Spitu Santu bi liba nna nguë ineñ ku këlë Djisu
2
Se ta da djia fesa Pentekostes,
se nna balë Djisu tudu bi sa zhuntadu pë uan jamian soso.
2 Öshi öshi,
se fo ösë,
se ineñ tudu tëndë uan tomenta shimafan dji uan oventu ödu ku bi ska föfö,
se shia dantu jadji shi ineñ bi sa zhuntadu.
Hechos 2.1-13
3 Se së ineñ ku supichi zhugan lunga shimafan bazha fögö,
se tudu pachi pachi se baba pë liba unian unian ineñ.
4 Se ineñ tudu vla shia Spitu Santu,
se ineñ jomesa ja faa fala pata patadu amea shi Spitu bi ska da ineñ pa ineñ fala.
5 Bi ska ta Jerusalen nna judio dondolo,
ku tudu së fo tela tela ineñ shi sa basu dösë tudu.
6 Se ta gudu gudu ngandji se da,
se fë se nguë tudu zhunta pë ala ku böjö betu,
pakë nguë tudu bi ska tëndë a ska faa tuludöguë fala tela dëneñ.
7 Se ineñ tudu mdja sombadu ku böjö betu,
ja faa:
«¿Nna nguë ineñ se ska faa fala tudu na sa nguë galilea ua?
8 ¿Jama fë,
no tudu ska tëndë ineñ ja faa fala tela no?
9 Nna nguë partia,
ku nna nguë media,
ku nna nguë elam,
ku nna nguë ineñ shi ja ta Mesopotamia,
Judea,
Kapadosia,
Ponto ku Asia,
10 Frigia,
Panfilia,
Ejipto,
nna nguë loso loso Libia ja ska bai Sirene,
nna nguë fo Roma ineñ shi ja ta iai,
11 nna judio ku nna nguë ineñ shi ja vla fë judio,
nna nguë ië Kreta ku nna nguë tela Arabia,
se amea shime no ska tëndë ineñ ja faa no ja fumözhö fumözhö Nashiolo».
12 Se ineñ tudu mdja ala sombadu ku böjö betu,
ja faa ineñ ineñ me:
«¿Kë amea shi a ja tëndë jö sai?».
13 Mandji se zhugan nguë,
ska li ineñ,
ja faa:
«¡Ineñ sa bedadu!».
Pegua Pudul
14 Tadashi se Pudul ku nna deshi ku unian ta mdjadu,
se ëli lanta fala ba van se ëli faa:
«Nna napai judio ku nna nguë ineñ shi tudu ja ta Jerusalen,
namsëdji lega amu pa amu da namsëdji lazhan jö shi ska shiga iai,
namsëdji folapë jö ineñ shi amu ske faa namsëdji.
Hechos 2.14-47
15 Nna nguë ineñ sai na sa bedadu amea se namsëdji ska mazhna ief.
¡Pakë ontolo se ska da la novu pamasedu olo!
16 Pakë jö ineñ sai se sa jö ineñ shi pantafala Joel bi faa:
17 Se Nashian faa:
“Ta ske da jabamentu djia,
amu ske ta Spitu amu pë liba nna pöjödölö tudu.
Se nna mina napai ku nna mina naamain namsëdji ske ja pantafala,
se nna mashivin napai ske ja bë kuzhu,
se napai veiu ske ja të suian.
18 Se dantu djia ineñ sa ala,
amu ske ta Spitu amu pë
liba nna shividölö amu napai ku nna shividölö amu naamain
se ineñ ske pantafala.
19 Se amu ske msa shinali ja ngangandji amu liba dösë ku san tela,
ku sangui,
fögö ku növu növu igögö.
20 Se solo ske vla kulu kulu,
se önuian ske vla shimafan sangui,
anta pa bi djia ngandji Shiölö,
djia ngandji ku gloria.
21 Se ja sa nguë shi tudu ja lezha ku namu Shiölö ske të savasan”.
22 »Pövu Israel,
namsëdji tëndë jö ineñ sai:
Djisu Nasaret bi sa napai ku të pödë fo Nashiolo deenchi namsëdji ku ja ngangandji,
ku shinali ku fidu ja gagavu dëli,
ku Nashian fë dantu namsëdji amea dëli,
amea shi namsëdji sëbë gavu.
23 *Se a të masebu sai amea shi Nashian bi sëbë ja tudu ku amea fidu ja dëli;
se,
amea nna nguë malvadu,
se namsëdji chila ëli vida folo,
se namsëdji da ëli kusu.
24 *Mandji se Nashian tan lanta ëli fo mölë,
se fë pa ëli sa legadu fo duadu mölë,
pakë mölë na paadji fë pa mölë mala ëli pë sanf.
25 Se fë,
alë David faa tëjantu ku ëli:
“Amu bi bë Shiölö olatuvëdji deenchi amu,
pakë ëli sa benda dëtu amu.
Valadji pa ëli na ponof.
26 Dajantu shi se kusan amu sa ku liguilia,
se lunga amu ja janta ku moga,
se öguë amu ten ske bibe ku alagada.
27 Pakë bo na ske lega alma amu dantu Adesf,
ñi bo na ske lega pa Santu bo poto potof.
28 Se bo fë se amu jönsë jamangandji vida,
se bo ske shia amu ku liguilia deenchi bo”.
29 »Nna namain,
lega pa amu faa namsëdji ku kusan betu tëjantu ku paipai no David,
ku mölë ku a da ëli spitula,
ku spitula dëli sa dantu no bi toja ödjai djia.
30 Mandji se David bi sa pantafala se ëli ten bi sëbë fa,
Nashian bi plomëtë ëli basu julamentu fa ëli ske pë liba töli uan nna minadjimina dëli.
31 Se sa amea shi ku ëli bë jö ineñ shi bi ske shiga.
Tëjantu ku amea shi Kilitu tan ske lanta bi vida,
se a na lega ëli pë dantu Adesf,
ñi pa öguë dëli poto potof.
32 »Se Djisu sai,
se Nashian tan lanta ëli bi vida fo mölë,
se da jö sai no tudu ja fo da lazhan.
33 Se fë,
ku a lanta ëli ba van se ëli tusan benda dëtu Nashiolo,
se amea sai se ëli ma Spitu Santu shi Pai bi plomëtë iai,
se ëli ta jö sai ku namsëdji ska bë öseshi ku a ska tëndë iai.
34 Pakë David na subili ba ösëf,
mandji se ëli faa:
“Se Shiölö se faa Shiölö amu:
‘Tusan benda dëtu amu,
35 ba toja pa amu pë nna namigu bo basu dope bo’”.
36 »Ta pa,
namsëdji sëbë shishizhu nna nguë Israel tudu fa Djisu,
ku namsëdji da pë kusu,
¡se Nashian fë ëli Shiölö ku Kilitu!».
37 Se ta ineñ tëndë jö sai,
se ineñ tudu sinchi dantu kusan dëneñ se ineñ faa Pudul ku nna apostol:
—Nna namain,
¿kë ja ta pa no fë?
38 Se Pudul faa ineñ:
—Namsëdji tan vla ku ope tashi pa namsëdji tudu bachizha a namu Djisukilitu valadji pa pada pekadu namsëdji,
zha pa da namsëdji gagavu Spitu Santu.
39 Pakë plomesa sai sa ja a da namsëdji,
ku da nna mina namsëdji,
ku ten sa ja a da nna nguë tela pata patadu,
ku da nna nguë ineñ shi Shiölö no Nashiolo ja ngongo sama.
40 Se ku utu fala mashi se ëli ja da ineñ lazhan gavu se ëli ten ja da ineñ shizhu gagavu ja faa ineñ:
«¡Namsëdji sava fo zhenchi fë ja fëfëiu ineñ sai!».
41 Se fë,
se a ten bachizha nna nguë ineñ shi këlë nova sai,
se djia sai bi sa ku milidji tëishi pöjödölö se tudu tan ba zhunta ku nna nguë guëzha.
42 Se ineñ bi ska ta dëtu ku jö ineñ shi nna apostol bi ska shina ineñ,
se ineñ bi ska sa zhuntadu,
ku ola pachi ampan ku ola lezha.
Tadu nna pimëlu pimëlu kitan
43 Se nguë tudu bi ska sombela ku böjö betu dajantu sapa shinali ku ja ngangandji ineñ shi ku nna apostol bi ska fë.
44 *Se nna nguë ineñ shi ja këlë tudu bi sa zhuntadu,
se ja tudu bi sa ja nguë tudu:
45 se ineñ bi ska vëndë gagavu dëneñ ku jö ineñ shi sa ja dëneñ,
se ineñ ten bi ska zhunta pachi gagavu dëneñ amea dishamentu dëneñ.
46 Se ineñ na bi chama zhunta djia tudu öluia jadji Nashiolof,
se ineñ bi ska bai jadji jadji ja pachi ampan ku ja pachi kumu zhuntadu ku liguilia ku kusan legadu,
47 ja da Nashian ilö se ineñ bi sa föböli ku pövu tudu.
Se djia tudu se Shiölö bi ska fë pa ineñ ja këësë dantu uachi nna nguë ineñ shi bi ske sa savadu.