Djisu ska laba nna balë dëli ope
13
Anta ja fë pa da djia fesa Paskua,
se Djisu ku bi sëbë fa tempu da bebezha pa ëli lega mundu sai valadji pa ëli tan ba toja Pai dëli.
Se amea shi ëli bi ngongo ku nna balë dëli ku bi sa mundu sai,
se ëli ngongo ku ineñ ba toja jabamentu.
2 Se ta ineñ bi ska kumu tadji,
se bi toja djiabu bi lantela dantu kusan Judas,
mina Shiman Iskariote,
pa ëli vëndë Djisu.
Jesús lava los pies de los discipulos (Juan 13.1-17)
3 Se Djisu ku bi sëbë fa Pai dëli pë ja tudu basu pödë dëli,
ku ëli së fo Nashiolo,
ku ëli tan ske vlame ba toja Nashiolo.
4 Se ëli lanta fo mezha,
se ëli chila bitidu dëli pë san se ëli ma uan toia,
se ëli mala pë jadela.
5 Zha se ëli ta aua pë uan palangana,
se ëli jomesa ja laba nna balë dëli ope,
se ëli ja soja ku toia shi ku ëli mala pë jadela dëli iai.
6 Se ta ëli bi ska laba Shiman Pudul ope,
se ëli faa ëli:
—Shiöla,
¿bo ske laba amu ope?
7 Se Djisu kundji ëli:
—Jö sai ku amu ska fë iai,
bo na fo tëndë öseshif,
mandji se bo ske bi bi tëndë.
8 Se Pudul kundji ëli:
—¡Na!
¡Jabötu bo na ske laba amu opef!
Se Djisu kundji ëli:
—Shi amu na ja laba bo opef,
bo na ske sa nguë amuf.
9 Se Shiman Pudul faa ëli:
—¡Tadashi,
Shiöla,
bo na ja laba amu ope mosof,
shina a shime öma ku jasa!
10 Mandji se Djisu kundji ëli:
—Nguë shi sa labadu,
na fë fata pa laba ëli mashi ku ope dëlif,
pakë jamian dëli tudu sa limpi.
Se namsëdji sa limpi,
benga pa na sa nguë tuduf.
11 Pakë ëli sëbë nguë shi bi ske vëndë ëli,
dajantu shi se ëli faa:
«Namsëdji tudu na se sa limpif».
12 *Se ta ëli laba ineñ tudu ope,
se Djisu tan vlame bishi bitidu dëli,
se ëli tan tusan ku ineñ liba mezha se ëli faa ineñ:
—¿Da namsëdji ötëndë jö se amu fë namsëdji iai?
13 Namsëdji ja sama amu “Meeth” ku “Shiölö”,
se namsëdji ja faa gavu,
pakë amu sa.
14 Se öshi amu,
Meeth ku Shiölö,
amu laba namsëdji ope,
a shime namsëdji ten ta pa namsëdji ja laba namsëdji namsëdji me ope.
15 Pakë amu da namsëdji zhampulu,
valadji pa namsëdji ten ja fë jö shime ku amu fë ku namsëdji iai.
16 *Anta vedadji,
anta vedadji se amu faa namsëdji:
Zhugan shividölö na fo sa ngandji mashi ku shiölö dëlif,
se zhugan nguë ku ja ma fala bai na fo sa ngandji mashi ku nguë shi se da ëli bif.
17 Se shi namsëdji ja tëndë jö ineñ sai pa namsëdji ten ja fë,
besa ja sa ku namsëdji.
Djisu ska da nova amea shi Judas ske vëndë ëli
18 »Amu na ska faa ku namsëdji tuduf,
amu sëbë nna nguë ineñ shi ku amu ma.
Mandji se sa pa Fa Nashiolo kumpli:
“Nguë shi ska kumu ampan ku amu,
se sa nguë shi lanta öma tëjantu ku amu”.
Jesús predice la traición (Juan 13.18-38)
19 Amu ska faa namsëdji jö ineñ sai fo öseshi,
valadji pa ta jö ineñ sai ja pasa,
pa namsëdji këlë fa amu sa.
20 *Anta vedadji,
anta vedadji se amu faa namsëdji:
Nguë shi ja ma nguë shi amu da bi,
nguë sai se ja ma amu;
se nguë shi ja ma amu,
ëli ja ma nguë shi da amu bi.
21 Ta Djisu faa jö ineñ se jaba,
se ëli vla modoia dantu spitu dëli se ëli da ineñ lazhan se ëli faa:
«Anta vedadji,
anta vedadji,
se amu faa namsëdji,
fa uan namsëdji ske vëndë amu».
22 Tadashi se nna balë sa fa ja pia ineñ ineñ me,
shinke ineñ sëbë nguë shi ëli ska faa ku ëli.
23 Se uan nna balë dëli,
nguë shi Djisu bi ngongo ku ëli iai,
se bi sa tovesadu pë lome Djisu.
24 Se Shiman Pudul fë ëli shinali ku jasa,
valadji pa ëli pongota ëli kë nguë sa nguë shi ëli ska faa ku ëli.
25 Tadashi se ëli ku bi sa tovesadu pë böjö kusan Djisu,
pongota ëli:
—Shiöla,
¿kë nguë sa?
26 Se Djisu kundji ëli:
—Nguë shi bo ja bë amu da ampan madu,
nguë sai se sa nguë shi.
Se ëli mala uan dasu ampan se ëli da Judas,
mina Shiman Iskariote.
27 Se i shi moso ku Judas ma ampan,
se Satanas lantela ëli.
Se Djisu faa ëli:
«Jö shi bo ske fë,
fë dandjian».
28 Mandji se zhugan nna nguë ineñ shi bi sa mezha,
na tëndë jö shi fë ku Djisu bi ska faa jö sef.
29 Se ta da me ku Judas se bi sa mötölö shi ja gada djiëlu,
se zhugan ineñ mazhna fa Djisu bi ska faa ëli pa ëli kumpa jö ineñ shi fë ineñ fata,
valadji pa ineñ ma fë fesa Paskua,
ö pa ëli da nna puvili uan kuzhu.
30 Se fë ku i shi Judas ma ampan moso,
se ëli së fo ala öshi öshime;
ta bi sa nöchi bebezha.
Mandamentu shi novu
31 Se ta Judas së fo ala moso,
se Djisu faa:
«Öseshi se nguë tudu ske paadji bë amea gloria shi sa ku Mina Napai Dösë.
Se Nashian ten ske msa gloria shi sa ku ëli.
32 Se shi Mina Napai Dösë ja msa gloria Nashiolo,
a shime Nashian ten ske msa gloria dëli,
se ëli ske fë öshi öshime.
33 *Nna mina kilidu amu,
amu na tan ske sa ku namsëdji uan sapa tempuf.
Namsëdji ske ja jua amu,
mandji se jö shi amu faa nna jasa jasa nna judio se sa jö shime ku amu ten ske faa namsëdji:
Pakë jamian shi amu ska bai namsëdji na ske paadji bef.
34 *Amu ske da namsëdji uan mandamentu novu:
Pa namsëdji ja ngongo ku namsëdji me.
Amea shi amu ngongo ku namsëdji,
se sa amea shime ku namsëdji ten ngongo ku namsëdji me.
35 Se fo amea sai se nguë tudu ske bë fa namsëdji sa nna balë amu,
shi namsëdji ja ngongo ku namsëdji me».
Djisu ska da lazhan amea shi Pudul ske naga ëli
36 Se Shiman Pudul pongota Djisu:
—Shiöla,
¿a kë jamian bo ska bai?
Se Djisu kundji ëli:
—Jamian amu ska bai,
bo na fo lë amu bai öseshif;
mandji se bo ske bi bi lë amu deenchi mashi.
37 Se Pudul faa ëli:
—Shiöla,
¿ja fë amu na paadji lë bo öseshif?
¡Dajantu bo amu ske da ba toja vida amu!
38 Se Djisu kundji ëli:
—¿Bo ske da vida bo dajantu amu?
¡Anta vedadji,
anta vedadji se amu sugula bo fa anta pa galu ngañia janta,
se bo ske naga amu ope tëishi!