Djisu, ope döpa uva shi vedadji
15
»Amu sa ope döpa uva shi vedadji,
se Pai amu se sa nguë shi ja shimian.
2 Se shi uan manga na ja da fulutaf,
se ëli ja pota folo,
mandji shi ja da fuluta,
se ëli ja limpa valadji pa da mashi.
La vid y las ramas (Juan 15.1-17)
3 Namsëdji sa limpi bebezha dajantu fala ineñ shi amu faa namsëdji iai.
4 Namsëdji mdja zhuntadu pë amu,
amea se ku amu sa zhuntadu pë namsëdji iai.
Zhugan manga na paadji da fuluta ku öguë dëlif,
shi ëli na ja sa zhuntadu pë ope döpa uvaf.
Se sa amea shi,
namsëdji na paadji da fuluta shi namsëdji na ja sa zhuntadu pë amuf.
5 »Amu sa ope döpa uva,
se namsëdji se sa manga manga.
Nguë shi ja sa zhuntadu pë amu,
pa amu ten ja sa zhuntadu pë ëli,
nguë se ske da uan sapa fuluta,
pakë safadu fo amu zhugan nguë na fo fë zhugan jaf.
6 Nguë shi na ja sa zhuntadu pë amuf,
a ske chila ëli pë öluia pa ëli soja shimafan uan manga döpa,
se ëli ske soja,
se a ske totolo ëli,
se a ske ta ëli ba fögö se ëli ske kama.
7 Shi namsëdji ja sa zhuntadu pë amu,
se fala amu ja sa zhuntadu pë namsëdji,
ja sa jö shi namsëdji ja ngongo pindji tudu,
se a ske da namsëdji.
8 Ta namsëdji ja da fuluta monchi se jö sai ja msa gloria Pai amu,
pa namsëdji ja sa msa fa namsëdji sa balë amu.
9 »Se amea shi Pai amu ngongo ku amu,
se sa amea shi amu ten ngongo ku namsëdji.
Namsëdji mdja zhuntadu ku ngongo amu.
10 Shi namsëdji ja gada mandamentu amu,
namsëdji ske sa zhuntadu ku ngongo amu;
se ten sa amea shi amu ja da mandamentu Pai amu se amu ja mdja zhuntadu ku ngongo dëli.
11 Jö ineñ se tudu sa ja amu faa namsëdji,
valadji pa liguilia amu sa ku namsëdji,
pa liguilia namsëdji tudu ten ja kumpli.
12 *Mandamentu amu sa i sai:
Pa namsëdji ngongo ku namsëdji me amea shi amu ngongo ku namsëdji.
13 Zhugan nguë na të ngongo ngandji mashi ku sa da vida dëli dajantu nna jamada dëlif.
14 Namsëdji ske sa nna jamada amu,
shi namsëdji ja fë jö shi ku amu manda namsëdji.
15 Amu na tan ske ja sama namsëdji shividölöf,
pakë shividölö na ja sëbë jö ineñ shi shiölö dëli ja fëf.
Mandji se amu ja sama namsëdji nna jamada,
pakë amu ja da namsëdji lazhan jö ineñ shi Pai amu da amu lazhan tudu.
16 Na sa namsëdji se ma amuf,
shina amu se ma namsëdji,
se amu da namsëdji odji valadji pa namsëdji ja bai ku pa ja da fuluta,
pa fuluta namsëdji ja tada.
Valadji pa ja sa jö ineñ shi namsëdji ja pindji Pai ku namu amu,
ëli ja da namsëdji.
17 I sai se sa mandamentu amu:
pa namsëdji ja ngongo ku namsëdji me.
Mundu ske nozho Djisu ku nna balë dëli
18 »Shi nna nguë mundu se ja nozho namsëdji,
ta pa namsëdji sëbë fa ineñ nozho amu pimëlu.
Jesús advierte sobre la persecución (Juan 15.18–16.4)
19 Shi namsëdji bi sa nguë mundu,
nna nguë mundu bi ske ngongo ku namsëdji,
amea shi ëli ja ngongo ku nna nguë dëli.
Mandji dajantu ku namsëdji na sa nguë munduf,
se fë ku amu ma namsëdji dantu nna nguë mundu.
Dajantu shi se ineñ ja nozho namsëdji.
20 *Namsëdji ja lambela fala ineñ shi amu bi faa namsëdji:
“Zhugan shividölö na ja sa mashi ku shiölö dëlif”.
Se shi amu me ineñ pëtëpë,
a shime ineñ ten ske pëtëpë namsëdji;
se shi ineñ ja tëndë fala amu,
a shime ineñ ten ske tëndë fala namsëdji.
21 Mandji se jö ineñ se tudu ineñ ske fë namsëdji dajantu namu amu,
pakë ineñ na sëbë nguë shi da amu bif.
22 Shi ja pa sa ja amu na bif,
se ñi amu na ten faa ku ineñf,
ineñ na bi ske sa ku zhugan pekadu shif.
Mandji se öseshi se ineñ na tan sa ku zhugan ja pa ineñ fala tëjantu ku pekadu dëneñf.
23 Nguë shi ja nozho amu,
a shime ëli ten ja nozho Pai amu.
24 Ineñ na bi ske sa ku zhugan kupaf,
pa sa ja amu na fë zhugan fidu ja dantu dëneñ ku zhugan nguë na bi sa fë ie zhaf,
ineñ na ske sa kupa pekaduf.
Mandji se öseshi se ineñ bë,
se ineñ ontolo ska nozho amu ku Pai amu.
25 Mandji se jö ineñ se tudu sa valadji pa fala dëli kumpli amea shi sa skividu dantu alë dëneñ iai:
“Shipë shi se ineñ të pashian amu”.