A kondena Djisu
19
Se Pilatu tadashi se ëli da odji pa da Djisu ku valasöchi.
2 Zha se nna sodadji roma fë uan jölöiö pian pian,
se ineñ pë Djisu jasa se ineñ bishi ëli uan taba bobolonda böbö kulu.
Jesús condenado a muerte (Juan 19.1-16)
4 Tadashi se Pilatu tan vlame së se ëli faa ineñ:
«Namsëdji pia,
amu tan ma ëli bi,
valadji pa namsëdji sëbë fa amu na bë zhugan ja fëiu ku ëli fëf».
5 Se ta Djisu së,
ku jölöiö pian pian jasa dëli bishidu ku bobolonda böbö kulu.
Se Pilatu faa:
«¡Masebu se lele iai!».
6 Se ta nna jasa jasa padjil ku nna guada jadji Nashian ba ku öiö ba bë ëli,
se ineñ sa fa ja ta kidëlë ku falagochi ba van:
«¡Da ëli pë kusu,
da ëli pë kusu!».
Se Pilatu faa ineñ:
—Namsëdji ma ëli bai pa namsëdji se ba da ëli pë kusu,
pakë amu na ska bë zhugan ja fëiu ku ëli fëf.
7 Se nna jasa jasa nna judio kundji ëli:
—No sa ku uan alë,
se dantu alë no faa ta pa ëli mölë,
pakë ëli ska fë öguë dëli fa ëli sa Mina Nashiolo.
8 Se ta Pilatu tëndë ineñ faa jö sai,
se ëli tan ba mendu mashi.
9 Se ëli tan lantela dantu jadji dalë dëli se ëli pongota Djisu:
«¿A kë jamian bo sa nguë dëli?».
Mandji se Djisu na kundji ëlif.
10 Tadashi se Pilatu faa ëli:
—¿Bo na ske kundji amu zhugan jafa?
¿Bo na sëbë fa amu sa ku pödë pa amu manda pa da bo pë kusu ku a shime pa amu ten manda pa lega bo ua?
11 Se Djisu kundji ëli:
—Bo na bi ske të zhugan pödë liba amuf,
shi na ja sa ja a da bo fo libaf.
Dajantu shi,
se nguë shi ma amu bi da bo se sa ku kupa pekadu ngandji mashi.
12 Se fo öshi,
se Pilatu bi ska jua amea shi pa ëli lega Djisu,
mandji se nna judio bi ska ta kidëlë ja paua mashi:
«Shi bo ja lega masebu sai,
bo na sa jamada Sesarf,
ja sa nguë shi ja fë öguë dëli alë ja sa namigu Sesar».
13 Se ta Pilatu tëndë jö sai,
se ëli chila Djisu bi öluia se ëli tusan liba jadela dondolo dëli,
jamian shi a ja sama Budu budu ku fala tela ebreo Gabata.
14 Se bi sa djia shi a ja fë vadu fesa Paskua,
se bi sa solomedjian anta pa da djia fesa sai,
se Pilatu faa nna judio:
«¡Alë namsëdji lele iai!».
15 Mandji se ineñ ta kidëlë:
«¡Chila ëli fo iai!
¡Chila ëli fo iai!
¡Da ëli pë kusu!».
Se Pilatu faa ineñ:
—¿Sa fa amu se ske da alë namsëdji pë kusu?
Se nna jasa jasa padjil kundji ëli:
—¡No na të zhugan alë mashi ku Sesarf!
16 Tadashi se Pilatu da ineñ ëli valadji pa ineñ da ëli pë kusu.
Se ineñ ten ma Djisu bai.
A da Djisu pë kusu
17 Se Djisu ten së ja gaga kusu dëli,
ja be uan jamian ku a ja sama Kalavera,
ku fala tela ebreo a ja sama Golgota.
La crucifixión (Juan 19.17-37)
18 Se ala se ineñ da ëli pë kusu,
ëli ku utu nguë dösu,
uan nguë uan benda utu nguë,
se Djisu se sa metadji.
19 Se Pilatu da odji pa skëvë uan latela pa da pë kusu pa ja faa:
«Djisu Nasaret,
Alë nna judio».
20 Se uan sapa nna judio lëë latela sai,
pakë jamian shi a da Djisu pë kusu iai bi sa peetu ku palea,
se latela sai bi sa skividu ku fala tela ebreo,
fala latini ku fala griego.
21 Dajantu shi,
se nna jasa jasa padjil nna judio faa Pilatu:
—Na skëvë:
“Alë nna judiof”,
shina bo ja skëvë fa:
“Nguë shi faa ëli se sa Alë nna judio”.
22 Mandji se Pilatu kundji ineñ:
—Jö shi amu skëvë,
sa skividu bebezha.
23 Se ta nna sodadji da Djisu pë kusu,
se ineñ ma bitidu dëli se ineñ të baga baga fë pachi jatulu,
se sodadji tudu të uan gachi.
Se ineñ ten vlame ma jaminzha dëli,
ku na sa jözhidu zhugan jamian shif,
bi sa ntëlu fo liba ba basu.
24 Se nna sodadji faa ku ineñ ineñ me:
«No na të bagaf,
shina pa no lifa,
pa sëbë nguë shi ske ma».
Se amea sai se kumpli Fa Nashian shi ku faa:
«Se ineñ pachi bitidu amu dantu ineñ ineñ me,
se ineñ jua suleta liba bitidu amu».
25 Lome kusu Djisu bi sa ala main dëli,
namain naamain main dëli,
Malia miela Kleofas,
ku Malia Magdalena.
26 Se ta Djisu bë main dëli,
ku bi sa lome balë dëli shi ëli bi ngongo ku ëli mashi iai,
se ëli faa main dëli:
«Mooso sai,
mina bo lele iai».
27 Zha se ëli faa balë dëli:
«Main bo lele iai».
Se fo ola shi,
se balë sai ten ma ëli pë jadji dëli.
Mölë Djisu
28 Ta ku jö ineñ se jaba,
se amea shi Djisu bi sëbë fa ja tudu bi jaba bebezha,
valadji pa kumpli Fa Nashiolo,
se ëli faa:
«Amu sa ku fomu daua».
29 Se jamian sai bi sa ku uan mamuda shia ku viniligui.
Tadashi se ineñ mala sapu dantu viniligui,
se ineñ mala pë uan manga döpa isopo,
se ineñ iaba böjö dëli.
30 Se ta Djisu puva viniligui sai,
se ëli faa:
«Ja tudu jaba zha».
Zha se ëli mba jasa dëli se ëli da spitu dëli.
A duma Djisu pintada ku zheguea
31 Bi sa djia pa fë vadu djia fesa Paskua,
se nna judio na bi ngongo pa mochi dëneñ mdja liba van kusu uan djasubuduf,
pakë bi sa uan djia ngandji.
Dajantu shi se ineñ pindji Pilatu pa da odji pa kabela ineñ tudu pena valadji pa ineñ paadji mölë dandjian pa chila mochi dëneñ fo ala.
32 Se nna sodadji bai se ineñ kabela pena nguë shi pimëlu,
a shime nguë shi fë dösu ku bi sa dadu pë kusu lome Djisu.
33 Mandji se ta ineñ iaba ope Djisu se ineñ toja ëli bi sa mölidu bebezha.
Dajantu shi se ineñ na kabela ëli pena penaf.
34 Mandji se,
uan nna sodadji fula ëli pintada ku uan vala zheguea,
se öshi öshime se së sangui ku aua.
35 Se nguë shi bë jö sai se ska da lazhan gavu fa jö sai sa vedadji.
Ëli sëbë fa ëli ska da vedadji,
valadji pa namsëdji ten këlë.
36 Pakë jö ineñ se tudu shiga valadji pa Fa Nashian kumpli:
«A na ske kabela zhugan oso dëlif».
37 *Se utu jamian Fa Nashian ja faa:
«Se ineñ ske ja pia nguë shi a duma ku kuzhu iai».
A da Djisu spitula
38 Ta jö ineñ se tudu pasa,
se Sandzhe,
ku sa nguë arimatea,
se ba pindji Pilatu pa ëli da ëli mochi Djisu.
Sandzhe bi sa balë Djisu,
amea jöndjidu dajantu ku ëli bi ska mendu nna jasa jasa nna judio.
Se Pilatu da ëli,
se ëli ten bai se ëli ten ma mochi dëli.
La resurrección (Juan 19.38–20.18)
39 *A shime Nikodemo,
masebu shi fo faa ku Djisu uan nöchi iai,
se ëli bi ku uan taba galafa adjimiolo zhuntadu mirra ku aloe.
40 Se amea sai se ineñ ma mochi Djisu,
se ineñ boshia ku lesa lesa panu madu ku adjimiolo,
ku se sa amea kutumu shi nna judio ja ma ntela nna nguë dëneñ.
41 Se jamian shi a da ëli pë kusu iai,
bi sa ku uan nguintali,
se dantu nguintali sai se bi sa ku uan spitula novu,
ku ontolo a na bi sa ntela zhugan pëf.
42 A shi ku bi sa djia fë vadu djia nna judio,
pakë spitula bi sa peetu,
se ineñ pë Djisu ala.