Nna namain Djisu na ska këlë dëlif
7
Ta jö ineñ se tudu pasa,
se Djisu bi ska be ja pasa Galilea,
pakë ëli na bi ska ngongo pasa Judeaf,
dajantu ku nna jasa jasa nna judio bi ska jua amea shi pa ineñ chila ëli vida folo.
2 Bi sa puluntu djia fesa Limada ku sa uan fesa nna judio,
Los líderes judíos quieren matar a Jesús (Juan 7.1-24)
—Na ta pa bo mdja ief,
ba Judea,
valadji pa nna balë bo ineñ shi ten sa ku bo ala iai ten bë fidu jö ineñ shi bo ska fë.
4 Pakë zhugan nguë ku ja ngongo pa jönsë ëli,
na ja fë zhugan ja jöndjiduf.
Pakë shi bo ska fë jö ineñ sai,
fë pa nguë mundu jönsë.
5 Nna namain dëli bi ska faa shi pakë ñi ineñ na ten bi ska këlë ëlif.
6 Tadashi se Djisu faa ineñ:
—Ontolo ola amu na sa daf,
mandji da namsëdji ola tudu sa ola gavu.
7 Nna nguë mundu sai na fo kë namsëdji malif,
mandji se ineñ ja kë amu mali,
pakë amu ja da lazhan dëneñ fa fidu ja dëneñ sa ja fëfëiu.
8 Namsëdji subili ba fesa,
amu na ske subili ba fesa se zhaf,
pakë ontolo tempu amu na sa kumplif.
9 Ta ëli faa ineñ jö ineñ sai,
se ëli mdja Galilea.
Djisu ba fesa Limada
10 Mandji se ta nna namain dëli subili ba fesa sai,
se Djisu ten subili ba fesa sai na sa amea bababaf shina jöndjidu.
11 Se nna judio dantu fesa se bi ska jua ëli,
ja faa:
«¿A kë jamian masebu se ja fo sa?».
12 Se uan möi pöjödölö bi ska faa ja tëjantu ku ëli.
Utu dji nguë bi ska faa:
«Ëli sa uan masebu gavu».
Mandji se utu nguë bi ska faa:
«Ëli na gavuf,
ëli ja da nguë fanchila».
13 Mandji se zhugan nguë na bi ska faa fala legadu tëjantu ku ëlif,
pakë ineñ bi ska mendu nna jasa jasa nna judio.
14 Se ta fesa bi ska da metadji,
se Djisu lantela dantu jadji Nashian se ëli jomesa ja shina nguë kuzhu.
15 Se nna judio tudu gua ku böjö betu,
ja faa:
«¿Jama fë ëli sëbë sapa jö ineñ sai,
shinke ëli shina kuzhu?».
16 Se Djisu kundji ineñ:
—Jö ineñ shi amu ja shina nguë na sa ja amuf,
shina dji nguë shi da amu bi.
17 Se nguë shi ja ngongo fë vintadji Nashiolo,
ëli ske paadji jönsë i shi shina ja sai sa ja Nashiolo ö amu ska faa fala ku vintadji amu.
18 Se nguë shi ja faa fala ku vintadji dëli,
ëli ja ska jua gloria dëli,
mandji se nguë shi ja ska jua gloria nguë shi da amu bi,
nguë sai se sa nguë shishizhu se ëli na ja të zhugan ja fëiu tëjantu ku ëlif.
19 ¿Moises na da namsëdji alë,
mandji se zhugan namsëdji na ska kumpli alë sef ua?
¿Ja fë namsëdji ska ngongo chila amu vida folo?
20 Se nguë tudu kundji ëli:
—Bo sa ku damono öguë;
¿kë nguë ngongo chila bo vida folo?
21 Se Djisu kundji se faa ineñ:
—Namsëdji tudu gua ku böjö betu,
da uan ja ngandji soso ku amu fë uan djasubudu.
22 Dajantu shi,
se Moises da namsëdji odji pa ja kuta nguë napai (ku na sa ja a da Moisesf,
shina nna paipai namsëdji);
ku namsëdji ja kuta nguë napai dji nguë benga zha pa ja sa djasubudu.
23 *Mandji se pa namsëdji kumpli alë Moises se namsëdji ja kuta napai nna mina namsëdji benga zha pa jasa uan djasubudu valadji pa namsëdji na sata alë Moisesf,
¿ja fë namsëdji ska të pashian amu dajantu amu kula uan masebu ntëlelele uan djasubudu?
24 Namsëdji na ja juzhga nguë amea shi namsëdji ja bë nguëf,
shina ja juzhga nguë ku juisio dëtu.
¿Nguë sai se sa Kilitu?
25 Se zhugan nna nguë ineñ shi bi ska ta Jerusalen jomesa ja pongota:
«¿Nguë sai na se sa nguë shi a ska jua pa chila ëli vida folo ua?
Los líderes tratan de arrestar a Jesús (Juan 7.25-53)
26 Namsëdji pia,
ëli sa dantu pövu ja faa fala se zhugan nguë na ska faa ëli zhugan jaf.
¿Ske sa fa anta vedadji nna gövöndölö ba këlë fa masebu sai se sa Kilitu?
27 Mandji se masebu se no sëbë jamian shi ëli së folo,
se fë ta Kilitu ske bi iai,
zhugan nguë na ske sëbë jamian shi ëli së folof».
28 Ta Djisu,
ku bi sa dantu jadji Nashian ja shina nguë kuzhu,
tëndë jö sai;
se ëli lanta fala ba van se ëli faa:
«Namsëdji paadji jönsë amu,
pa namsëdji sëbë jamian shi amu së folo,
mandji amu na bi ku vintadji amuf,
shina amu bi da nguë shi da amu bi,
ku se mësë pa namsëdji jonfa ëli pakë ëli sa vedadji,
ku se sa nguë shi namsëdji na jönsëf.
29 Mandji se amu se jönsë ëli,
pakë amu së fo ëli,
ëli se da amu bi».
30 Tadashi se ineñ bi ska ngongo të ëli,
mandji se zhugan ineñ,
na bi ska ta öma ba ëlif,
pakë ontolo na bi sa da ola dëlif.
31 Se uan sapa nguë ba këlë dëli,
ja faa:
«Ta Kilitu ske bi,
¿ëli ske fë shinali ngangandji mashi ku ineñ se masebu se ska fë iai?».
Nna fariseo ngongo të Djisu
32 Se nna fariseo ku bi ska tëndë jö ineñ shi nguë tudu bi ska faa tëjantu ku Djisu,
se ineñ ku nna jasa jasa padjil manda zhugan nna guada jadji Nashian pa ba të ëli.
33 Tadashi se Djisu faa ineñ:
«Ontolo amu ske sa ku namsëdji uan fi tempu,
zha se amu tan ske vla nguë shi da amu bi.
34 Namsëdji ske jua amu,
mandji se namsëdji na ske dajonta ku amuf;
pakë jamian shi amu ske sa namsëdji na ske paadji bef».
35 Se nna judio sa fa ja pongota dantu ineñ ineñ me:
«¿A kë jamian ëli ska bai,
pa no na tan paadji dajonta ku ëlif?
¿Jativie ëli ska toja nna judio ineñ shi tudu sa jamian utu tela löndji löndji,
ku pa ëli ten shina nna griego kuzhu?
36 ¿A kë ja ëli bi ngongo da no ötëndë fa:
“Namsëdji ske jua amu,
mandji se namsëdji na ske dajonta ku amuf;
pakë jamian shi amu ske sa namsëdji na ske paadji bef”?».
Lubela aua vivu
37 Ta da jabamentu djia,
ku se sa djia shi ngandji mashi dantu fesa,
se Djisu ta mdjadu se ëli lanta falagochi ba van,
se ëli faa:
«Shi uan nguë ja të fomu daua,
pa ëli bi toja amu pa ëli bi bëbë.
38 Se nguë shi ja këlë amu,
amea shi Fa Nashian ska faa:
“Fo dantu kusan dëli se ska jölë lubela daua vivu”».
39 Jö ineñ sai,
sa ja ëli faa tëjantu ku Spitu shi nna nguë ineñ shi ja këlë dëli ske të,
pakë bi toja öshi ineñ na bi sa të Spitu Santu,
pakë Djisu ontolo ëli na bi sa të gloriaf.
Pachidu fë uachi uachi dajantu Djisu
40 Tadashi se zhugan nguë dantu möi pöjödölö,
ku tëndë fala ineñ se,
se ineñ faa:
«Anta vedadji ku masebu sai se sa pantafala».
41 Se utu nguë bi ska faa:
«Ëli se sa Kilitu».
Mandji se utu ineñ bi ska faa:
«¿Kilitu ja fo së fo Galilea?
42 Fa Nashian faa Kilitu ske së fo zhenchi alë David,
ku sa nguë loso Belen,
loso shime ku alë David sa nguë dëli».
43 Se dajantu Djisu se nguë tudu bi sa pachidu fë uachi uachi.
44 Se zhugan nguë bi ska ngongo të ëli ba djili,
mandji se zhugan nguë na ta öma ba ëlif.
Nna jasa jasa judio na këlë Djisuf
45 Se nna guada jadji Nashian tan vla ba toja nna jasa jasa padjil ku nna fariseo;
se ineñ pongota ineñ:
—¿Ja fë namsëdji na ma Djisu bif?
46 Se nna guada kundji ineñ:
—¡Jabötu zhugan napai na sa faa fala shimafan masebu se ie zhaf!
47 Tadashi se nna fariseo kundji ineñ:
—¿A shime namsëdji ten lega pa ëli ngaña namsëdji?
48 ¿Namsëdji bë zhugan nna gövöndölö ö nna fariseo këlë dëli?
49 Dajantu shi se nna nguë ineñ se na sëbë zhugan ja alëf,
ineñ sa basu masan.
50 *Se Nikodemo,
masebu fariseo shi bi ba bë Djisu uan nöchi iai,
se faa ineñ:
51 —Amea dantu alë ineñ shi sa ku no iai,
no na paadji kondena uan masebu shinke no tëndë ëli pimëlu valadji pa no sëbë jö shi ku ëli fëf.
52 Se ineñ kundji ëli:
—¿Bo ten sa nguë galilea?
Shina Fa Nashiolo se bo ske bë fa fo Galilea na sa lanta zhugan pantafala ie zhaf.
Mooso shi kabajölöiö
53 Tadashi se nguë tudu tan vla jadji dëneñ.