Djisu ku mooso samaritano
4
Ta Djisu,
ba tëndë fa nna fariseo sa jamian ja faa:
Djisu ska të nna balë mashi se ëli ska bachizha nguë mashi ku Zhuan
2 (mandji Djisu na sa se bi ska bachizha nguëf,
shina nna balë dëli).
Jesús habla con una mujer samaritana (Juan 4.1-42)
3 Dajantu shi se ëli së fo Judea,
se ëli tan vlame ba Galilea.
4 Se bi fë fata pa ëli pasa dantu Samaria.
5 Se ëli ba da,
uan loso Samaria ku a ja sama Sikar,
lome matu shi ku Jakob bi da mina dëli Sandzhe.
6 Ala se bi sa ku jobo daua Jakob.
Se Djisu ku bi sa jansadu nda jamangandji,
se ëli da tusan lome jobo daua sai.
Bi sa solomedjian.
7 Se bi uan mooso Samaria bi pla aua fo jobo daua sai,
se Djisu faa ëli:
—Ta öma da amu ja daua këtë.
8 Pakë öshi nna balë dëli bi ba dantu palea ba kumpa ja pa kumu.
9 Se mooso samaritano sai kundji ëli:
—¿Jama fë bo,
ku sa judio,
ske paadji pindji amu aua,
amu ku sa uan naamain samaritano?
Pakë no nna samaritano ku nna judio na ja sa nguëf.
10 Se Djisu kundji se faa ëli:
—Shi bo ja sëbë jö shi Nashian ja paadji da,
ku pa bo jönsë kë nguë sa nguë shi ska pindji bo aua,
bo bi ske pindji ëli,
se ëli ske da bo aua ku ja da nguë vida.
11 Se mooso se faa ëli:
—Shiöla,
bo na të zhugan ja pa bo ma pla auaf,
se jobo daua se sa fundu.
¿Kë amea shi bo ja fo chila aua shi ja da nguë vida?
12 ¿Bo këlë fa bo se sa ngandji pai no Jakob,
ku ëli lega jobo daua se pë da no,
jamian shime ku ëli ku nna mina dëli ku nna ögö limaia dëli tudu bëbë?
13 Se Djisu kundji se faa ëli:
—Ja sa nguë shi ja bëbë aua se tudu,
tan ske vlame të fomu daua,
14 mandji se nguë shi ja bëbë aua shi amu ske da ëli iai,
na tan ske të fomu daua zhugan djiaf.
Pakë aua shi amu ske da ëli iai ske vla fë uan lubela daua ku ske ja jölë pa ja da vida chindadji.
15 Tadashi se mooso se faa ëli:
—Shiöla,
da amu aua sai valadji pa amu na tan të fomu dauafa,
ñi pa amu na tan bi iai bi pla auaf.
16 Se Djisu faa ëli:
—Bai pa bo ba sama medu bo,
pa bo tan vlame bi iai.
17 Se mooso sai kundji se faa ëli:
—Amu na ku meduf.
Se Djisu faa ëli:
—Bo faa gavu fa bo na të meduf,
18 pakë sa ome shinku se bo bi të iai,
se ñi ome se sa bo öseshi iai,
na sa ome bof.
Bo ska da vedadji.
19 Ta mooso se tëndë jö sai,
se ëli faa ëli:
—Shiöla,
ska da amu öiö tëndë fa bo sa uan pantafala.
20 Nna paipai no adola Nashian van iki sai,
mandji se namsëdji nna judio faa Jerusalen se sa jamian shi ta pa ja adola Nashiolo.
21 Se Djisu faa ëli:
—Mooso sai,
këlë amu,
fa tempu ske da ku namsëdji na tan ske ja adola Pai liba iki sefa ñi Jerusalenf.
22 Namsëdji na sëbë nguë shi namsëdji ja adolaf,
mandji no nna judio sëbë nguë shi no ja adola,
pakë savasan sa ja bi fo nna judio.
23 Mandji tempu sai ska bi,
se öseshi se sa,
ta nna nguë ineñ shi ja adola Nashian ske ja adola ëli ku Spitu Nashiolo ku vedadji.
Pakë amea sai se Pai ngongo pa nna nguë ineñ ja adola ëli ja sa.
24 Nashian sa spitu,
se nna nguë ineñ shi ja adola ëli tudu ske ta pa ineñ ja adola ëli ku vedadji ku amea Spitu Nashiolo.
25 Se mooso se faa ëli:
—Amu sëbë fa ske ta pa Mesias bi.
(Nguë shi a ten ja sama Kilitu).
Se ta ëli ske bi se ëli ske da no lazhan kumi jö ineñ se tudu.
26 Se Djisu faa ëli:
—Amu se sa,
nguë se ska faa ku bo iai.
27 Se sa öshi ku nna balë Djisu ten bi,
se ineñ gua ku böjö betu amea shi ineñ toja ëli ska faa ku uan naamain.
Mandji se zhugan ineñ na bi tividu pongota ëli:
«¿A kë ja ëli ska pongota?»,
ö «¿Kë lazhan bo ku ëli ska da?».
28 Tadashi se mooso sai lega galafan daua dëli se ëli vla dantu loso,
se ëli faa nguë tudu:
29 «Namsëdji bi,
pa bi ua uan masebu ku faa amu jö ineñ shi ku amu fë tudu.
¿Ëli na se ske sa Kilitu ua?».
30 Tadashi se ineñ tudu ma ja se ineñ së fo dantu loso,
se ineñ ba ua Djisu.
31 Mandji se nna balë dëli bi ska luga ëli:
—Rabi,
kumu uan kuzhu.
32 Se Djisu kundji ineñ:
—Amu të uan kumu,
ku namsëdji na jönsëf.
33 Tadashi nna balë sa fa ja pongota ineñ ineñ me:
—¿Sa fa uan nguë ma uan ja bi da ëli pa ëli kumu bebezha iai?
34 Mandji se Djisu faa ineñ:
—Kumu amu sa pa amu fë vintadji nguë shi da amu bi,
pa amu ten jaba ku tabaia shi ëli manda pa amu bi fë.
35 ¿Namsëdji na ja faa:
“Ontolo fata jatulu mëdji pa da tempu totolo kumu ua”?
Mandji se amu ska faa namsëdji:
Lanta öiö valadji pa namsëdji pia matu,
pakë ja tudu sa gavu pa lanja bebezha.
36 Se nguë shi ja shimian kuzhu ja të pagu dëli,
se ëli ja lanja kumu da vida chindadji.
Dajantu shi se nguë shi ja shimian ku nguë shi ja totolo tudu ja sa ku liguilia shime.
37 Pakë sa vedadji jö shi a ja faa iai:
“Uan nguë se ja shimian,
se utu nguë se ja lanja”.
38 Se amu manda namsëdji ba totolo jö ineñ shi ku na kuta namsëdji zhugan tabaiaf.
Utu nguë ma mavida ja tabaia,
se namsëdji bë bendezhu tabaia dëneñ.
39 Se uan sapa nna samaritano ku ja ta palea sai se tudu ba këlë dëli dajantu lazhan gavu ineñ shi mooso sai bi ska da:
«Ëli bi faa amu jö ineñ shi ku amu bi fë tudu».
40 Tadashi se nna nguë samaria bi toja Djisu,
se ineñ luga ëli pa ëli mdja ku ineñ.
Se Djisu mdja ku ineñ dösu djia.
41 Se uan sapa dji nguë ten këlë dëli ta ineñ tëndë jö ineñ shi ëli me bi ska fala.
42 Se nguë tudu bi ska faa mooso sai:
«Öseshi se no këlë,
na sa dajantu jö ineñ shi bo bi faa no mosof,
shina no no me se tëndë se no sëbë fa anta vedadji nguë sai se sa Savadölö mundu».
Djisu kula mina uan feshali dalë
43 Ta Djisu ta ku ineñ dösu djia ineñ sai,
se ëli ma ja se ëli së fo ala se ëli vla Galilea.
Jesús sana al hijo de un oficial (Juan 4.43-54)
44 *Pakë,
tuludöguë Djisu me se da ineñ lazhan gavu fa pantafala na ja të ondolo dantu tuludöguë tela dëlif.
45 *Se ta ëli ba da Galilea,
se nna nguë galilea ma ëli ku bembe gavu,
pakë ineñ tudu ten bi ba fesa Ampan shin levadura dantu Jerusalen,
se ineñ tudu bi bë jö ineñ shi ëli bi fë ala.
46 *Se Djisu tan vlame ba Kana loso Galilea,
jamian shi ëli bi të aua të vla fë vian.
Se dantu loso Kapernaum se bi ska ta uan feshali dalë,
se uan mina dëli se bi ska danchi.
47 Se ta feshali tëndë fa Djisu së fo Judea bi Galilea,
se ëli ba toja ëli se ëli luga ëli pa ëli ba jadji dëli pa ëli ba kula mina dëli shi bi sa puluntu pa ëli mölë iai.
48 Tadashi se Djisu faa ëli:
—Namsëdji na ja këlëf,
shi namsëdji na ja bë shinali ku ja ngangandjif.
49 Mandji se feshali dalë faa ëli:
—Shiöla,
amu pindji bo pa bo bi dandjian anta pa mina amu mölë.
50 Se Djisu tan vlame faa ëli:
—Tan vla jadji bo,
mina bo sa vivu.
Se masebu se ten këlë jö shi Djisu faa ëli,
se ëli ten bai.
51 Se ta masebu se ten vla jadji dëli,
se nna shividölö dëli jölë bi ma ëli jamangandji se ineñ faa ëli:
«¡Mina bo sa vivu!».
52 Tadashi se ëli pongota ineñ a kë vala ola mina dëli bi jomesa ja sinchi gavu,
se ineñ kundji ëli:
«Onte vala la unian tadji se fibil chama da ëli».
53 Tadashi se sa öshi ba da pai ötëndë fa,
vala ola sai se sa ola shi Djisu bi faa ëli:
«Mina bo sa vivu»;
se ëli ku nna nguë jadji tudu ba këlë Djisu.
54 I sai se bi sa shinali shi fë dösu ku Djisu bi fë ta ëli tan bi së fo Judea ba Galilea.