Lukas ku se sa skëvëdölö lavulu sai ku, ku a shime evanjelio dëli, sa ja ku ëli ten skëvë ba da jamada dëli Teofilo, dajantu vintadji shi bi sa ku ëli pa ëli da ëli lazhan ja tudu tëjantu ku Djisukilitu (1:1; lëë Luk 1:1-4).

Fo maian jomesadu, se Lukas ja limian Spitu Santu, ëli ja fë pa ja lambela nna balë jö shi Djisu bi plomëtë ineñ iai: Nashian ske da Spitu Santu bi, se ëli ske shia ineñ ku pödë (1:5-8). Dajantu shi se a ja paadji fo sa suguladu fa pöjödölö shi sa metadji lavulu sai sa Spitu Santu. Se fo djia Pentekostes, se Spitu Santu bi se të zhugan nna balë ku bi sa nna nguë ja mendu kuzhu të vla nna peguadölö valëntë tëjantu ku ta Djisu tan lanta bi vida (2:1-47). Se a shime ëli ten da ineñ pödë valadji pa ineñ ja kula nguë (3:1-10; 5:12-16). Vlame, Spitu Santu ja fë pa nna balë ja tëndë uan ja ngandji: evanjelio Djisukilitu na sa ja nna judio mosof, shina da nna naamain ku napai mundu sai, ineñ sa judio ö ineñ na ja saf (10:1-48).

Fidu ja Spitu Santu a ja bë bababa amea shi vida Saulo dji Tarso, uan masebu judio ku bi jönsë Biblia mandji ku na bi jönsë Djisuf. Ta nna pimëlu pimëlu kitan jomesa ja panta panta dantu Jerusalen ku lome lome dëli, se Saulo ba këlë fa dëtu dëli shimafan uan judio bi sa pa ëli pëtëpë nna kitan ku pa ëli jaba ku ineñ (8:1-2; 9:1-2). Mandji se uan djia ta ëli bi ska Damasko, se uan ja fumözhö shiga: ¡se ëli dajonta ku tuludöguë Djisu! (9:3-6). Se fo tempu sai, se vida Saulo, ba toja namu dëli tudu tuka ntëlelele: se ëli lega namu Saulo pë valadji pa ëli vla fë apostol Pelavöl, ku se sa nguë shi ngandji mashi ku panta fala Nashiolo dantu soia guëzha kitan.

Pelavöl fë vadji jatulu dantu uan sapa palea ineñ shi sa dantu gövöndölö roma, ba toja tuludöguë Roma, palea shi ngandji mashi. Dantu vadji ineñ sai ëli be ku jamada kilidu dëli Bernabe ku uan mashivin ku a ja sama Timoteo. Zhugan vëdji Lukas ku se skëvë lavulu sai, bi ja be ku ëli (16:10-17; 20:5-16; 21:1-18; 27:1–28:15).

Lavulu sai ja jaba ja faa fala tëjantu ku vida Pelavöl dantu palea Roma, ja faa ja tëjantu ku ëli fa ëli na mendu zhugan djia pa ëli faa ja tëjantu ku gövöndölö Nashianf, ñi ku shina kuzhu tëjantu ku Shiölö Djisu, ku se sa Kilituf, se ñi zhugan nguë na bi tividu pa pë ëli topuf (28:31).