16
»Amu faa namsëdji jö ineñ sai,
valadji pa namsëdji na ja da topu jonfa namsëdjif.
2 Se a ske jölë namsëdji fo dantu jadji Nashian nna judio;
se ten ske da tempu ku ja sa nguë shi ja chila namsëdji vida folo,
ëli ske ja mazhna fa ëli ska fë uan sulvisu da Nashiolo.
3 Se ineñ ske ja fë jö ineñ sai pakë ineñ na jönsë Pai amufa ñi amuf.
4 Mandji se amu faa namsëdji jö ineñ sai,
valadji pa ta tempu ja da,
pa namsëdji ja lambela fa amu bi faa namsëdji bebezha.
Jö ineñ se amu bi faa namsëdji tudu bebezha fo jomesadu,
pakë amu bi sa ku namsëdji.
Tabaia Spitu Santu
5 »Se öseshi se amu ska toja nguë shi da amu bi,
se zhugan namsëdji na ja pongota amuf:
“¿A kë jamian bo ska bai?”
Más enseñanza sobre el Espíritu Santo (Juan 16.5-33)
6 Se ta amu faa namsëdji jö ineñ sai,
se namsëdji tudu vla modoia dantu kusan namsëdji monchi.
7 Mandji se amu ska da namsëdji vedadji:
Ske sa gavu da namsëdji pa amu bai mashi.
Pakë shi amu na ja bef,
Fiadölö kusan na ske bi toja namsëdjif,
mandji se shi amu ja bai,
amu ske da ëli bi da namsëdji.
8 Se ta ëli ske bi,
se ëli ske msa mundu se pekadu,
ku djustishi ku juisio.
9 Tëjantu ku pekadu mundu,
pakë ineñ na këlë amuf;
10 tëjantu ku djustishi,
pakë amu ska toja Pai amu se namsëdji na tan ske paadji bë amuf;
11 tëjantu ku juisio,
dajantu ku a juzhga alë mundu se bebezha.
12 »Ontolo amu të uan sapa ja pa amu faa namsëdji,
mandji se öseshi namsëdji na ske paadji gagaf.
13 Mandji se ta Spitu vedadji ske bi,
se ëli ske ma namsëdji ba jönsë vedadji;
pakë ëli na ske faa ja a sondji dëlif,
shina jö ineñ shi ëli tëndë tudu,
se ëli ske fë pa namsëdji sëbë jö ineñ shi tudu ske bi bi shiga.
14 Ëli se ske msa namsëdji gloria amu,
pakë ëli ske ma ja fo amu se ëli ske msa namsëdji.
15 Jö ineñ shi sa ku Pai amu tudu,
sa ja amu;
dajantu shi se amu faa namsëdji:
“Spitu Santu ske ma ja amu se ëli ske lega pa namsëdji jönsë”.
16 »Dantu uan fi ja se namsëdji na tan ske bë amuf;
mandji se dantu uan fi ja mashi zha se namsëdji tan ske vlame bë amu.
Modoia ske vla fë liguilia
17 Tadashi se zhugan nna balë dëli jomesa ja pongota ineñ ineñ me:
«¿Kë ja ëli ngongo faa ku jö sai fa:
“Dantu uan fi ja se namsëdji na tan ske bë amuf”,
se “dantu uan fi ja mashi zha se namsëdji tan ske vlame bë amu”,
se “pakë amu ska toja Pai”?
18 ¿A kë ja ëli ngongo faa:
“Dantu uan fi ja”?
No na sëbë kë ja ëli ska faaf».
19 Se da Djisu ötëndë fa ineñ ngongo pongota ëli zhugan kuzhu.
Dajantu shi se ëli faa ineñ:
—¿Namsëdji ja ska pongota dantu namsëdji me a kë ja amu ngongo fala öshi ku amu faa:
“Dantu uan fi ja se namsëdji na tan ske bë amuf”,
se “dantu uan fi ja mashi zha se namsëdji tan ske vlame bë amu”?
20 Anta vedadji,
anta vedadji se amu faa namsëdji,
se ta namsëdji ske ja sula se nna nguë mundu ske sa ku liguilia,
mandji se benga zha pa namsëdji sa modoia;
modoia namsëdji ske vla fë liguilia.
21 Ta uan naamain pañia ja ska pali,
ëli ja sinchi dölö ku duadu.
Mandji se ta ëli ja pali mina dëli,
se ëli ja kësë duadu dëli dajantu liguilia shi ja sa ku ëli pakë ëli ma uan pöjödölö novu bi mundu.
22 Se sa amea se me,
ku öseshi ku namsëdji sa modoia iai,
mandji se ta amu tan ske vlame bi bë namsëdji,
se liguilia sai ske shia kusan namsëdji,
uan liguilia ku zhugan nguë na ske paadji chila fo namsëdjif.
23 Djia sai namsëdji na tan ske pongota amu zhugan jaf.
Anta vedadji,
anta vedadji se amu faa namsëdji,
ja sa jö ineñ shi namsëdji ja pindji Pai ku namu amu,
ëli ja da namsëdji.
24 Bi toja öseshi namsëdji na sa pindji zhugan ja ku namu amuf,
pindji se a ske da namsëdji,
valadji pa kumpli liguilia namsëdji.
Djisu se ngana mundu
25 »Amu faa namsëdji jö ineñ se tudu amea zhampulu,
mandji se ske bi da tempu shi amu na tan ske ja faa namsëdji ku zhampulufa,
shina amu ske ja da namsëdji lazhan limpi pepepe ja tëjantu ku Pai amu.
26 Se djia sala,
se namsëdji ske ja pindji ku namu amu,
se amu na faa amu na ske se luga Pai amu da namsëdjif,
27 pakë tuludöguë Pai amu se ngongo ku namsëdji,
dajantu namsëdji ngongo ku amu se namsëdji këlë fa amu bi fo pachi Nashiolo.
28 Amu së fo Pai amu se amu bi mundu sai,
se öseshi se amu ska lega mundu sai pa amu tan vlame ba toja Pai amu.
29 Tadashi se nna balë dëli faa ëli:
—Öseshi se bo ska faa fala limpi pepepe,
shin zhugan zhampulu.
30 Öseshi se no sëbë fa bo sëbë ja tudu se na fë fata pa zhugan nguë pongota bo zhugan jaf.
Dajantu shi se no këlë fa bo së fo Nashiolo.
31 Se Djisu kundji ineñ:
—¿Ontolo se namsëdji këlë amu olo?
32 Namsëdji pia,
tempu ske ja bi,
se tempu bi bebezha,
öshi namsëdji tudu ske panta panta,
se nguë tudu ske ja bai jadji dëneñ,
se a ske lega amu moso pë.
Mandji se amu na ske sa amu mosof,
pakë Pai amu ske sa ku amu.
33 Amu ska da namsëdji lazhan jö ineñ sai valadji pa namsëdji sa ku padji.
Dantu mundu sai namsëdji ske të pedji,
mandji se namsëdji ja ma añimu,
pakë amu ngana mundu sai bebezha.