Djisu, ludjadölö jabala shi gavu
10
Tadashi se Djisu faa ineñ:
«Anta vedadji,
anta vedadji se amu faa namsëdji nguë shi na ja lantela poto ögö shi jabala ja lantelaf,
shina ëli ja subili se ëli ja sata ögö,
nguë se sa uan futadölö ku bandjidu.
2 Mandji se nguë shi ja lantela böjö poto,
se sa ludjadölö jabala.
Jesús el buen pastor (Juan 10.1-21)
3 Se nguë shi ja sa böjö poto ja bla da ëli,
se ludjadölö jabala ja sama jabala tudu ku namu dëneñ,
se jabala tudu ja tëndë fala dëli,
se ëli ja ma ineñ fo dantu ögö.
4 Se ta ëli ja ma ineñ shi sa dji dëli,
se ëli ja be deenchi dëneñ,
se nna jabala ja ska lë ëli,
pakë ineñ ja jönsë fala dëli.
5 Mandji se ineñ na ja lë uan nguë ku ineñ na jönsëf,
shina ineñ ja jölë da ëli,
pakë ineñ na ja jönsë falagochi utu nguë pataduf».
6 Se Djisu da ineñ zhampulu sai,
mandji se ineñ na tëndë kumi jö shi ëli bi ngongo faa ineñf.
7 Tadashi se Djisu tan vlame faa ineñ:
«Anta vedadji,
anta vedadji se amu faa namsëdji:
Amu se sa poto nna jabala.
8 Nna nguë ineñ shi tudu bi pimëlu amu iai,
ineñ tudu bi sa nna futadölö ku nna bandjidu,
mandji se nna jabala na tëndë fala dëneñf.
9 Amu se sa poto,
se nguë shi ja lantela dajantu amu,
ëli ske sava;
se ëli ske paadji lantela pa ëli tan së se ëli ske ja dajonta olatuvëdji ku kumu.
10 Se futadölö na bi da zhugan ja mashi ku futafa,
chila nguë vida folo ku bi të nguë të fea feaf;
mandji se amu bi pa namsëdji të vida,
ku pa namsëdji ja të batanchi.
11 »Amu sa ludjadölö jabala shi gavu.
Ludjadölö jabala shi gavu ja da vida dëli da nna jabala.
12 Mandji nguë shi ja fë lazhan jabala,
ku na se sa ludjadölöf,
ñi ku ëli na se sa shiölö jabalaf.
Ta ëli ja bë jösölö djiga ska bi se ëli ja lega nna jabala pë se ëli ja jölë.
Se jösölö djiga ja vaa ba nna jabala ineñ sai se ja panta panta ineñ.
13 Se nguë se bi ska fë lazhan jabala ja jölë,
pakë ëli bi ska tabaia dajantu djiëlu se ëli na ja sa tave jabalaf.
14 *»Amu sa ludjadölö jabala shi gavu;
se amu ja jönsë nna jabala amu;
se ineñ ten ja jönsë amu.
15 Se amea se me ku Pai amu jönsë amu,
ku amu ten jönsë Pai amu;
se amu ja da vida amu da nna jabala.
16 A shime amu tan sa ku zhugan utu jabala ku na sa dantu ögö sef;
amu ten ska ma ineñ bi toja amu;
se ineñ ska tëndë fala amu,
se ske të uan ponodu ögö,
ku uan ponodu ludjadölö.
17 »Dajantu shi se Pai amu ngongo ku amu,
pakë amu ja da vida amu valadji pa amu tan vlame ma.
18 Zhugan nguë na ja chila amu vida folof,
shina pakë ku vintadji amu se amu ja da vida amu.
Amu ten të pödë pa amu da vida amu ku pa amu tan vlame ma.
Se sa mandamentu shi ku amu ma fo Pai amu».
19 Se ta nna judio tëndë fala ineñ sai;
se ineñ sa fa ja të tavadji ku ineñ ineñ me.
20 Uan sapa ineñ bi ska faa:
«¿Ja fë namsëdji ska tëndë ëli?
Ëli sa ku damono se ëli na ten sa ku jasa gavuf».
21 Mandji se utu ineñ bi ska faa:
«Zhugan nguë sa ku damono na fo faa fala shi.
¿Vlame zhugan damono na paadji bla öiö uan nguë sa sebuf?».
Nna judio na ngongo ku Djisuf
22 Dantu djia ineñ sa ala a bi ska fë uan fesa Jerusalen ku fesa djia bla jadji Nashiolo.
Bi sa tendaua.
Jesús acusado de blasfemia (Juan 10.22-42)
23 Se Djisu bi ska ndanda dantu jadji Nashiolo,
lome Poto Salomon.
24 Tadashi se nna judio ludja pë metadji se ineñ pongota ëli:
—¿Ba toja kë djia bo ske lega no ku butanja sai?
Shi bo se ja sa Kilitu,
pa bo da no lazhan öseshi.
25 Se Djisu kundji ineñ:
—Amu da namsëdji lazhan bebezha,
se namsëdji na këlëf.
Jö ineñ shi amu ja fë tudu amu ja fë ku namu Pai amu,
se ineñ se ja da lazhan da amu,
26 mandji se namsëdji na ja këlëf,
pakë namsëdji na sa jabala amuf.
27 Jabala amu tudu jönsë fala amu,
se amu ten jönsë ineñ se ineñ ja lë amu.
28 Se amu ja da ineñ vida chindadji;
se ineñ na ske mölë zhugan djiafa ñi zhugan nguë na ske chila ineñ fo öma amuf.
29 Pai amu ku se da amu ineñ,
se ëli se ngandji mashi ku nguë tudu se zhugan nguë na ske paadji chila ineñ fo öma Pai amuf.
30 Pai amu ku amu tudu sa uan soso.
—Ku pödë Pai amu se amu fë uan sapa fidu ja gagavu deenchi namsëdji;
¿a dajantu kë ineñ shi namsëdji ske da amu ku budu?
33 Se nna judio kundji ëli:
—No na ske da bo ku budu dajantu ja gagavu ineñ shi bo fëf,
shina dajantu fala zhogoveadu,
pakë bo sa uan pöjödölö,
se bo ska faa bo sa Nashiolo.
34 Se Djisu kundji ineñ:
—¿Na sa skividu dantu alë namsëdji fa:
“Amu bi faa namsëdji tudu sa nna nashiolo”?
35 Shi Nashian sama nna nguë ineñ sai nashiolo ku sa fa Fa Nashian bi da ineñ (se Fa Nashian na fo chila taföf).
36 Se shi Pai fë amu santu ku ëli da amu bi mundu,
¿jama fë namsëdji ske faa amu:
Bo ska faa fala zhogoveadu,
pakë amu faa:
“Amu sa Mina Nashiolo”?
37 Shi amu na ja fë fidu jö ineñ shi Pai amu ja fëf,
namsëdji na ja këlë amuf.
38 Mandji se shi amu ja fë,
benga pa namsëdji na ja këlë amuf,
mandji pa namsëdji këlë fidu jö ineñ shi amu ja fë,
valadji pa namsëdji tëndë ku këlë fa Pai amu sa ku amu se amu sa ku Pai amu.
39 Se ineñ tan vlame ngongo të ëli,
mandji se ëli jölë fo öma dëneñ.
40 *Se Djisu tan ma ja se ëli tan vla benda benda sala lubela Jordan,
jamian shi Zhuan bi ja bachizha nguë pimëlu iai,
se ëli mdja ala.
41 Se uan sapa dji nguë bi toja ëli,
ja faa:
«Benga pa se Zhuan na fë zhugan shinali ngangandjif,
mandji se jö ineñ shi ëli fala tëjantu ku masebu sai tudu,
sa vedadji».
42 Se uan sapa nguë pachi jamian sai tudu këlë Djisu.