EVANJELIO KU
SAN ZHUAN
SKËVË
Fala vla fë napai
1
Fo jomesadu se bi të Palavulu,
se Palavulu sai bi sa ku Nashiolo,
se Palavulu sai bi sa Nashiolo.
2 Ëli bi sa ku Nashiolo fo jomesadu.
La Palabra (Juan 1.1-18)
3 Se amea dëli se a mindji ja tudu,
se shin ëli,
zhugan jö ineñ se sa fidu iai,
na bi ske saf.
4 Dantu dëli se vida bi sa,
se vida sai bi sa fögö djidjidu mundu nguintëlu nguintëlu.
5 Se fögö djidjidu sai ja dëdë dantu jamian kulu kulu,
se jamian kulu kulu na bi paadji paka ëlif.
6 *Bi të uan masebu ku Nashian da bi,
ku a bi ska sama ëli Zhuan,
7 se ëli bi valadji pa ëli da lazhan gavu fögö djidjidu,
valadji pa nguë tudu këlë da jö ineñ shi ku ëli ska fala.
8 Zhuan na se bi sa fögö djidjiduf,
shina uan nguë a da bi pa da lazhan fögö djidjidu.
9 Fögö djidjidu shi shishizhu ku ske bi dëdë pë mundu nguintëlu nguintëlu,
bi ske bi mundu sai.
10 Nguë shi se bi sa fögö djidjidu bi sa mundu bebezha,
ku mundu sai bi sa ja ku ëli bi mindji,
mandji se nna nguë mundu se na bi jönsë ëlif.
11 Ëli bi da nna nguë dëli,
mandji se nna nguë dëli na ma ëlif.
12 Mandji se nna nguë ineñ shi ja ma ëli tudu
ku ja këlë namu dëli,
se ëli da ineñ pödë pa ineñ sa nna mina Nashiolo.
13 A na ja pali ineñ fo sanguifa,
ñi amea dishamentu pöjödölöfa,
ñi amea dishamentu napaif,
shina a pali ineñ fo Nashiolo.
14 Nguë shi se sa Palavulu se vla fë pöjödölö,
se ëli ta dantu no.
Se no bë gloria dëli,
gloria ku sa ja ëli ma fo Pai dëli,
pakë ëli moso se sa ponodu Mina Pai dëli,
se ëli bi sa shia galasa ku vedadji.
15 Zhuan bi da lazhan gavu da ëli,
ku falagochi ja faa:
«Nguë sai se sa nguë shi amu bi ska faa tëjantu ku ëli:
“Nguë shi ske bi tashi amu,
se ske sa nguë shi ngandji mashi ku amu,
pakë ëli se bi sa pimëlu amu”».
16 Fo amea shi ëli sa shia gola gola se no tudu ma,
galasa liba galasa.
17 Mandji alë sa ja a da amea Moises,
mandji galasa ku vedadji tudu sa ja bi fo amea Djisukilitu.
18 Zhugan nguë na sa bë Nashiolo ie zhaf,
ponodu Mina dëli,
ku sa Nashiolo ku ja ta ku ëli zhuntadu ku Pai dëli,
se ëli se sa nguë shi lega no pa no jönsë ëli.
Zhuan Bachita ska da lazhan Djisu
19 I sai se sa lazhan gavu Zhuan,
ta nna jasa jasa nna judio ku nna padjil ku nna levita fo Jerusalen manda pa ba pongota Zhuan kë nguë sa ëli.
Juan el Bautista identifica al Mesías (Juan 1.19-34)
—Amu na se sa Kilituf.
21 Se ineñ tan vlame pongota ëli:
—¿Kë nguë sa bo?
¿Bo sa pantafala Elias?
Se Zhuan faa:
—Na,
amu na se saf.
Se ineñ tan faa ëli:
—Tadashi,
¿bo se sa pantafala shi bi ska bi iai?
Se ëli kundji ineñ:
—Na.
22 Se ineñ faa ëli:
—¿Kë nguë sa bo?
No ta pa ma uan lazhan ba da nna nguë ineñ shi manda no bi.
¿A kë ja bo ja faa döguë bo?
23 Se Zhuan kundji ineñ amea shi pantafala Isaias bi bi faa:
«Amu se sa falagochi nguë shi ja ta kidëlë dantu jamian sölö sölö:
“Bla jamangandji dëtu Shiölö”».
—Se shi bo na se sa Kilituf,
ñi bo na sa Elias ñi uan pantafalaf,
¿jama fë bo ska bachizha nguë?
26 Se Zhuan kundji ineñ ja faa:
—Amu ja bachizha nguë ku aua,
mandji dantu namsëdji sa ku uan nguë ku ontolo namsëdji na jönsëf.
27 Nguë sai se sa nguë shi ske bi tashi amu,
nguë shi se sa deenchi amu,
ku sa nguë shi amu na të ondolo shi pa amu sota jodo ja mëtëpope dëlif.
28 Jö ineñ se tudu sa ja shiga loso Betania,
benda benda sala lubela Jordan,
jamian shi Zhuan bi ska bachizha nguë.
Djisu, Mina Jabala Nashiolo
29 Ta tan da amaian shi se Zhuan bë Djisu amea shi ëli bi ska shiga ba lome dëli,
se ëli faa:
«Namsëdji pia,
nguë sai se sa Mina Jabala Nashian shi,
ku ja chila pekadu fo mundu.
30 Nguë sai se sa nguë shi amu bi ska faa:
“Tashi amu ske bi uan napai,
nguë shi se sa deenchi amu,
pakë ëli se bi sa pimëlu amu”.
31 Ñi tuludöguë amu,
amu na bi jönsë ëlif,
valadji pa ëli paadji msa öguë pövu Israel,
se sa jö shi fë ku amu bi bachizha nguë ku aua».
32 A shime Zhuan ten da lazhan gavu,
ja faa:
«Amu bë Spitu ku bi ska dësë fo ösë shimafan uan löla,
se ëli mdja liba dëli.
33 Se amu na bi jönsë nguë shi ëli bi saf,
mandji se Nashian shi manda amu bi bachizha ku aua iai,
se faa amu:
“Nguë shi bo ja bë Spitu Santu dësë se baba liba dëli iai,
se sa nguë shi ske bachizha nguë ku Spitu Santu”.
34 Se amu se bë,
se amu da lazhan gavu da nguë sai faa ëli se sa Mina Nashiolo».
Nna pimëlu pimëlu balë Djisu
35 Ta da amaian shi se Zhuan tan bi sala ku nna balë dëli dösu.
Los seguidores siguen a Jesús (Juan 1.35-51)
36 Se ta ëli ba bë Djisu bi ska pasa ala,
se ëli faa:
«¡Namsëdji pia,
ëli se sa Mina Jabala Nashiolo!».
37 Se ta nna balë dösu ineñ se tëndë Zhuan faa jö ineñ sai,
se ineñ ba lë Djisu.
38 Se Djisu vla öiö,
se ta ëli ba bë fa a ska lë ëli,
se ëli pongota ineñ:
—¿Kë ja namsëdji ska jua?
Se ineñ faa ëli:
—Rabi,
¿kë jamian bo ja ta?
(Rabi sa ku sinchidu:
Meeth).
39 Se Djisu kundji ineñ:
—Namsëdji bi pa namsëdji bi bë.
Se ineñ ten bai,
se ineñ bë jamian shi ëli bi ska ta,
se djia shime se ineñ mdja ku ëli,
pakë bi sa vala la jatulu tadji bebezha.
40 Uan ineñ dösu ineñ se ku bi tëndë Zhuan ku ba lë Djisu,
bi sa Andëlë,
ku bi sa namain Shiman Pudul.
41 Pimëlu nguë Andëlë bi dajonta ku ëli bi sa namain dëli Shiman,
se ëli faa ëli:
«No la dajonta ku Mesias» (ku se sa «Kilitu»).
42 Tadashi se Andëlë ma Shiman ba jamian shi Djisu bi sa,
ta Djisu pia ëli gavu,
se ëli faa ëli:
«Bo se sa Shiman,
mina Zhuan,
mandji öseshi a ske ja sama bo Sefas» (ku se sa «Pudul»).
Djisu sama nna balë dëli Filipa ku Natanael
43 Ta da amaian shi,
se Djisu bi ngongo ba Galilea,
se ëli dajonta ku Filipa,
se ëli faa ëli:
«Lë amu».
44 Se Filipa bi sa nguë loso Betsaida,
ku se ten bi sa loso Andëlë ku Pudul.
45 Se Filipa ba jua Natanael,
se ëli faa ëli:
—No la dajonta ku nguë shi ku se sa nguë shi Moises bi skëvë da ëli dantu alë,
ku a shime nna pantafala:
Ku se sa Djisu,
mina Sandzhe,
nguë shi Nasaret.
46 Se Natanael faa ëli:
—¿Fo Nasaret ja paadji së uan ja gavu?
Se Filipa kundji ëli:
—Bi pa bo bi bë.
47 Se ta Djisu ba ku öiö ba bë Natanael ska bi,
se ëli faa:
—Nguë sai sa uan nguë Israel ineñ shi shishizhu,
ku na të fanchila pa da ku ëlif.
48 Se Natanael pongota ëli:
—¿Jama fë bo jönsë amu?
Se Djisu kundji ëli:
—Anta ja fë pa Filipa sama bo,
öshi ontolo bo sa basu abada sala,
se amu bë bo.
49 Se Natanael kundji se faa ëli:
—Rabi,
bo se sa Mina Nashiolo,
bo se sa Alë Israel.
50 Se Djisu kundji se faa ëli:
—¿Dajantu amu faa bo,
amu bë bo basu abada,
se bo këlë?
Ja ngandji mashi ku jö sai se bo ske bë.
51 Se Djisu tan vlame faa ëli:
«Anta vedadji,
anta vedadji se amu faa namsëdji fa namsëdji ske bë ösë betu,
se namsëdji ske bë nna anzhu anzhu Nashian ja subili ku ja dësë ba liba Mina Napai Dösë».