Djisu së nna balë dëli seta ku supichi
21
Ta jö ineñ se pasa,
se Djisu tan vlame së nna balë dëli ku supichi,
bodo domali Tiberias.
Jö sai shiga amea sai:
2 Ineñ bi sa ala zhuntadu Shiman Pudul,
Tomashi nguë shi a ja sama Mina dösu,
Natanael ku sa nguë kana loso Galilea,
ku nna mina Sebedeo,
ku utu nna balë Djisu dösu mashi.
Jesús en el mar de Galilea (Juan 21.1-25)
3 *Se Shiman Pudul faa ineñ:
—Amu ska piska.
Se ineñ kundji ëli:
—No ten ska be ku bo.
Se ineñ ten bai,
se ineñ lantela dantu uan batelu,
mandji se nöchi sai se ineñ na mata zhugan jaf.
4 Se ta pamasedu jomesa ja bla,
se Djisu bi sa mdjadu lalea bodo domali,
mandji se nna balë na bi sëbë fa sa Djisuf.
5 Se Djisu pongota ineñ:
—¡Nna masebu!
¿Namsëdji na të zhugan pishi pa kumufa?
Se ineñ kundji ëli:
—Na.
6 *Se Djisu faa ineñ:
—Namsëdji ta alëdë ba benda dëtu batelu,
se namsëdji ske piska uan kuzhu.
Se ineñ ten fë amea sai,
zha se ineñ na ba paadji sa alëdëf dajantu sapa pishi shi bi të.
7 Tadashi se balë shi Djisu bi ngongo ku ëli mashi iai se ëli faa Pudul:
«¡Nguë sai sa Shiölö!».
Öshi moso ku Shiman Pudul tëndë fa:
«Ëli se sa Shiölö»,
se ëli bishi kuzhu,
pakë ëli bi sa mëiu gödödji,
se ëli da ba omali.
8 Se utu nna balë bi jaia ku batelu,
ja sea alëdë ku bi sa shia pishi,
öshi vlame ku ineñ na ten bi sa löndji ku laleaf,
bi sa peetu zhugan sentu metro fo bodo bodo san tela.
9 Se ta ineñ dësë bi san tela se ineñ dajonta ku öpa fögö djidjidu,
ku uan pishi liba,
ku ampan.
10 Se Djisu faa ineñ:
«Namsëdji ma zhugan pishi ineñ se namsëdji piska öseshi ie bi».
11 Se Shiman Pudul,
subili ba batelu se sea alëdë ba bodo lalea ku zhugan sapa pishi ngangandji ineñ sai,
sentu ku deshi shinku ku tëishi,
mandji se ku sapa pishi ineñ sai se alëdë sai na bagaf.
12 Se Djisu faa ineñ:
«Namsëdji bi kumu».
Se zhugan nna balë na tividu pa pongota ëlif:
«¿Kë nguë sa bo?»,
pakë ineñ tudu ba sëbë fa ëli se sa Shiölö.
13 Zha se Djisu iaba iai,
se ëli ma ampan ku öma dëli se ëli da ineñ,
se ëli ten fë jö shime ku pishi.
14 I sai se bi fë ope shi fë tëishi ku Djisu bi bi së nna balë dëli ku supichi ta ëli bi lanta fo dantu nna nguë mölidu.
Djisu ska faa ku Shiman Pudul
15 Ta ineñ kumu kumu pamasedu jaba,
se Djisu pongota Shiman Pudul:
—Shiman,
mina Zhuan,
¿bo ngongo ku amu mashi ku nna nguë ineñ sai?
Se Pudul kundji ëli:
—Shiën,
Shiölö,
bo sëbë fa amu ngongo ku bo.
Se Djisu faa:
—Ludjila nna jabala amu.
16 Se ëli tan vlame pongota ëli:
—Shiman,
mina Zhuan,
¿bo ngongo ku amu?
Se Pudul kundji ëli:
—Shiën,
Shiölö,
bo sëbë fa amu ngongo ku bo.
Se Djisu faa ëli:
—Fë lazhan nna jabala amu.
17 Se ope shi fë tëishi se ëli pongota ëli:
—Shiman,
mina Zhuan,
¿bo ngongo ku amu?
Se Pudul vla modoia pakë ëli tan pongota ëli ope tëishi:
«¿Bo ngongo ku amu?».
Se ëli faa ëli:
—Shiöla,
bo sëbë ja tudu.
Bo sëbë fa amu ngongo ku bo.
Se Djisu faa ëli:
—Ludjila nna jabala amu.
18 »Anta vedadji,
anta vedadji se amu faa bo,
ta bo bi sa mashivin,
bo ja bishi,
se bo ja bai jamian shi ja da bo vintadji;
mandji se ta bo ske sa pai veiu,
se bo ske ja tezha öma bo,
se utu nguë ske ja bishi bo,
se ëli ske ja ma bo bai jamian shi bo na ngongo baif.
19 Djisu faa jö sai valadji pa da ötëndë amea shi Pudul bi ske mölë ku ske da Nashian gloria.
Tadashi se Djisu faa ëli:
«¡Lë amu!».
20 *Se ta Pudul da voto,
se ëli bë balë shi Djisu bi ngongo ku ëli iai bi ska lë ëli fo tashi,
nguë shime ku djia kumu tadji bi sa tovesadu pë böjö kusan dëli ku bi pongota ëli:
«Shiöla,
¿kë nguë sa nguë shi ske vëndë bo?».
21 Se ta Pudul bë ëli,
se ëli pongota Djisu:
—Shiöla,
¿a kë i shi ske sa dji dëli?
22 Se Djisu kundji ëli:
—Shi amu ja ngongo pa ëli mdja ba toja ta amu tan ske vlame bi,
¿a kë tavadji sa ku bo?
Bo,
lë amu.
23 Dajantu shi,
se dantu nna namain tudu a bi ska faa balë sai na bi ske mölëf.
Mandji se Djisu na bi faa ëli na bi ske mölëf.
Jö shi ku ëli faa:
«Shi amu ja ngongo pa ëli mdja ba toja ta amu tan ske vlame bi,
¿a kë tavadji sa ku bo?».
24 Nguë sai se sa balë shime ku ska da lazhan gavu jö ineñ sai se ëli se ten skëvë.
Se no tudu sëbë fa lazhan gavu dëli sa vedadji.
25 Djisu ten fë uan sapa utu ja mashi;
uan sapa ja mashi;
ku a ja ske skëvë tudu unian unian,
amu mazhna fa dantu mundu nguintëlu nguintëlu na bi ske paadji gaga lavulu ineñ shi a bi ske skëvë tuduf.