Djisu tan lanta bi vida
20
Ta da pimëlu djia sumanu,
pamasedu kulu kulu öshi ontolo jamian na bi sa limpif,
se Malia Magdalena së ba ua spitula,
se ëli toja a chila budu spitula folo.
2 Tadashi se ëli jölë ba jamian shi Shiman Pudul ku balë shi Djisu bi ngongo ku ëli mashi iai,
se ëli faa ineñ:
«¡Ala ma öguë Shiölö fo spitula,
se no na sëbë jamian shi ineñ a ma ëli ba pëf!».
3 Se Pudul ku balë shiki së fo ala ku jölë ba spitula.
4 Se ineñ dödösu bi ska be ja jölë zhuntadu,
mandji se balë shiki bi ska jölë dandjian mashi ku Pudul,
se ëli se ba da spitula pimëlu.
5 Se ëli kuia pa ëli bë dantu,
se ëli bë lesa lesa panu,
mandji se ëli na lantelaf.
6 Zha se Shiman Pudul bi tashi dëli,
se ëli lantela ba dantu spitula se ëli ten bë lesa lesa panu ala;
7 se a shime ëli ten bë lensu shi a bi kubili jasa Djisu iai se lensu na bi sa lome lesa lesa panu ineñ shikif shina dubadu pë uan jamian patadu.
8 Zha se balë sai ten lantela dantu,
se nguë shi se bi da spitula pimëlu iai,
se ëli bë se ëli këlë.
9 Pakë ontolo ineñ na bi ska tëndë jö ineñ shi Fa Nashian ska faaf,
tëjantu ku Djisu faa ëli tan bi ske lanta bi vida.
10 Tadashi se nna balë ineñ sai tan vla jadji dëneñ.
Djisu së Malia Magdalena ku supichi
11 Se Malia mdja öluia lome spitula ja sula,
se öshi ëli ska sula se ëli kuia pë ua dantu dantu spitula.
12 Se ëli bë nna anzhu dösu bishidu ku bitidu banku;
se ineñ bi ska tusan liba jamian shi mochi Djisu bi sa;
uan ineñ bi sa jamian shi jasa se utu ineñ se bi sa jamian shi ope.
13 Se nna anzhu ineñ sai pongota ëli:
—Mooso sai,
¿ja fë bo ska sula?
Se ëli faa ineñ:
—Pakë a ma Shiölö amu bai,
se amu na sëbë jamian shi a pë ëlif.
14 Se i shi moso ku ëli faa jö sai,
se ëli vla öiö,
se ëli bë Djisu ku bi sa ala mdjadu,
mandji se ëli na bi sëbë fa sa ëlif.
15 Se Djisu pongota ëli:
—Mooso sai,
¿ja fë bo ska sula?
¿A kë nguë bo ska jua?
Se ëli bi ska mazhna fa sa ludjadölö nguintali,
se ëli faa ëli:
—Shiöla,
shi ja sa bo se ma ëli bai,
da amu lazhan jamian shi ku bo pë ëli,
pa amu ba ma ëli.
16 Tadashi se Djisu faa ëli:
—¡Malia!
Se ëli vla öiö se ëli faa ëli ku fala tela ebreo:
¡Raboni!
(ku sa:
“Meeth”).
17 Se Djisu faa ëli:
—Lega amu,
pakë ontolo amu na sa ba toja Paif.
Mandji se bo ja bai pa bo faa nna namain amu,
bo ja faa ineñ:
“Amu tan ska vlame ba toja Pai amu ku ten sa Pai namsëdji,
Nashian amu ku ten sa Nashian namsëdji”.
18 Tadashi se Malia Magdalena bai se ëli da nna balë lazhan fa ëli bë Shiölö,
se a shime se ëli ten da ineñ lazhan jö ineñ shi ëli bi faa ëli.
Djisu së nna balë dëli ku supichi
19 Se ta da ba nöchi djia se me,
ku bi sa pimëlu djia sumanu,
se nna balë bi sa zhuntadu ku poto suadu pakë ineñ bi ska mendu nna jasa jasa nna judio,
se Djisu bi,
se ëli ba metadji nna balë,
se ëli faa ineñ:
«¡Padji sa ku namsëdji!».
Jesús se aparece a los discípulos (Juan 20.19-31)
20 Ta ku ëli faa ineñ jö sai,
se ëli msa öma dëli ku pintada dëli.
Se liguilia ma nna balë öshi ku ineñ ba ku öiö ba bë Shiölö.
21 Tadashi se Djisu tan vlame faa ineñ:
«¡Padji sa ku namsëdji!
Se amea shi ku Pai amu da amu bi,
se sa amea shi,
se amu ten ska da namsëdji bai».
22 Ta ku ëli faa jö sai,
se ëli föfö pë liba dëneñ,
se ëli faa ineñ:
«Namsëdji ma Spitu Santu.
23 *Se ja sa nguë shi namsëdji ja pada pekadu,
ëli ske sa padadu;
se ja sa nguë shi namsëdji na ja padaf,
ëli na ske sa padaduf».
Tomashi bë Shiölö Djisu lantadu bi vida
24 Se Tomashi,
ku sa uan nna balë deshi ku dösu,
ku a ten ja sama ëli Mina dösu,
se ëli na bi sa ala öshi Djisu bif.
25 Zha se utu nna balë faa ëli:
—¡No bë Shiölö!
Mandji se ëli kundji ineñ:
—Shi amu na ja bë shinali pegu öma dëlif,
se amu na ja mëtë dëdöma amu pë shinali pegu ku öma amu pë ëli pintadaf,
amu na ske këlëf.
26 Ta pasa ötu djia,
se nna balë tudu tan vlame zhunta pë dantu uan jadji,
se Tomashi ten bi sa ala ku ineñ.
Se ineñ bi sa ku poto suadu,
se Djisu lantela se ëli ta mdjadu metadji dëneñ tudu,
se ëli da ineñ manten ja faa:
«¡Padji sa ku namsëdji!».
27 Zha se ëli faa ku Tomashi:
—Mëtë dëdöma pë iai,
pia öma amu.
Ma öma bo bi pa bo mëtë pë dantu pintada amu.
Pa bo na sa nguë na ja këlë jaf,
shina nguë ja këlë.
28 Tadashi se Tomashi kundji ëli:
—¡Shiölö amu ku Nashian amu!
29 Se Djisu faa ëli:
—¿Pakë bo bë amu se bo këlë?
Besa se sa ku nna nguë ineñ shi na ja bë jafa mandji se ineñ ja këlë.
Jö shi fë ku a skëvë lavulu sai