Djisu ska lezha da nna balë dëli
17
Se ta Djisu faa jö ineñ sai,
se ëli lanta öiö ba ösë se ëli faa:
«Pai,
ola da zha,
pa bo da Mina bo gloria,
valadji pa Mina bo ten da bo gloria.
2 Se bo da Mina bo pödë liba nna pöjödölö tudu,
valadji pa ëli da vida chindadji nna nguë ineñ shi bo da ëli iai.
Jesús ora por sus seguidores (Juan 17.1-26)
3 Se jö sai se sa vida chindadji pa ineñ jönsë bo,
ponodu Nashian shi sa vedadji,
ku Djisukilitu,
nguë shi bo se da bi.
4 Amu msa nna nguë mundu gloria bo se amu jaba ku tabaia shi bo bi da amu pa amu bi fë.
5 Se öseshi,
Pai,
da amu gloria deenchi bo,
gloria shime ku bi sa ku amu,
anta pa mundu sai bi sa.
6 »Nna nguë mundu ineñ shi ku bo se da amu iai,
se amu msa ineñ namu bo.
Ineñ bi sa ja bo,
se bo da amu,
se ineñ gada fala bo.
7 Öseshi se ineñ tudu sëbë fa jö ineñ shi bo da amu tudu sa ja së fo bo,
8 pakë amu da ineñ nova ineñ shi bo bi da amu iai,
se ineñ ma,
se ineñ ten ba sëbë fa anta vedadji amu së fo bo,
se ineñ ba këlë fa bo se da amu bi.
9 »Amu ska luga bo da ineñ,
amu na ja luga bo da nna nguë munduf,
shina da nna nguë ineñ shi ku bo se da amu,
pakë ineñ sa ja bo.
10 Jö ineñ shi sa ja amu tudu sa ja bo,
se jö ineñ shi sa ja bo tudu sa ja amu;
se ineñ tudu ja bë gloria amu.
11 Amu na tan ske sa dantu mundu sef,
mandji se ineñ ontolo ske sa dantu mundu sai,
öshi amu ska bi pa amu tan vlame bi toja bo.
Pai Santu,
fë lazhan dëneñ ku pödë namu bo,
namu shi ku bo bi da amu,
valadji pa ineñ sa unian,
amea shime ku no.
12 *Ta ontolo amu bi sa ku ineñ dantu mundu sai amu bi ska fë lazhan dëneñ ku pödë namu bo,
namu shi ku bo bi da amu,
se zhugan ineñ na pëndëf,
shina nguë shi bi sa pindjidu bebezha,
valadji pa kumpli Fa Nashiolo.
13 »Öseshi se amu tan ska vlame ba toja bo,
mandji se amu ska faa jö ineñ sai öshi ontolo amu sa dantu mundu,
valadji pa ineñ ten të liguilia amu kumpli ntëlelele.
14 Amu da ineñ lazhan fala bo,
se nna nguë mundu sai të pashian dëneñ,
pakë ineñ na sa nguë munduf,
shimafan ta amu na ten sa nguë munduf.
15 Amu na ska pindji pa bo chila ineñ fo dantu munduf,
shina pa bo fë lazhan dëneñ fo nguë shi fëiu.
16 Ineñ na sa nguë munduf,
amea shi ku amu na ten sa nguë munduf.
17 Fë pa ineñ sa santu ku vedadji,
pakë fala bo sa vedadji.
18 Se amea shi ku bo da amu bi mundu,
se amu ten da ineñ ba mundu.
19 Se dajantu dëneñ se amu sa santu,
valadji pa ineñ ten sa santu dantu vedadji.
20 »Mandji se amu na ska luga bo da ineñ se mosof,
shina amu ten ska luga da nna nguë ineñ shi ten ske këlë amu dajantu nova dëneñ.
21 Amu pindji bo valadji pa ineñ tudu sa uan soso,
amea shi bo,
Pai,
sa ku amu se amu ten sa ku bo,
a shime pa ineñ ten sa ku no,
valadji pa mundu këlë fa bo se da amu bi.
22 »Amu da ineñ gloria shi ku bo bi da amu,
valadji pa ineñ sa uan ja soso,
amea shime ku no ten uan ja soso.
23 Amu sa ku ineñ se bo sa ku amu,
valadji pa ineñ sa ntëlelele unian soso,
valadji pa mundu jönsë fa bo se da amu bi,
se amu ngongo ku ineñ amea shi bo amu ngongo ku amu.
24 Pai,
amu ngongo pa nna nguë ineñ shi bo da amu,
pa ineñ sa ku amu jamian shi amu ja sa,
valadji pa ineñ bë gloria shi bo da amu,
pakë bo ngongo ku amu fo anta ja fë pa mindji mundu.