2 Se ineñ toja a vla budu spitula folo,

3 se ta ineñ lantela,

se ineñ na bë mochi Shiölö Djisu alaf.

4 Se öshi ontolo ineñ ska pongota jö shi shiga ala,

ja pia,

se bi deenchi dëneñ,

napai dösu ku bitidu ku ja chila blin.

5 Se mendu ma ineñ,

se ineñ dajözhöiö ku jala san,

mandji se ineñ faa ineñ:

«¿Ja fë namsëdji ska jua dantu nna nguë mölidu uan nguë ku sa vivu?

6 ^*Ëli na sa ief,

¡ëli tan lanta!

Namsëdji lambela jö ineñ shi ku ëli bi faa namsëdji ta ontolo ëli bi sa ku namsëdji Galilea iai,

7 ta pa vëndë Mina Napai Dösë pa da ëli pë öma nna pekadölö,

se a ske da dëli pë kusu,

mandji se ëli tan ske lanta bi vida ta ja da tëishi djia».

8 Tadashi se sa öshi ineñ ba lambela fala dëli,

9 se ta ineñ tan së fo spitula ku ineñ ba da jamian shi nna apostol deshi ku uan ku nna utu nguë lazhan jö ineñ shi pasa tudu.

10 Se ineñ bi sa Malia Magdalena,

ku Zhana ku Malia,

main Sanchagu,

ku utu naamain ku ineñ.

Mandji se nna apostol na këlë lazhan dëneñf,

11 pakë ineñ bi ska pia fala dëneñ shimafan ja danadu,

se fë ineñ na këlë ineñf.

12 Mandji se Pudul,

lanta,

se jölë ba spitula;

se ëli kuia pa ëli bë dantu,

se ëli bë lesa lesa panu moso.

Tadashi se ëli tan vla jadji,

ja mazhna jö ineñ shi shiga ala iai ku böjö betu.

13 Dantu djia se me se nna balë dëli dösu ku bi ska uan loso ku a ja sama Emaus,

ku ja ta uan deshi kilometro ku unian fo Jerusalen.

14 Se ineñ bi ska be ja da lazhan ku ineñ me jö ineñ shi bi shiga iai.

15 Se ta ineñ bi ska be ja da lazhan ja pufia,

se Djisu iaba jamian dëneñ se jomesa ja nda ja bai ku ineñ,

16 mandji se ineñ na bi jönsë ëlif,

pakë öiö dëneñ bi sa tapadu.

17 Se ëli pongota ineñ:

—¿Kë pachi lazhan ineñ se namsëdji ska da ku namsëdji me a ma namsëdji ska nda ja bai iai?

Se ineñ da fë jö pë,

ku fesan dëneñ modoia;

18 se uan ineñ,

ku a ja sama Kleofas,

se kundji ëli:

—¿Bo moso se sa nguë patadu ku ska ta Jerusalen ku na tëndë jö ineñ shi shiga djia ineñ se alaf ua?

19 Tadashi se ëli pongota ineñ:

—¿Kë jö ineñ shi shiga?

Se ineñ faa ëli:

—Ja tëjantu ku Djisu Nasaret,

ku bi sa uan pantafala,

ku pödë fidu ja ngangandji ku fala deenchi Nashiolo ku deenchi pövu tudu.

20 Mandji se nna jasa jasa padjil ku nna gövöndölö no vëndë ëli valadji pa kondena ëli pa ëli mölë,

se a da ëli pë kusu.

21 No bi ska gada fa ëli se bi ske sa nguë shi bi ske sava pövu Israel.

Mandji se ödjai se fë tëishi djia ku jö ineñ se tudu shiga.

22 »Tan vlame se zhugan naamain ku ten sa nguë dantu no ten sombela no.

Se pamasedu kulu kulu,

se ineñ ba spitula,

23 mandji se ineñ na bë mochi dëlif.

Se ta ineñ tan bi,

se ineñ ska da no lazhan fa ineñ bë zhugan nna anzhu ku faa ineñ ëli sa vivu.

24 Se zhugan nna nguë no ten ba spitula,

se ineñ ten dajonta amea shi naamain ineñ sai bi faa iai,

mandji se ineñ na ëli bë ëli alaf.

25 Tadashi se Djisu faa ineñ:

—¡Ja fë namsëdji sa danadu ku kusan ödu se ja fë namsëdji na fo këlë jö ineñ shi nna pantafala Nashian bi faa namsëdjif!

26 ¿Na bi fë fata pa Kilitu padësë jö ineñ se tudu anta pa ëli lantela dantu gloria dëli ua?

27 Tadashi se ëli jomesa fo Moises,

ku nna pantafala Nashian tudu,

se ëli ska da ineñ lazhan jö ineñ shi Fa Nashian fala tëjantu dëli.

28 Ta ineñ bi ska da lome loso shi ineñ bi ska bai,

se Djisu fë shimafan ja ëli ska be löndji mashi.

29 Mandji se ineñ manda ëli:

«Mdja ku no iai,

pakë tadji ska ma,

se nöchi ska kubili bebezha».

Tadashi se ëli lantela,

se ëli mdja ku ineñ.

30 Se ta ëli ku ineñ tusan mezha,

se ëli ma ampan se ëli da dezhupaga,

se ëli pachi se ëli da ineñ.

31 Tadashi se sa öshi öiö dëneñ tudu ba bla se ineñ ba jönsë ëli,

mandji se ëli së fo vita dëneñ ku supichi.

32 Se uan ineñ faa utu ineñ:

«¿Kusan no na bi ska dëdë ku fögö,

öshi ëli bi ska da lazhan ku no jamangandji ku ëli bi ska bla Fa Nashian da no ua?».

33 Se ola shime se ineñ ten lanta,

se ineñ tan vla Jerusalen.

Se ala se ineñ dajonta ku nna balë uan deshi ku uan zhuntadu,

ku nna nguë ineñ shi bi sa ku ineñ.

34 Se ineñ bi ska faa:

«Sa fala shishizhu ku Shiölö no tan lanta se ëli së Shiman ku supichi».

35 Tadashi se ineñ da lazhan jö ineñ shi shiga ineñ jamangandji,

amea shi ineñ ba jönsë Djisu öshi ëli pachi ampan.

36 Öshi ontolo ineñ bi ska da lazhan jö ineñ sai,

se tuludöguë Djisu ba metadji dëneñ,

se ëli faa ineñ:

«Padji sa ku namsëdji».

37 Mandji se ineñ tudu sombela,

se mendu ma ineñ se ineñ mazhna fa ineñ ska bë uan spitu.

38 Se ëli pongota ineñ:

«¿Ja fë namsëdji sombela amea sai?

¿Ja fë namsëdji sa ku butanja dantu kusan namsëdji?

39 Namsëdji pia öma amu ku ope amu.

¡Tuludöguë amu se sa!

Namsëdji papa amu ku öma pa namsëdji bë,

uan spitu na ja të jañi ñi osof,

amea se namsëdji ska bë fa amu të ief».

40 Ta ku ëli faa ineñ jö sai,

se ëli msa ineñ öma dëli ku ope dëli.

41 Mandji se öshi ku ineñ na bi ska këlëf,

dajantu liguilia ku böjö betu,

se ëli pongota ineñ:

«¿Namsëdji të uan ja pa kumu?».

42 Tadashi se ineñ da ëli uan dasu pishi sadu.

43 Se ëli ma se ëli kumu deenchi dëneñ.

44 Zha se ëli faa ineñ:

«Ta ontolo amu bi sa ku namsëdji,

se amu bi ska faa namsëdji fa,

ske ta pa jö ineñ se sa skividu tëjantu ku amu dantu Alë Moises,

ku nna pantafala Nashian ku dantu Salmos tudu kumpli».

45 Tadashi se tëndëmentu dëneñ bla pa ineñ fo tëndë Fa Nashiolo,

46 se ëli faa ineñ:

«Se sa amea shi sa skividu,

fa Kilitu ske padësë,

se ëli ske lanta bi vida fo dantu nna nguë mölidu ta ske da tëishi djia.

47 Pa ja pegua ku namu dëli pa tan vla ku ope tashi ku pa ten ja pada pekadu tela tela tudu ja jomesa fo Jerusalen.

48 Se namsëdji se sa nna nguë ineñ shi ja da lazhan gavu jö ineñ se tudu.

49 ^*»Amu ske manda jö shi Pai amu plomëtë namsëdji iai,

mandji ta pa namsëdji mdja Jerusalen ba toja,

ta a ja bishi namsëdji ku pödë shi ja bi fo ösë».

50 ^*Tadashi se Djisu ma ineñ ba loso Betania,

se ëli lanta öma se ëli da ineñ besa.

51 Se öshi ëli ska da ineñ besa,

se ëli safa fo ineñ,

se a ma ëli ba ösë.

52 Tadashi,

se nna balë dëli bi ska adola ëli,

zha se ineñ tan vla Jerusalen ku liguilia ngandji.

53 Se djia tudu se ineñ bi ja sa dantu jadji Nashian nna judio,

ja adola Nashiolo.