Djisu ska shina Nikodemo kuzhu
3
Bi sa ku uan masebu fariseo ku a ja sama Nikodemo,
ëli bi sa uan jasa jasa dantu nna judio.
2 Se masebu se bi bë Djisu uan nöchi,
se ëli faa ëli:
—Rabi,
no sëbë fa Nashian se da bo bi shimafan meeth,
pakë zhugan nguë na fo fë shinali ineñ se bo ska fë iai,
shi Nashian na ja sa ku ëlif.
Jesus habla con Nicodemo (Juan 3.1-21)
3 Se Djisu faa ëli:
—Anta vedadji,
anta vedadji se amu faa bo,
nguë shi a na tan ja vlame pali ëli novuf,
ëli na ske bë gövöndölö Nashianf.
4 Se Nikodemo pongota ëli:
—¿Kë amea shi a tan ja vlame pali uan nguë novu öshi ëli ja sa veiu bebezha?
¿Sa fa ëli tan ja paadji lantela ope shi fë dösu dantu chipa main dëli zha pa tan vlame pali ëli?
5 Se Djisu kundji ëli:
—Anta vedadji,
anta vedadji se amu faa bo,
fa nguë shi a na tan ja pali fo aua ku fo Spituf,
na ske fo lantela dantu gövöndölö Nashianf.
6 Jö shi a ja pali fo jañi se ja sa ja jañi,
mandji se jö shi a ja pali fo Spitu se ja sa ja spitu.
7 Bo na ja gua ku böjö betu pakë amu faa bo:
“Ta pa tan vlame pali namsëdji novuf”.
8 Se oventu ja föfö fo jamian shi ëli ja ngongo,
se benga pa bo ja tëndë fala dëli,
bo na ja sëbë jamian ëli ska pë folof,
ñi jamian ëli ska baif.
Se ten sa amea shi nna nguë ineñ shi a ten a pali fo Spitu ja sa.
9 Se Nikodemo kundji se faa ëli:
—¿Jama jö se ske paadji fë?
10 Se Djisu kundji ëli:
—¿Bo sa meeth dalë Israel,
se bo na sëbë jö ineñ sefa?
11 Anta vedadji,
anta vedadji se amu faa bo,
fa jö ineñ shi no sëbë se sa jö ineñ shi ku no ja fala,
pakë no bë,
se namsëdji na ja këlë lazhan gavu ineñ shi no ska faaf.
12 Se shi namsëdji na ja këlë no ta no ja faa ja mundu sef,
¿kë amea shi namsëdji ske këlë amu shi ja faa namsëdji jö ineñ shi sa ja dösë?
13 Zhugan nguë na sa subili ba ösë ie zhaf,
shina nguë shi dësë fo ösë,
ku se sa Mina Napai Dösë,
ku se sa amu.
14 Se amea shi Moises lanta jobolomatu donfelu fo dantu jamian sölö sölö,
se ten sa amea shi ten fë fata pa Mina Napai Dösë ten sa lantadu,
15 valadji pa nna nguë ineñ shi ja këlë dëli tudu,
na ja pëndëf,
mandji pa të vida chindadji.
Nashian ngongo ku mundu batanchi
16 »Pakë amea sai se Nashian ngongo ku mundu batanchi,
ku ëli da ponodu Mina dëli,
valadji pa ja sa nguë shi tudu ja këlë dëli iai,
na ja mölëfa,
shina pa ja të vida chindadji.
17 Pakë Nashian na da Mina dëli bi mundu pa bi kondena munduf,
shina pa ëli se bi sava mundu.
18 »Nguë shi ja këlë dëli,
na tan sa kondenaduf,
mandji se nguë shi na ja këlë dëlif,
ëli sa kondenadu bebezha,
pakë ëli na ja këlë namu ponodu Mina Nashianf.
19 Jö sai se jö shi ja kondena:
fa fögö djidjidu bi mundu,
mandji se mundu nguintëlu nguintëlu ba ngongo ku jamian kulu kulu mashi ku fögö djidjidu pakë fidu ja dëneñ bi sa ja fëfëiu.
20 Pakë nna nguë ineñ shi ja ska fë ja fëfëiu tudu,
ja ska të pashian fögö djidjidu;
se ineñ na ja iaba jamian të fögöf dajantu pa na ja bë ja fëfëiu ineñ shi ku ineñ ja ska fë.
21 Mandji se nna nguë ineñ shi ja ska fë fidu ja vedadji se ja ska iaba lome fögö djidjidu,
valadji pa ja bë limpi pepepe fa fidu ja dëneñ fa ja sa ku vintadji Nashiolo.
Zhuan Bachita tan ska da lazhan gavu Djisu
22 Ta jö ineñ se tudu pasa,
se Djisu ku nna balë dëli ba da loso loso Judea,
ala se ëli ta uan tempu ku ineñ,
ja bachizha nguë.
Juan testifica acerca de Jesús (Juan 3.22-36)
23 Se Zhuan ten bi sa loso Enon,
lome uan jamian ku a ja sama Salim,
ja bachizha nguë,
pakë ala se bi sa ku uan sapa daua,
se nguë tudu bi ja bai valadji pa ja bachizha ineñ.
24 *Jö ineñ se tudu bi shiga anta ja fë pa mëtë Zhuan pë djili.
25 Tadashi se nna balë Zhuan bi të uan djisputa ku uan masebu judio tëjantu ku amea shi a ja limpa nguë.
26 Se ineñ ba bë Zhuan se ineñ faa ëli:
—Rabi,
masebu shi ku bo bi sa benda benda sala lubela Jordan,
nguë shi bo da lazhan gavu dëli iai,
öseshi ëli sa ala ja bachizha nguë,
se nguë tudu ja vla ba toja ëli.
27 Se Zhuan kundji ineñ se faa ineñ:
—Zhugan nguë na paadji fë zhugan ja shi na ja sa ja Nashian se da ëli fo ösëf.
28 *Namsëdji me se tudu tëndë lazhan fa amu bi faa:
“Amu na se sa Kilituf,
shina amu se sa nguë a da bi deenchi dëli”.
29 Dantu uan jazha,
nguë shi ja sa ku miela se ja sa pai jazhadu,
mandji se jamada pai jazhadu,
ku sa lome dëli se ja tëndë fala dëli se sa ku liguilia.
Se liguilia amu sai ske ja kumpli.
30 Fë fata pa ëli këësë,
valadji pa amu munga.
31 »Se nguë shi ja së fo liba se ja sa liba nguë tudu,
se nguë shi sa nguë tela,
ëli sa nguë san tela,
se ja san tela se ëli ja ska fala.
Mandji se nguë shi bi fo ösë se sa liba nguë tudu.
32 Se ëli ja da lazhan jö shi ku ëli bë ku ëli tëndë,
mandji se zhugan nguë na ja ma jö shi ku ëli ja falaf.
33 Mandji se nguë shi ja ma ëli,
ja ska da lazhan fa Nashian sa vedadji.
34 Pakë nguë shi Nashian da bi,
nova Nashiolo se ëli ja fala,
pakë Nashian ja da ëli Spitu dëli shin mindjida.
35 *Se Pai ngongo ku Mina,
se ëli lega ja tudu pë öma dëli.
36 Se nguë shi ja këlë Mina dëli se ja të vida chindadji,
mandji se nguë shi na ja këlë Mina dëlif na ske të vida sef,
shina pashian Nashian se ske sa ku ëli.