Djisu kula ojogo Betesda
5
Ta pasa uan tempu,
se bi të uan fesa nna judio,
se Djisu subili ba Jerusalen.
2 Se bi të dantu Jerusalen,
lome uan Poto Ngandji ku a ja sama poto Jabala,
ku ten të uan mina poso daua ku a ja sama ku fala tela ebreo Betesda,
ku se bi të mina poto shinku.
Jesús cura en Sábado (Juan 5.1-15)
3 Se lome poto ineñ sai se bi sa tovesadu uan sapa nna nguë ska danchi,
nna sebu,
nna ojogo ku nna nguë lezhadu,
se ineñ tudu bi ska gada ta aua se ja buli.
4 Pakë uan anzhu ja dësë fo ösë dantu zhugan tempu bi jobo daua sai,
se ta ëli ja të aua se të buli,
se ja sa nguë shi ja dantu aua sai pimëlu,
se ja sa danchi shi ja sa ku ëli iai se ja kula.*+
5 Se dantu dëneñ bi sa ku uan masebu ojogo ku fo chirinta ku ötu anu se ëli bi ska danchi.
6 Se ta Djisu ba ku öiö ba bë ëli tovesadu pë san ala,
se ëli ba sëbë fa ëli ma uan sapa tempu ku ëli sa shi,
se ëli pongota ëli:
—¿Bo ngongo sa lizhu?
7 Se masebu se ska danchi iai kundji ëli:
—Shiöla,
amu na sa ku zhugan nguë pa mëtë amu pë dantu jobo daua se ta ëli ja bulif.
Se öshi amu ja ngongo daua ba dantu,
se uan nguë ja pasa amu deenchi se ja daua bai pimëlu.
8 Se Djisu faa ëli:
—Lanta,
pa bo ma maka bo pa bo nda.
9 Se öshi öshi se masebu se ten lizhu,
se ëli ma maka dëli se ëli ten jomesa ja nda.
Mandji se bi sa uan djasubudu.
10 Tadashi se nna judio faa masebu se sa kuladu iai:
—Ödjai sa djasubudu,
na sa legadu pa bo gaga maka bof.
11 Mandji se masebu se kundji ineñ:
—Nguë shi kula amu iai,
se faa amu:
“Ma maka bo pa bo nda”.
12 Se ineñ tan vlame pongota ëli:
—¿Kë nguë sa nguë shi faa bo:
“Ma maka bo pa bo nda”?
13 Mandji se masebu se a kula ëli iai na sëbë kë nguë shi kula ëlif,
pakë Djisu ma ja se safa fo dantu nna pövu ineñ shi tudu bi sa jamian sala.
14 Tadji mashi se Djisu dajonta ku ëli dantu jadji Nashian nna judio,
se ëli tan faa ëli:
«Ja pia,
öseshi bo sa kuladu bebezha,
pinchidu pa bo na tan fë pekadu,
valadji pa na bi liba bo utu pedji mashi».
15 Se masebu se tan vlame bai se ëli da nna judio lazhan,
fa Djisu se sa nguë shi kula ëli.
16 Dajantu shi se nna judio bi sa tashi Djisu,
pakë ëli bi ska fë jö ineñ se tudu uan djasubudu.
Jesús defiende su autoridad (Juan 5.16-47)
17 Mandji se Djisu kundji ineñ:
«Pai amu ontolo ska tabaia,
se amu ten ska tabaia».
18 Dajantu shi se nna judio bi ska jua amea shi pa ineñ chila ëli vida folo,
pakë na sa dajantu ku ëli na ska gada djasubudu mosofa,
shina pakë ëli ten bi ska faa fa Nashian se sa Pai dëli,
ku sa fa ëli sa shimafan Nashiolo.
Pödë Mina Napai Nashiolo
19 Tadashi se Djisu kundji ineñ,
se faa ineñ:
«Anta vedadji,
anta vedadji se amu faa namsëdji:
Mina Nashian na ja paadji fë zhugan ja shi ku sondji dëlif,
shina jö ineñ shi moso ëli ja bë Pai dëli fë;
pakë jö ineñ shi Pai dëli ja fë,
se Mina ten ja vlame fë.
20 Pakë Pai ngongo ku Mina se ëli ja msa ëli jö ineñ shi ëli ja fë tudu;
se utu ja ngandji mashi se ëli tan ske msa namsëdji,
ku namsëdji tudu ske gua ku böjö betu.
21 Pakë amea shi Pai amu ja lanta nna nguë mölë bebezha ku ëli tan ja da ineñ vida;
se sa amea se me,
se Mina ten paadji da nguë shi ëli ja ngongo iai vida.
22 Pakë Pai amu na ja juzhga zhugan nguëf,
shina ëli da Mina dëli pödë pa juzhga nguë.
23 Valadji pa nguë tudu ja da Mina ondolo shime ku a ja da Pai.
Nguë shi na ja da Mina ondolof,
na ten ja da Pai shi da Mina bi ondolof.
24 »Anta vedadji,
anta vedadji se faa namsëdji:
Nguë shi ja tëndë fala amu,
se ëli ja këlë nguë shi da amu bi,
ske të vida chindadji,
se ëli na ske sa kondenaduf,
shina ëli ske pasa fo mölë ba vida.
25 »Anta vedadji,
anta vedadji se amu faa namsëdji:
Mandji tempu sai ska bi,
se öseshi se sa,
ta nna nguë mölidu ske tëndë fala Mina Nashiolo,
se nna nguë ineñ shi ja tëndë tudu ske të vida.
26 Pakë amea shi Pai amu të vida döma dëli,
se sa amea shi ëli ten da pa Mina ten të vida döma dëli;
27 se vlame se ëli ten da ëli pödë pa ëli juzhga nguë,
dajantu ku ëli se sa Mina Napai Dösë.
28 Namsëdji na gua ku böjö betuf,
pakë ske bi uan tempu ku nna nguë ineñ shi sa dantu spitula tudu ske tëndë fala dëli.
29 Se ineñ ske së fo dantu spitula dëneñ.
Tadashi,
se nna nguë ineñ shi fë gavu,
tan ske lanta bi vida,
mandji se nna nguë ineñ shi fë ja fëfëiu ten ske lanta bi vida pa juzhga ineñ.
30 Amu na paadji fë zhugan ja a sondji amuf,
pakë amea shi amu ja tëndë kuzhu se amu ja juzhga,
se juisio amu sa dëtu,
pakë amu na ja jua pa amu fë vintadji amuf,
shina vintadji nguë shi da amu bi,
ku sa Pai amu.
Pödë monova gavu Djisu
31 »Shi amu ja da lazhan gavu da öguë amu,
lazhan se na ske sa vedadjif.
32 Se utu dji nguë se ske da lazhan gavu da amu,
se amu sëbë fa jö ineñ shi ëli ja da lazhan tëjantu ku amu sa vedadji.
33 *Namsëdji manda ba pongota Zhuan,
se ëli da namsëdji lazhan shi sa vedadji.
34 Mandji se na fë fata pa zhugan nguë da lazhan gavu da amuf,
amu faa jö ineñ se tudu valadji pa namsëdji sava.
35 Zhuan se bi sa lapanta shi bi sa sindjidu ku bi ska dëdë;
se namsëdji bi ngongo sa ku fögö djidjidu dëli dantu uan tempu ku liguilia.
36 Mandji se amu se të lazhan gavu mashi pa amu da namsëdji mashi ku dji Zhuan.
Jö ineñ shi amu ska fë,
ku se sa jö ineñ shi Pai amu da valadji pa amu kumpli,
jö ineñ se tudu ja da lazhan fa anta vedadji ku Pai amu se da amu bi.
37 *A shime Pai amu ku se da amu bi ten ja da lazhan gavu tëjantu ku amu.
Namsëdji zhugan djia na sa tëndë fala dëli ie zhafa,
ñi na sa bë ëli jala a jala ie zhaf.
38 Namsëdji na ja lega pa fala se mdja ku namsëdjif,
pakë namsëdji na ja këlë nguë shi Pai da bif.
39 »Namsëdji tudu ja shina jö ineñ shi sa dantu Fa Nashian ku sinchidu,
pakë namsëdji ja mazhna fa fo ineñ se namsëdji ja paadji të vida chindadji;
mandji se ineñ se ja da lazhan gavu tëjantu ku amu.
40 Se namsëdji na ngongo bi toja amu pa namsëdji të vida sef.
41 »Amu na ja ma gloria ku ja bi fo öma nna pöjödölöf.
42 A shime amu jönsë namsëdji tudu se amu sëbë fa namsëdji na ngongo ku Nashianf.
43 Amu bi ku namu Pai amu,
se namsëdji na ma ëlif,
mandji se shi utu nguë ja bi a sondji döguë dëli,
se nguë sai se namsëdji ja ma.
44 ¿A kë amea shi namsëdji ja paadji këlë,
adjimese namsëdji ja ska jua pa uan nguë ja ska da utu nguë me gloria,
mandji se namsëdji na ja jua gloria shi ja bi fo ponodu Nashianf?
45 »Namsëdji na ja mazhna fa amu ske da monova fëiu namsëdji deenchi Pai amuf,
nguë shi ske da monova fëiu namsëdji ske sa Moises,
nguë shi të alagada namsëdji.
46 Pakë shi namsëdji bi ja këlë Moises,
namsëdji ten ske këlë amu,
pakë ëli skëvë tëjantu ku amu.
47 Mandji se shi namsëdji na ja këlë jö ineñ shi ku ëli skëvëf,
¿kë amea shi namsëdji ja fo këlë jö ineñ shi ku amu ja fala?».