Dantu evanjelio jatulu ineñ shi sa dantu Fa Nashiolo, dji Zhuan se sa i shi ja msa gavu mashi amea santu shi ku ëli bi së folo ku amea shi Djisukilitu sa chindadji. Zhuan ja jomesa ja da fala shishizhu fa: anta pa ja tudu bi jomesa Fala bi sa bebezha (1:1), se ëli tan vlame faa: nguë shi ku se sa Fala bi ja ta dantu no se ëli bi sa shimafan uan nguë no (1:14). Ku uan fala shipë, mandji ku uan sinchidu ngandji, se Zhuan ja pa sala msa fa: nguë sai ku se sa Fala ku Djisu, Mina Nashiolo ku Alë Israel (1:43-49).

Se fo jonfesa jonfa sai, se skëvëdölö evanjelio sai ja ma kapitulo deshi ku unian ineñ sai valadji pa ëli msa pödë shi sa ku Djisu, valadji pa ëli ja fë fidu ja ngangandji: ëli ja të aua të vla fë vian (2:1-11), ëli ja kula mina uan feshali nna nguë roma (4:43-54), ëli ja fë pa uan ojogo ja nda (5:1-18), ëli da milidji shinku ku mashi pöjödölö kumu (6:1-14), ëli nda liba daua (6:16-20), ëli ja pada pekadu (8:2-11), ëli fë pa uan sebu bë kuzhu (9:1-11), se a shime ëli ten fë pa uan nguë mölidu tan lanta bi vida (11:1-44).

Uan ja ngandji ineñ shi sa dantu evanjelio sai, sa amea shi Djisu ja msa tuludöguë dëli. Ëli sa «ampan vida» (6:35), fögö djidjidu shi ja dëdë pë nna nguë mundu sai (8:12), «ludjadölö jabala shi gavu» (10:11), nguë shi ja da nguë vida ku ja fë ku nna nguë mölë bebezha tan ja lanta bi vida (11:25), ëli se sa jamangandji, ëli se sa vedadji se ëli sa vida (14:6), se ëli se sa pali döpa uva shi shishizhu (15:1).

Evanjelio Zhuan sa ku vedadji ineñ sai ku utu mashi tëjantu ku Djisu ku ëli ja fala ku tuludöguë faa dëli: «Pakë amea sai se Nashian ngongo ku mundu batanchi, ku ëli da ponodu Mina dëli, valadji pa ja sa nguë shi tudu ja këlë dëli iai, na ja mölëfa, shina pa ja të vida chindadji» (3:16). Se fë ku Zhuan lega evanjelio sai pë da no amea skividu taba vedadji ngandji sai, «valadji pa namsëdji këlë fa Djisu se sa Kilitu, Mina Nashiolo, se valadji pa ta namsëdji ja këlë namu dëli pa namsëdji ja të vida chindadji» (20:31).