A të Djisu
18
Se ta Djisu faa jö ineñ se jaba,
se ëli së ku nna balë dëli ba benda sala uan mina lubela ku a ja sama Sedron.
Benda benda sala bi sa ku uan nguintali se ala se sa jamian shi Djisu bi lantela ku nna balë dëli.
2 A shime Judas,
nguë shi bi ska vëndë ëli iai,
ten bi jönsë jamian sai,
pakë uan sapa djia se Djisu bi ja zhunta ku nna balë dëli ala.
Jesús traicionado y arrestado (Juan 18.1-14)
3 Se amea sai se Judas ba da ala ku uan lodji sodadji ku nna shividölö nna jasa jasa padjil ku nna fariseo.
Ineñ tudu bi sa ku öpa fögö,
lapanta ku pingada.
4 Mandji se Djisu,
ku bi sëbë jö ineñ shi bi ske pasa ala tudu,
se ëli se pongota ineñ:
—¿A kë nguë namsëdji ska jua?
5 Se ineñ kundji ëli:
—Djisu Nasaret.
Se Djisu faa ineñ:
—Amu se sa.*+
Se a shime Judas,
nguë shi ba vëndë ëli ten bi sa ala ku ineñ.
6 Ta Djisu faa ineñ:
«Sa amu»,
se ineñ tudu tan vla ku tashi,
se ineñ pono ba bëtë san.
7 Se Djisu tan vlame pongota ineñ:
—¿A kë nguë namsëdji ska jua?
Se ineñ tan vlame faa:
—Djisu Nasaret.
8 Se Djisu tan vlame faa ineñ:
—Amu faa namsëdji Amu se sa nguë shi.
Shi namsëdji ska jua amu,
namsëdji ja lega pa nna nguë ineñ sai bai.
9 Jö ineñ se tudu pasa valadji pa kumpli jö ineñ shi Djisu me bi bi faa bebezha:
«Pai amu,
nna nguë ineñ shi bo bi da amu iai,
zhugan ineñ na pëndëf».
10 Tadashi se Shiman Pudul,
ku bi sa ku uan jatana,
se ëli chila se ëli pota shividölö jasa jasa padjil olea shi dëtu.
(Shividölö sai a bi ja sama ëli Malko).
11 *Tadashi se Djisu faa Pudul:
«¡Tan gada jatana bo pë jamian dëli!
Pukulu shi Pai da amu,
¿se amu na ske bëbëfa?».
Djisu sa deenchi jasa jasa padjil Anas
12 Se nna sodadji ku jatan dëneñ ku nna guada jadji Nashian nna judio ba të Djisu se ineñ mala ëli ku jodo.
13 Se ineñ ma ëli ba jadji Anas pimëlu,
ku sa sogolo Kaifas,
pakë anu sai ëli se bi sa jasa jasa padjil.
14 *Kaifas se bi sa nguë shi bi da nna judio shizhu fa,
bi ske sa gavu mashi pa uan ponodu masebu se mölë dajantu pövu.
Pudul ska naga fa ëli na jönsë Djisuf
15 Shiman Pudul ku utu balë bi ska be ja lë Djisu.
Se utu balë se bi sa jönshidu jasa jasa padjil,
se fë amea se ku ëli lantela ku Djisu ba balandia jadji jasa jasa padjil.
Pedro niega conocer a Jesús y Anás pregunta a Jesús (Juan 18.15-27)
16 Mandji se Pudul bi mdja öluia lome böjö poto.
Dajantu shi se balë shi sa jönshidu jasa jasa padjil iai,
faa ku namina miela shi bi sa böjö poto iai,
se a lega Pudul lantela.
17 Se uan namina miela shividölö pongota Pudul:
—¿Bo na ten sa uan nna balë masebu se ua?
Se Pudul kundji ëli:
—Na,
amu na saf.
18 Se öshi bi ska fë uan sapa fiiu,
se nna shividölö ku nna guada jadji Nashiolo,
se ineñ zhunta pë lome uan taba fögö,
se ineñ bi sa ala ja kenta.
Se a shime Pudul ten bi sa ala ku ineñ mdjadu ja kenta lome fögö.
Jasa jasa padjil Anas ska golo Djisu
19 Se ten sa öshime,
ku jasa jasa padjil jomesa ja golo Djisu ja tëjantu ku nna balë dëli ku jö shi ëli ten bi ska shina nguë.
20 Se Djisu kundji ëli:
«Amu faa fala deenchi mundu amea betu,
se olatuvëdji se amu ja shina nguë ja dantu jadji Nashian nna judio ku dantu jadji Nashiolo,
jamian shi nna judio tudu ja zhunta pë,
se amu na ja faa zhugan ja jöndjiduf.
21 ¿Jama fë bo ska pongota amu?
Namsëdji pongota nna nguë ineñ shi tëndë amu,
a kë ja amu faa ineñ.
Ineñ sëbë jö ineñ shi amu fala».
22 Se ta Djisu faa jö sai,
se uan nna guada jadji Nashiolo ku bi sa ala,
da ëli ku uan fala butada se ëli faa ëli:
—¿Se sa amea shi bo ja kundji jasa jasa padjil?
23 Se Djisu kundji ëli:
—Shi amu ten ja faa uan ja fëiu,
bo ja da amu lazhan jö shi,
mandji se shi jö shi amu ja faa sa ja gavu,
¿ja fë bo da amu ku kuzhu?
24 Tadashi se Anas mala ëli se da ëli ba da Kaifas,
jasa jasa padjil.
Pudul tan vlame naga Djisu
25 Mandji se Shiman Pudul bi sa mdjadu ala,
ja kenta fögö.
Se ineñ pongota ëli:
—¿Bo na sa uan nna balë dëli ua?
Se ëli naga,
ja faa:
—Na,
amu na saf.
26 Se uan nna shividölö jasa jasa padjil,
ku sa namain masebu shi Pudul bi bi pota olea iai,
se faa ëli:
«¿Amu na bë bo dantu nguintali ku ëli ua?».
27 Se Pudul tan vlame naga ëli,
se öshi öshime se galu ngañia janta.
Djisu sa deenchi Pilatu
28 Se ineñ ma Djisu fo jadji Kaifas ba jadji dalë gövöndölö roma.
Bi sa pamasedu kulu kulu,
se ineñ na bi paadji lantela jadji dalëf,
valadji pa ineñ na vla sunzhuf,
pa amea se pa ineñ paadji kumu kumu tadji Paskua.
Pilato le pregunta a Jesús (Juan 18.28-40)
—¿A kë ja fëiu ku masebu sai fë?
30 Se ineñ kundji ëli:
—No na bi ske ma ëli bi da bof,
shi ëli na ja sa nguë fë ja fëfëiuf.
31 Se Pilatu faa ineñ:
—Namsëdji ma ëli bai,
pa namsëdji ba juzhga ëli amea tuludöguë alë namsëdji.
Mandji se nna jasa jasa nna judio kundji ëli:
—No nna judio na sa legadu pa no chila zhugan nguë vida folof.
32 *Valadji pa paadji kumpli fala ineñ shi Djisu bi bi faa iai,
amea mölë shi ku ëli bi sa puluntu pa ëli mölë.
33 Se Pilatu tan lantela dantu jadji dalë,
se ëli sama Djisu se ëli pongota ëli:
—¿Bo se sa Alë nna judio?
34 Se Djisu kundji ëli:
—¿Jö sai ja bo ja fala ö utu dji nguë se faa bo tëjantu ku amu?
35 Se Pilatu kundji ëli:
—¿Sa fa amu sa judio?
Nna nguë tela bo ku nna jasa jasa padjil se sa nna nguë ineñ shi ma bo bi da amu.
¿A kë ja bo fë?
36 Se Djisu kundji ëli:
—Gövöndölö amu na se sa dji mundu sef;
ja pa sa ja gövöndölö amu sa dji mundu sai,
nna shividölö amu bi ske pezha valadji pa ineñ na lega pa nna judio të amuf.
Mandji se öseshi gövöndölö amu na sa dji ief.
37 Tadashi se Pilatu pongota ëli:
—¿Sa fa bo sa alë?
Se Djisu kundji ëli:
—Bo se faa amu sa alë.
Dajantu jö sai se a pali amu,
se dajantu jö sai se amu bi mundu,
valadji pa amu bi da lazhan gavu jö shi sa vedadji.
Se nna nguë ineñ shi tudu ja sa pachi vedadji,
ja tëndë falagochi amu.
38 Se Pilatu pongota ëli:
—¿Kë ja sa vedadji?
Se ta ëli faa jö se jaba,
se Pilatu tan vlame së pa ëli ba faa ku nna judio,
se ëli faa ineñ:
—Amu na ska bë zhugan ja fëiu ku masebu se fëf.
39 Mandji,
se namsëdji sa ku kutumu fa namsëdji ja sota uan nguë dantu fesa Paskua.
¿Namsëdji ngongo pa amu sota da namsëdji Alë nna judio?
40 Tadashi se ineñ tudu tan vlame ta kidëlë:
—¡Na sa nguë sef,
shina a Barabas!
Se Barabas bi sa uan futadölö.