Djisu da uan möi pöjödölö kumu
6
Ta jö ineñ se pasa,
se Djisu ba benda benda sala domali Galilea dji Tiberias.
2 Se uan möi pöjödölö bi ska lë ëli,
pakë ineñ bi ska bë shinali ngangandji ineñ shi ëli bi ska fë ja kula nna nguë ineñ shi sa ku danchi.
Jesús alimenta una multitud (Juan 6.1-15)
3 Tadashi se Djisu subili ba uan van iki,
se ëli tusan ala ku nna balë dëli.
4 Pakë goleme bi ske sa Paskua fesa nna judio.
5 Se ta Djisu lanta öiö,
ku ëli ba bë möi pöjödölö ineñ se,
se ëli faa Filipa:
—¿Kë jamian no ja paadji kumpa ampan valadji pa nna nguë ineñ se tudu kumu?
6 Djisu bi faa shi valadji pa ëli puva Filipa,
pakë ëli bi sëbë jö shi ëli bi ske fë bebezha.
7 Se Filipa kundji ëli:
—Ñi ku djiëlu ötu mëdji*+ pa no kumpa ampan na ske sa batanchi pa da nguë tudu uan dasuf.
8 Tadashi se Andëlë ku sa uan nna balë dëli namain Shiman Pudul,
se faa ëli:
9 «Iai sa ku uan namasebu ku sa ku ampan sebada shinku ku pishi dösu;
mandji,
¿kë ja sa jö sai da sapa nna nguë ineñ sai?».
10 Se Djisu faa:
«Namsëdji manda nguë tudu pa tusan».
Jamian sala bi sa ku uan sapa alba,
se ineñ tudu tusan.
Se ineñ bi sa vala milidji shinku napai.
11 Se Djisu ma ampan ineñ sai,
se ëli da dezhupaga,
se ëli pachi nna nguë ineñ shi bi sa tusan lome dëli.
Se ëli ten fë jö shime ku pishi,
se ineñ kumu jö shi ineñ bi paadji.
12 Se ta ineñ kumu shia chipa,
se ëli faa nna balë dëli:
«Namsëdji totolo dasu dasu ineñ se sovezha iai,
valadji pa na zhuga zhugan ja taf».
13 Se ineñ totolo tudu,
se ineñ shia uan deshi ku dösu ojali ku dasu dampan sebada ineñ shi sovezha iai fo nna nguë ineñ shi bi kumu iai.
14 Ta ineñ tudu bë shinali ja ngangandji ineñ se Djisu fë iai,
se ineñ faa:
«Anta vedadji nguë sai se sa pantafala shi ku bi ta pa bi mundu».
15 Mandji se Djisu ba sëbë fa ineñ ske bi ma ëli afoshi pa fë ëli alë,
se ëli ma ja se ëli tan vla van iki ëli moso.
Djisu ska nda liba daua
16 Ta nöchi ma,
se nna balë lolo ba bodo domali,
Jesús camina sobre el agua (Juan 6.16-22)
17 se ineñ lantela dantu uan batelu,
se ineñ jomesa ja sata omali ja be Kapernaum.
Jamian bi sa kulu bebezha,
se Djisu na bi sa bi toja ineñf.
18 Moso se lanta liba domali uan oventu ödu ku bi ska föfö ku foshi.
19 Ta ineñ laama batelu ba zhugan kilometro shinku ö sëishi,
se ineñ bë Djisu,
ku bi ska nda liba daua ja iabi ba batelu dëneñ,
se mendu ma ineñ.
20 Mandji se ëli faa ineñ:
«¡Sa amu,
namsëdji na menduf!».
21 Tadashi se ineñ ma ëli ku vintadji bi dantu batelu,
öshi öshi se batelu ten ba da bodo bodo shi ineñ bi ska bai.
Nna pöjödölö ska jua Djisu
22 Ta da amaian shi,
se nna nguë ineñ shi bi sa benda benda sala domali,
ba sëbë fa nna balë Djisu ma pono batelu shi ku bi sa ala se ineñ ma bai,
mandji se Djisu na bi be ku ineñf.
El pan de vida (Juan 6.22-71)
23 Se ten fë,
ku utu batelu ten bi jaia fo Tiberias lome jamian shi ineñ bi kumu ampan ta Shiölö bi da Nashian dezhupaga.
24 Se ta ineñ ba sëbë fa,
ñi Djisu na bi sa alafa ñi nna balë dëlif,
se ineñ lantela batelu ba Kapernaum ba jua Djisu.
Djisu, ampan vida
25 Ta ineñ ba da benda benda sala domali,
se ineñ dajonta ku Djisu,
se ineñ pongota ëli:
—Rabi,
¿a kë djia bo bi iai?
26 Se Djisu kundji ineñ,
se faa ineñ:
—Anta vedadji,
anta vedadji se amu faa namsëdji ska jua amu,
na sa dajantu shinali ineñ shi namsëdji bë amu fë ief shina pakë namsëdji tudu kumu ampan se namsëdji sa shia.
27 Namsëdji tabaia,
mandji pa na sa da kumu shi ja jaba ief,
shina da kumu shi ja tada ku ja dëli nguë vida chindadji,
ku se sa i shi Mina Napai Dösë ske da namsëdji,
pakë liba nguë sai se Nashian shi sa Pai ske pë sëiu aen dëli.
28 Se ineñ pongota ëli:
—¿Kë ja no ja fo fë pa no fë tabaia shi Nashian pindji no iai?
29 Se Djisu kundji ineñ:
—Ponodu tabaia shi moso Nashian ngongo pa namsëdji fë,
sa pa namsëdji këlë nguë shi ëli da bi.
30 Tadashi se ineñ pongota ëli:
—¿A kë shinali shi bo ja fo fë da no,
valadji pa ta no ja bë pa no këlë bo?
¿Kë fidu ja bo ja fë?
31 Nna paipai no kumu ampan mana dantu jamian sölö sölö,
amea shi sa skividu:
“Ampan dösë se ëli da ineñ pa ineñ kumu”.
32 Dajantu shi se Djisu faa ineñ:
—Anta vedadji,
anta vedadji se amu faa namsëdji:
Na bi sa Moises se da nna paipai namsëdji ampan fo ösëf,
shina Pai amu se ja da namsëdji ampan shishizhu fo ösë.
33 Pakë ampan Nashiolo se sa nguë shi ku dësë fo ösë ku da mundu vida.
34 Se ineñ faa ëli:
—Shiöla,
da no olatuvëdji ampan sai.
35 Se Djisu faa ineñ:
—Amu sa ampan vida.
Nguë shi ske toja amu,
na tan ske të fomu kumu zhugan djiaf;
se nguë shi ja këlë amu,
na tan ske të fomu daua zhugan djiaf.
36 Mandji se amea shi amu bi bi faa namsëdji baezha,
namsëdji na ja këlëf benga pa namsëdji bë amu.
37 Nna nguë ineñ shi Pai amu da amu tudu,
ineñ ske bi bi toja amu,
se nna nguë ineñ shi bi toja amu tudu,
jabötu amu na ske zhuga ineñ taf.
38 Pakë amu na dësë fo ösë pa amu bi fë vintadji amuf,
shina pa amu bi fë vintadji nguë shi da amu bi.
39 Se i sai se sa vintadji Pai amu,
nguë shi da amu bi:
Pa amu na pëndë zhugan nna nguë ineñ shi ëli da amuf,
shina pa amu lanta ineñ fo dantu nna nguë mölë bebezha djia shi ske da jabamentu djia.
40 Se i sai se sa vintadji Pai amu nguë shi da amu bi:
Pa ja sa nguë shi ja jönsë Mina Nashiolo,
ku ja këlë dëli,
ja të vida chindadji;
se amu ske lanta ëli fo dantu nna nguë mölë bebezha djia shi ske da jabamentu djia.
41 Tadashi se nna judio jomesa ja lo ëli mali,
pakë ëli faa:
«Amu sa ampan shi ku dësë fo ösë».
42 Se ineñ bi ska faa:
«¿Nguë sai na se sa Djisu,
mina Sandzhe,
ku no jönsë pai dëli ku main dëli ua?
¿Jama fë,
öseshi ëli ska faa:
“Amu dësë fo ösë”?».
43 Tadashi se Djisu faa ineñ:
«Na ja lo nguë mali dantu namsëdji mef.
44 Zhugan nguë na fo bi toja amu,
shi na ja sa Pai amu se ma ëli bi da amuf,
pa amu tan lanta ëli fo dantu nna nguë mölë bebezha djia shi ske da jabamentu djiaf.
45 Sa skividu dantu lavulu nna pantafala:
“Nashian ske shina nguë tudu kuzhu”.
Dajantu shi,
ja sa nguë shi ja tëndë fala Pai amu,
ku ja shina ja dëli,
ske bi toja amu.
46 Zhugan nguë na sa bë Pai amu ie zhaf,
nguë shi moso fo Nashiolo,
nguë se moso se bë Pai.
47 »Anta vedadji,
anta vedadji se amu faa namsëdji:
Nguë shi ja këlë amu,
ske të vida chindadji.
48 Amu sa ampan vida.
49 Nna paipai namsëdji kumu ampan mana dantu jamian sölö sölö,
mandji se ineñ tudu mölë.
50 Mandji se nguë sai se sa ampan shi dësë fo ösë,
valadji pa nguë shi ja kumu fo ëli na ja mölëf.
51 Amu sa ampan vivu shi dësë fo ösë;
se ja sa nguë shi ja kumu ampan sai,
ske bibe pa sempele.
Se ampan se amu ske da namsëdji iai sa tuludöguë jañi amu,
ku amu ske da valadji pa mundu të vida».
52 Tadashi se nna judio jomesa pufia ku ineñ ineñ me,
ja faa:
«¿Jama fë nguë sai paadji da no jañi dëli pa no kumu?».
53 Se Djisu faa ineñ:
«Anta vedadji,
anta vedadji se amu faa namsëdji,
shi namsëdji na ja kumu jañi Mina Napai Dösëf,
ñi bëbë sangui dëlif,
namsëdji na ske të vida shi sa shishizhuf.
54 Nguë shi ja kumu jañi amu ku ja bëbë sangui amu,
ske të vida chindadji,
se amu ske lanta ëli fo dantu nna nguë mölë bebezha jabamentu djia.
55 Pakë jañi amu sa kumu shishizhu,
se sangui amu sa bëbë shishizhu.
56 Nguë shi ja kumu jañi amu ku ja bëbë sangui amu,
ëli ske sa pakadu pë amu,
se amu ske sa pakadu pë ëli.
57 Se amea se Pai amu shi da amu bi iai sa vivu,
ku amu ja ta jantu dëli,
se sa amea shime,
ku nguë shi ja kumu amu,
ëli ten ske ja ta jantu amu.
58 Nguë sai se sa ampan shi dësë fo ösë,
ku na sa mana shi nna paipai namsëdji bi kumu ku tan mölë ief;
nguë shi ja kumu ampan sai ske të vida chindadji».
59 Jö ineñ se tudu sa ja Djisu faa ta ëli bi ska shina nguë kuzhu dantu jadji Nashian nna judio dji Kapernaum.
Fala vida chindadji
60 Se ta ineñ tëndë jö ineñ sai,
se uan sapa nna balë ineñ shi bi ska lë Djisu faa:
«Jö ineñ sai tudu sa fala ödu.
¿Kë nguë ske paadji tëndë?».
61 Mandji se Djisu,
ku sëbë jö ineñ shi nna balë dëli bi ska lo ëli mali,
se ëli pongota ineñ:
«¿Namsëdji bë mali da jö ineñ sai?
62 Tadashi,
¿a ja pa sa ja namsëdji ske bi bë Mina Napai Dösë subili ba jamian shi ëli bi sa pimëlu?
63 Se Spitu sai se ja da nguë vida;
jañi na ja shivi da zhugan jaf,
se jö ineñ se amu ska faa namsëdji iai se sa spitu ku vida.
64 Mandji se sa ku zhugan namsëdji ku na ska këlëf».
Pakë Djisu bi sëbë nna nguë ineñ shi na bi ska këlë ëlif fo jomesadu,
se ëli ten bi sëbë nguë shi bi ske vëndë ëli.
65 Se ëli faa ineñ:
«Dajantu shi se amu faa namsëdji zhugan namsëdji na fo lë amuf,
shi na ja sa Pai amu se da namsëdji bi da amuf».
66 Tadashi,
se uan sapa nna balë dëli tan bai ku tashi,
se ineñ na tan bi ska nda ku ëlif.
67 Se Djisu ten pongota nna balë deshi ku dösu dëli:
—¿Namsëdji ten ngongo bai?
68 *Se Shiman Pudul kundji ëli:
—Shiöla,
¿a kë nguë no tan fo ba toja?
Bo moso se sa ku fala vida chindadji.
69 Se no këlë,
se no sëbë fa bo se sa Kilitu,
Mina Nashian shi sa vivu.*+
70 Se Djisu kundji ineñ:
—¿Amu na ma namsëdji deshi ku dösu ua?
Mandji se uan namsëdji sa djiabu ua.
71 Ëli bi ska faa ja tëjantu ku Judas,
mina Shiman Iskariote,
pakë ëli se bi sa nguë shi bi ske vëndë ëli,
ku sa dantu uan nna deshi ku dösu balë dëli.