Djisu, se sa jamangandji pa ba toja Pai
14
»Na jaba kusan namsëdjif.
Namsëdji këlë Nashiolo,
namsëdji ten këlë amu.
2 Dantu jadji Pai amu,
të uan sapa jadji;
shi na ja sa shif,
amu bi ske faa namsëdji bebezha;
amu ska bai,
pa amu ba fë vadu uan jamian da namsëdji.
El único camino a Dios (Juan 14.1-14)
3 Se ta amu ja bai ku amu ja fë vadu uan jamian,
se amu tan ske vlame bi,
valadji pa amu bi ma namsëdji bai ku amu.
Pa amea se pa jamian shi amu ja sa pa namsëdji ten ja sa.
4 Namsëdji tudu sëbë jamian shi ku amu ska bai,
se namsëdji jönsë jamangandji.
5 Se tadashi se Tomashi faa ëli:
—Shiöla,
no na sëbë jamian shi bo ska bef,
¿jama fë no ske sëbë jamangandji?
6 Se Djisu kundji ëli:
—Amu se sa jamangandji,
vedadji ku vida.
Zhugan nguë na fo ba toja Pai amu shin amuf.
7 Shi namsëdji ja jönsë amu,
a shime namsëdji ten ske jönsë Pai amu,
se fo öseshi se namsëdji jönsë ëli bebezha,
pakë namsëdji ska bë ëli.
8 Tadashi se Filipa faa ëli:
—Shiöla,
msa no Pai,
ku jö sai moso se dagoli da no.
9 Se Djisu kundji ëli:
—Filipa,
sa tempu löngö se amu sa ku namsëdji iai,
¿se ontolo bo na jönsë amufa?
Nguë shi ja bë amu,
ëli bë Pai amu;
¿jama fë bo ska pindji pa amu msa bo Pai amu?
10 ¿Bo na këlë fa amu se sa ku Pai amu,
se Pai amu ten ku amufa?
Palavulu ineñ shi amu ja fala,
amu na ja faa a sondji amuf,
shina Pai amu ku ja ta ku amu,
ëli se ja fë fidu jö ineñ sai.
11 Këlë amu fa amu sa ku Pai amu;
se Pai amu sa ku amu,
shi namsëdji na ja këlëf,
namsëdji këlë amu da fidu jö ineñ shime.
12 »Anta vedadji,
anta vedadji se amu faa namsëdji:
Nguë shi ja këlë amu,
fidu jö ineñ shi amu ja fë,
ëli ten ske fë,
se ëli tan ske fë ngandji mashi ku amu,
pakë amu ska toja Pai amu.
13 Se ja sa jö ineñ shi namsëdji ja pindji tudu ku namu amu,
amu ske fë,
valadji pa Mina se a ja msa gloria Pai.
14 Shi namsëdji ja pindji uan ja a namu amu,
amu ske fë.
Djisu plomëtë pa ëli da Spitu Santu bi
15 »Shi namsëdji ja ngongo ku amu,
namsëdji ske këlë mandamentu amu.
Jesús habla del Espíritu Santo (Juan 14.15-31)
16 Se amu ske luga Pai amu,
valadji pa ëli da Fiadölö kusan,
pa ëli sa ku namsëdji pa sempele.
17 Spitu vedadji,
ku nna nguë mundu na paadji tëf,
pakë ineñ na ja bë ëlif,
se ineñ na jönsë ëlif,
mandji se namsëdji jönsë ëli,
pakë ëli ja ta ku namsëdji,
se ëli ske sa ku namsëdji.
18 Amu na ske lega namsëdji pë moso shin pai ñi mainf;
amu tan ske bi toja namsëdji.
19 Goleme nna nguë mundu sai na tan ske bë amuf,
mandji se namsëdji ske bë amu pakë amu sa vivu se namsëdji ten ske sa vivu.
20 Ta ske da djia sai,
se ske da namsëdji ötëndë fa amu sa ku Pai amu,
se namsëdji sa ku amu,
se amu sa ku namsëdji.
21 Nguë shi ja ma mandamentu amu se ëli ja gada,
nguë sai se sa nguë shi ja ngongo ku amu,
se Pai amu ske ngongo ku ëli,
se amu ten ske ngongo ku ëli,
se amu ske msa ëli amu.
22 Se Judas (nguë shi na sa Iskariotef) pongota ëli:
—Shiöla,
¿jama fë bo ske msa no bo se bo na ske msa bo nna nguë munduf?
23 Se Djisu kundji ëli:
—Nguë shi ja ngongo ku amu,
ske ja gada fala amu,
se Pai amu ske ngongo ku ëli se no ske bi pa no ja ta ku ëli.
24 Nguë shi na ja ngongo ku amuf,
na ja gada fala amuf.
Se fala ineñ se namsëdji ska tëndë iai na sa ja amuf,
shina dji Pai amu shi da amu bi.
25 Amu ska faa namsëdji jö ineñ se tudu,
öseshi ku ontolo amu sa ku namsëdji iai.
26 Mandji se Fiadölö kusan,
Spitu Santu ku Pai amu ske da ëli bi ske bi ku namu amu,
ëli ske shina namsëdji jö ineñ sai tudu,
se ëli ten ske lambela namsëdji jö ineñ shi ku amu bi faa namsëdji iai.
27 »Padji se amu lega pë da namsëdji,
padji amu se amu da namsëdji,
amu na ske da namsëdji shimafan ta nna nguë mundu ja daf.
Na jaba kusan namsëdji ñi na ja menduf.
28 Namsëdji tëndë amu faa namsëdji:
Amu ska bai,
se amu bi toja namsëdji.
Shi namsëdji ja ngongo ku amu,
namsëdji ja fo të liguilia pakë amu ska toja Pai amu;
pakë Pai se ngandji mashi ku amu.
29 Se öseshi se amu faa namsëdji anta ja fë pa jö ineñ se shiga,
valadji pa ta jö ineñ sai ja shiga pa namsëdji ja këlë.