fo ja fëfëiu namsëdji».