Uan mooso buka adjimiolo pë liba Djisu
12
Sëishi djia anta ja fë pa da Paskua,
se Djisu ba Betania,
jamian shi ku Lasaro,
nguë shi ëli bi lanta fo dantu nna nguë shi mölë bebezha.
2 Se ala se ineñ da uan bankëtë dondolo da Djisu,
se Marta bi ska shivi,
se Lasaro bi sa uan nna nguë ineñ shi bi sa mezha ja kumu ku ëli.
María unge a Jesús (Juan 12.1-11)
3 *Tadashi se Malia bi ma uan metadji galafa adjimiolo nardo shishizhu ku bi ja kuta monchi,
se ëli bolo pë liba dope Djisu,
zha se ëli soja ku jabelu dëli,
se sëlu adjimiolo se shia dantu jadji sai.
4 Tadashi se uan nna balë dëli,
Judas Iskariote,
ku sa nguë shi bi ske vëndë ëli,
se ëli faa:
5 «¿Ja fë ku a na vëndë adjimiolo se da pagu djiëlu uan anu tabaia,*+
valadji pa zhuda nna puvilif?».
6 Mandji se ëli na faa shi dajantu ëli sa tave nna puvilif,
shina pakë ëli sa uan futadölö,
se öshi ëli se bi sa ku bondëlë djiëlu,
se ëli bi sa ku kutumu futa jö ineñ shi ineñ bi ja ta ba dantu dëli.
7 Se Djisu faa:
«Namsëdji lega ëli,
pakë da djia spitula amu se ëli gada jö sai.
8 Pakë olatuvëdji shi namsëdji ske ja të nna puvili dantu namsëdji,
mandji se namsëdji na ske sa ku amu olatuvëdjif».
Mazhnamentu fëfëiu jö shi a bi ngongo fë Lasaro
9 Se uan sapa nna judio ta ba tëndë fa Djisu sa Betania,
se ineñ tudu lamodji ba da ala,
na sa dajantu pa ineñ ba bë Djisu mosofa shina pa ineñ ten bë Lasaro,
nguë shi bi mölë ku Djisu lanta.
10 Tadashi se nna jasa padjil ten mazhna pa ineñ ten chila Lasaro vida folo.
11 Pakë dajantu dëli se uan sapa nna judio bi ska safa fo ineñ valadji pa ineñ ba këlë Djisu.
Djisu ska lantela dantu Jerusalen
12 Ta da amaian shi se uan sapa nna nguë ineñ shi bi ba Jerusalen da fesa Paskua,
se ineñ ba sëbë fa Djisu bi ske bi dantu palea.
Entrada triunfal a Jerusalén (Juan 12.12-19)
«¡Osana!
¡Besa ja sa ku nguë shi ja bi a namu Shiölö,
Alë Israel!».
14 Se Djisu dajonta ku uan mina javalu kutu se ëli ten vada liba dëli,
amea shi bi sa skividu dantu Fa Nashiolo:
15 «Na menduf,
mina naamain Sion.
Bo ja pia,
Alë bo la ja bi,
vadadu liba uan mina javalu kutu».
16 Fo jomesadu,
ta ku jö ineñ sai bi ska fë,
se na bi ska da nna balë dëli ötëndë zhugan jö ineñ shi bi ska fë alaf.
Mandji se ta Djisu tan të gloria dëli,
se ineñ ba lambela jö ineñ se tudu ku bi sa dantu Fa Nashiolo ku tudu bi ska tëjantu ku ëli.
17 Se nna nguë ineñ shi bi sa ala ku Djisu ta ëli sama Lasaro fo dantu spitula ku ëli lanta ëli fo dantu nna nguë mölë bebezha,
se ineñ bi ska be ja da lazhan gavu sai.
18 Dajantu shi se nguë tudu bi ska toja Djisu,
pakë ineñ bi tëndë lazhan shinali ngangandji ineñ shi ku ëli bi fë iai.
19 Dajantu shi se nna fariseo bi ska faa ku ineñ ineñ me:
«Namsëdji bë fa no na të zhugan ja pa no fo fëf.
Namsëdji pia,
¡mundu nguintëlu nguintëlu ska lë ëli tashi!».
Djisu ska da lazhan mölë dëli
20 Dantu nna nguë ineñ shi bi subili ba Jerusalen ba adola dantu djia fesa iai,
bi sa ku zhugan nna griego.
Jesús predice su muerte (Juan 12.20-36)
21 Se ineñ iaba lome Filipa,
ku sa nguë betsaida,
ku sa uan loso Galilea,
se ineñ luga ëli ja faa ëli:
«Shiöla,
no ngongo bë Djisu».
22 Se Filipa bai se faa Andëlë,
se ineñ dödösu bai se ineñ da Djisu lazhan.
23 Se Djisu kundji ineñ:
«Tempu da zha pa Mina Napai Dösë msa gloria dëli.
24 Anta vedadji,
anta vedadji se amu faa namsëdji fa,
shi shimenchi tulugu na ja pono da san dalea pa ëli mölëf,
ëli ske mdja ëli moso,
mandji shi ëli ja mölë,
ëli ja da uan sapa fuluta.
25 *Ja sa nguë shi ja ngongo ku vida dëli,
ëli ske pëndë ëli,
mandji se nguë shi nozho vida dëli dantu mundu sai,
ëli ske gada ba toja vida chindadji.
26 Shi uan nguë ja ngongo shivi amu,
pa ëli lë amu,
se jamian shi ku amu ske sa,
se sa jamian shi shividölö amu ten ske ja sa.
Shi uan nguë ja shivi amu.
Pai amu ske da ëli ondolo.
27 »¡Öseshi se amu ska sinchi dantu alma amu uan tavadji ödu!
¿A kë ja amu ske faa:
“Pai amu,
sava amu fo dantu ola ödu sai”?
¡Mandji se sa tuludöguë jö shi ku amu bi ie da!
28 Pai amu,
msa gloria namu bo».
Tadashi se a tëndë uan falagochi fo ösë,
ku ska faa:
«Amu da ëli gloria bebezha,
se amu tan ske vlame da ëli gloria me».
29 Se möi pöjödölö ineñ shi bi sa ala tëndë falagochi sai,
se ineñ bi ska faa,
sa uan lonjadaua,
mandji se utu ineñ bi ska faa:
—Uan anzhu se faa ku ëli.
30 Se Djisu faa ineñ:
«Fala sai na sa ja bi da ku amuf,
shina sa ja bi da namsëdji.
31 Öseshi se sa tempu djustishi mundu sai,
se öseshi se a ske jölë alë mundu sai ba öluia.
32 Mandji se amu,
ta a tan ske lanta amu fo san tela,
se amu ske ma nguë tudu bi öguë amu».
33 Ku jö sai se ëli bi ska da nguë tudu ötëndë da amea shi ku ëli bi ske mölë.
34 Se nguë tudu kundji ëli:
—No tudu tëndë fo dantu alë,
fa Kilitu ske bibe pa sempele.
¿Jama fë zha ku bo ska faa Mina Napai Dösë ske ta pa sa lantadu?
¿Kë nguë se sa Mina Napai Dösë sai?
35 Se Djisu faa ineñ:
—Ontolo fögö djidjidu ske sa dantu namsëdji,
mandji dantu uan fi tempu moso.
Namsëdji nda öseshi ku ontolo namsëdji sa ku fögö djidjidu iai,
valadji pa jamian kulu na dajonta ku namsëdjif,
pakë nguë shi ja nda dantu jamian kulu,
na ske sëbë jamian shi ëli ske ja bef.
36 Öseshi ku namsëdji sa ku fögö djidjidu këlë fögö djidjidu,
valadji pa namsëdji sa nna mina fögö djidjidu.
Se ta Djisu faa fala jaba jö ineñ se tudu,
se ëli ma ja se ëli bai se ëli jöndë dajantu ineñ.
Nna judio na ska këlë Djisuf
37 Se benga zha pa Djisu bi ska fë taba shinali ineñ sai deenchi dëneñ,
ontolo ineñ na bi ska këlë dëlif,
Creyentes y no creyentes (Juan 12.37-50)
«Shiöla,
¿kë nguë këlë nova no?
¿A kë nguë Shiölö msa baasu dëli?».
39 Dajantu shi,
se ineñ na paadji këlëf,
pakë vlame Isaias ten faa:
40 «Se ëli sebu ineñ öiö,
se ëli fë kusan dëneñ ödu,
valadji pa ineñ na ja bë ja ku öiöf,
ñi pa da ineñ na ja tëndë ja ku kusanf;
pa ineñ na ja tukafa,
pa amu ja kula ineñf».
41 Jö ineñ sai se Isaias fala pakë ëli bë gloria Djisu,
se ëli faa ja tëjantu ku ëli.
42 Ku jö ineñ se tudu,
se uan sapa ineñ ku nna jasa jasa nna judio ba këlë dëli.
Mandji se ineñ na bi fo da fala bi libaf,
pakë ineñ bi ska mendu nna fariseo,
valadji pa na jölë ineñ fo jadji Nashian nna judiof.
43 Ineñ bi ska ngongo ku gloria nna pöjödölö mashi ku gloria Nashiolo.
Palavulu Djisu se ske juzhga nguë
44 Se Djisu faa ku fala atu:
«Nguë shi ja këlë amu,
ëli na ja këlë amu mosof,
shina nguë shi da amu bi.
45 Se ja sa nguë shi ja bë amu,
ëli ten ja bë nguë shi se da amu bi.
46 Amu sa fögö djidjidu shi ku bi mundu valadji pa nna nguë ineñ shi ja këlë amu na ja mdja dantu jamian kuluf.
47 Nguë shi ja tëndë fala amu,
se ëli na ja gadaf,
amu na se ske juzhga ëlif;
pakë amu na bi pa amu bi juzhga munduf,
shina pa amu bi sava mundu.
48 Nguë shi ja naga amu se ëli na ja ma fala amuf,
ëli të nguë shi ske juzhga ëli;
fala ineñ sai ku amu fala iai,
se ske juzhga ëli ta ske da jabamentu djia.
49 Pakë amu na faa fala ku vintadji amuf,
Pai amu shi se da amu bi,
ëli se da amu odji jö shi pa amu ja fala ku amea shi pa amu ja fala.
50 Se amu sëbë fa mandamentu sa vida chindadji.
Dajantu shi,
jö ineñ shi amu ja fala,
amu ja fala amea shi Pai amu da amu odji pa amu fala».