LAVULU FIDU KUZHU NNA APOSTOL
Nashian ske da Spitu Santu bi da ineñ
1
*Dantu pimëlu lavulu amu,
ö pai shiölö Teofilo,
amu skëvë da bo tëjantu ku jö ineñ shi Djisu fë ku ëli ten shina nguë fo jomesadu,
2 ba toja djia shi ku ma ëli ba ösë,
öshi ëli da nna apostol ineñ shi ëli bi ma iai mandamentu amea Spitu Santu.
Hechos - introducción
3 Se ta ëli padësë mölë se ëli tan msa öguë dëli ja da ineñ uan sapa puva fa ëli sa vivu.
Dantu deshi jatulu djia se ëli së ineñ ku supichi ja faa ineñ ja tëjantu ku gövöndölö Nashiolo.
4 *Uan djia,
öshi ëli bi ska kumu ku ineñ,
se ëli da ineñ odji:
«Namsëdji na ba löndji fo Jerusalenf,
shina namsëdji ja gada jö shi Pai amu plomëtë namsëdji iai,
ku se sa jö shi amu bi faa namsëdji bebezha.
5 *Pakë anta vedadji ku Zhuan bachizha ku aua,
mandji se dantu zhugan pono djia a ske bachizha namsëdji ku Spitu Santu».
Hechos 1.1-11
Djisu subili ba ösë
6 Tadashi se nna nguë ineñ shi bi sa zhuntadu ku ëli iai,
se pongota ëli:
—Shiöla,
¿bo ske lanta gövöndölö Israel tempu sai?
7 Se Djisu kundji ineñ:
—Jö sai na të ku namsëdji pa jönsë ola shifa ö tempu shif,
ku Pai lega pë basu pödë dëli moso.
8 *Mandji se ta Spitu Santu ske bi liba namsëdji,
se namsëdji ske të pödë pa namsëdji së ba da lazhan gavu amu fo Jerusalen,
ku loso loso Judea tudu ku Samaria,
ba toja ponto ponto jabamentu tela.
9 *Se ta ëli faa jö se jaba,
öshi ontolo ineñ ska pia ëli,
se a lanta ëli ba van,
se uan növu tapa ëli fo öiö dëneñ.
10 Se ineñ mdja ja pia ösë moso öshi ëli bi ska be ja pëndë ineñ öiö.
Moso se,
napai dösu ku bitidu banku iaba lome dëneñ,
11 se faa ineñ:
«Nna napai Galilea,
¿ja fë namsëdji ska pia ösë?
Tuludöguë Djisu sai,
ku a ma fo dantu namsëdji ba ösë iai,
se ëli tan ske vlame bi amea shi namsëdji bë ëli ja bai iai».
Matias se a ma jamian Judas
12 Tadashi se ineñ tan vla Jerusalen fo iki shi a ja sama iki Olivos,
ku sa lome palea amea jamangandji uan dji djiskansa.*+
Hechos 1.12-26
Pudul,
Zhuan,
Sanchagu,
Andëlë,
Filipa,
Tomashi,
Bartolome,
Matë,
Sanchagu mina Alfeo,
Shiman nguë shi sa Selote,
Judas mina Sanchagu.
14 Se ineñ tudu,
dantu spitu shime,
se ineñ bi ska zhunta olatuvëdji ja lezha ku ja luga,
zhuntadu ku nna naamain,
ku Malia,
main Djisu,
ku nna namain dëli tudu.
15 Dantu djia ineñ sala se Pudul ta mdjadu metadji nna namain tudu,
se bi sa vala uan sentu ku vinta pöjödölö,
se ëli faa ineñ:
16 «Nna namain,
bi fë fata pa kumpli Fa Nashiolo amea shi Spitu Santu bi faa bebezha amea böjö alë David tëjantu ku Judas,
ku se ma nna nguë ineñ shi fo të Djisu.
17 Judas bi sa uan nguë no,
se ëli ten bi sa ku pachi sulvisu dëli dantu no».
18 *(Ku djiëlu sai se ëli kumpa uan san ku pagu masan dëli,
ala se ëli pono da san ku jasa,
se ëli labenta fë dösu,
se lasu chipa dëli tudu së bi öluia.
19 Se nna nguë dantu Jerusalen tëndë jö sai,
se fo djia sai se ja sama jamian sai Aseldama,
ku fala tela dëli ja faa:
«Matu Sangui»).
20 Se Pudul ontolo ëli bi ska faa:
«Pakë dantu lavulu Salmos sa skividu fa:
“Pa jadji dëli sa dödji,
ku pa zhugan nguë na ba ta alaf”.
»A shime:
“Pa uan nguë ma jamian tabaia dëli”.
21 *»Tadashi,
fë fata pa uan napai ineñ se ku lë no fo tempu shi Shiölö Djisu bi sa dantu no,
22 fo djia shi Zhuan bi ska bachizha nguë,
ba toja ku Djisu subili ba ösë.
Ske fë fata,
pa ma uan ineñ bi dantu no,
valadji pa no zhunta pa no paadji da lazhan gavu fa Djisu tan lanta bi vida».
23 Tadashi se ineñ msa nguë dösu:
ku sa Sandzhe,
ku a ten ja sama ëli Barsabas,
ku namu jadji dëli sa «Justo»,
ku Matias.
24 Se ineñ lezha amea sai:
«Shiöla,
bo se jönsë kusan nguë tudu,
msa no nguë shi ku bo ma dantu nguë dösu ineñ sai,
25 valadji pa ëli fo fë sulvisu apostol shi ku Judas lega pë valadji pa ëli ba jamian shi ku ëli mësë iai».
26 Tadashi se ineñ jua suleta,
se suleta pono da Matias,
se a ten jonta ëli dantu uan deshi ku unian nna apostol.