Djisu kula uan nguë sa sebu fo djia shi a pali ëli
9
Ta Djisu ska bai,
se ëli bë uan masebu ku sa sebu fo djia shi ku a pali ëli.
2 Se nna balë dëli pongota ëli:
—Rabi,
¿kë nguë fë pekadu,
nguë sai ö nna pai dëli,
valadji pa pali ëli sebu?
Jesús cura a un ciego (Juan 9.1-41)
3 Se Djisu kundji ineñ:
—Na sa fa nguë sai se fë pekadufa,
ñi nna pai dëlif,
shina pa ja msa amea shi pödë Nashian ja paadji fë da ëli.
4 Öseshi ontolo jamian sa limpi iai,
se ta pa no fë tabaia shi a da amu pa amu bi fë,
pakë goleme nöchi ske kubili ku zhugan nguë na ske ja fë zhugan tabaiaf.
5 *Se fë ku shi ontolo amu sa mundu sai,
amu se sa fögö djidjidu mundu.
6 Se ta ëli faa jö se jaba,
se ëli ta aböjö pë san,
se ëli fë lama ku aböjö dëli,
se ëli fega pë öiö masebu sebu sai.
7 Se ëli faa ëli:
«Bai pa bo ba laba dantu mina poso daua Siloe»,
(ku sa:
«Nguë shi a da bi»).
Se ëli ten bai,
se ëli ten laba,
se ëli bi se ëli jomesa ja bë kuzhu.
8 Se tadashi se nna djividjili ku nna nguë ineñ shi tudu bë ëli djia shi ëli bi ska pindji djimolo iai sa fa ja pongota:
«¿Nguë sai na se sa nguë shi ja tusan ja pindji nguë djimolo ua?».
9 Se zhugan ineñ bi ska faa:
«Aen,
se sa ëli».
Se utu ineñ bi ska faa:
«Na,
na sa ëlif,
shina sa nguë tan kë ëli».
Mandji se ëli me,
se faa:
«Sa amu».
10 Tadashi se ineñ pongota ëli:
—¿Jama fë öseshi bo paadji bë kuzhu?
11 Se ëli kundji ineñ:
—Masebu shi a ja sama Djisu se ma lama,
se ëli fega pë öiö amu,
se ëli faa amu:
“Ba Siloe,
pa bo ba laba”.
Se amu bai,
se amu laba,
se amu tan të vita.
12 Tadashi se ineñ pongota ëli:
—¿A kë jama masebu se sa?
Se ëli faa ineñ:
—Amu na sëbëf.
Uan masebu kuladu ba deenchi nna fariseo
13 Se a ma masebu sebu sai ba deenchi nna fariseo.
14 Se bi sa uan djasubudu,
djia shi Djisu fë lama ku ëli bla masebu sebu sai öiö.
15 Dajantu shi se nna fariseo tan vlame pongota masebu se kë amea shi ëli tan të vita.
Se ëli kundji ineñ:
«Ëli pë amu lama liba döiö,
se amu laba,
se öseshi se amu ska bë kuzhu».
16 Tadashi se zhugan nna fariseo bi ska faa:
«Masebu se na sa nguë fo Nashianf,
pakë ëli na ja da djasubudu ondolof».
Se utu ineñ bi ska faa:
«¿Jama fë uan masebu pekadölö fo fë shinali ngangandji ineñ sai?».
Se amea sai se ineñ pachi fë uachi dantu ineñ.
17 Tadashi se ineñ tan vlame pongota masebu sebu sai:
—¿A kë ja bo paadji faa tëjantu ku ëli?
Bo se sa nguë shi ëli bla öiö.
Se ëli kundji ineñ:
—Amu këlë fa masebu sa uan pantafala.
18 Mandji se nna judio na bi ska këlë fa masebu se bi sa sebufa se öseshi se ëli ja bë jaf,
ba toja ku ineñ sama nna pai dëli bi,
19 se ineñ pongota ineñ:
—¿Nguë sai se sa mina shi namsëdji fa a pali ëli sebu?
¿Jama fë ëli paadji bë ja öseshi?
20 Se nna pai dëli kundji ineñ:
—No sëbë fa nguë sai se sa mina no,
se a pali ëli sebu;
21 mandji se no na sëbë amea shi öseshi ëli paadji bë jafa,
ñi no na ten sëbë nguë shi bla ëli öiöf.
Namsëdji pongota ëli,
ëli sa pai ngandji bebezha,
ëli me ja fo faa fala.
22 Nna pai dëli faa shi,
pakë ineñ bi ska mendu nna judio,
dajantu ku ineñ bi faa ku uan fala soso ja sa nguë shi ja jonfesa fa Djisu se sa Kilitu a ske chila ëli fo jadji Nashian nna judio.
23 Dajantu shi se nna pai dëli faa:
«Pongota ëli,
ëli sa ku anu ngandji bebezha».
24 Se nna judio tan vlame sama masebu shi bi sa sebu iai,
se ineñ faa ëli:
—Da Nashian gloria,
no sëbë fa masebu se sa uan pekadölö.
25 Se ëli kundji ineñ:
—Ëli ten ja sa pekadölö,
amu na sëbëf.
Uan ja moso se amu sëbë,
fa amu bi sa sebu,
se öseshi se amu ska bë kuzhu.
26 Se ineñ tan vlame pongota ëli:
—¿A kë ja ëli fë bo?
¿Kë amea shi ëli bla bo öiö?
27 Se ëli kundji ineñ:
—Amu faa namsëdji bebezha,
mandji se namsëdji na ska ngongo tëndëf.
¿Kë ja namsëdji tan ngongo pa amu tan vlame faa namsëdji me?
¿Namsëdji ten ngongo vla fë nna balë dëli?
28 Tadashi se ineñ suta ëli se ineñ faa ëli:
—Bo se sa balë masebu sai,
no sa balë Moises.
29 Se no sëbë fa Nashian faa ku Moises,
mandji tëjantu ku masebu se no na sëbë jamian shi ëli së folof.
30 Se masebu se kundji ineñ:
—Se sa jö shi tan fë fumözhö mashi,
fa namsëdji na sëbë jamian shi ëli së folofa,
mandji se ëli se bla amu öiö.
31 Se no sëbë fa Nashian na ja tëndë nna pekadölöf,
nna nguë ineñ shi moso ëli ja tëndë sa nna nguë ineñ shi ja adola ëli ku ja fë vintadji dëli.
32 Zhugan djia a na sa tëndë fa a da uan pöjödölö ku a pali ëli sebu vita ie zhaf.
33 Shi masebu se na ja sa nguë së fo Nashianf,
ëli na bi ske paadji fë zhugan jaf.
34 Tadashi se ineñ faa ëli:
—Bo,
a pali bo ku pekadu,
¿se bo ngongo shina no kuzhu?
Se ineñ jölë ëli.
¿Kë nguë sa kupa pekadu?
35 Se Djisu tëndë fa a jölë masebu sai;
se ta ëli dajonta ku ëli,
se ëli pongota ëli:
—¿Bo këlë Mina Napai Dösë?
36 Se ëli faa ëli:
—Shiöla,
da amu lazhan kë nguë sa ëli,
valadji pa amu këlë dëli.
37 Se Djisu kundji ëli:
—Bo bë ëli bebezha;
amu se sa,
nguë se ska faa ku bo iai.
38 Se ëli faa ëli:
—Shiöla,
amu këlë,
se ëli dajözhöiö se ëli adola ëli.
39 Zha se Djisu faa:
—Amu bi mundu sai valadji pa amu bi fë juisio,
valadji pa nna nguë ineñ shi sa sebu iai ja bë kuzhu,
ku pa nna nguë ineñ shi ja bë kuzhu iai tudu vla sebu.
40 Se zhugan nna fariseo ku bi sa lome dëli,
ta ineñ tëndë jö sai,
se ineñ pongota ëli:
—¿Sa fa,
no ten sa sebu ua?
41 Se Djisu kundji ineñ:
—Shi namsëdji bi sa sebu,
namsëdji na bi ske sa kupa pekadu namsëdjif.
Mandji se öseshi amea shi namsëdji faa namsëdji ja bë kuzhu iai,
namsëdji tudu sa ku kupa.