Djisu deenchi Pilatu
23
Tadashi se nna nguë ineñ shi sa zhuntadu lanta se a ma Djisu ba deenchi Pilatu.
LUK 23.1-25
2 Se ineñ jomesa ja juzhga ëli ja faa:
«No dajonta ku masebu se ja lanta pedji dantu nna nguë tela no,
ja faa pa na ja da Sesar pagu tesuf,
se ëli ten ska faa ëli se sa Kilitu,
uan alë».
3 Tadashi se Pilatu pongota ëli:
—¿Bo se sa Alë nna judio?
Se ëli kundji:
—Bo se fala.
4 Se Pilatu faa nna jasa jasa padjil ku nna pövu:
—Amu na ska toja zhugan ja fëiu shi pa masebu sai sa ku kupaf.
5 Mandji se ineñ ontolo bi ska faa:
—Ku shina ja dëli se ëli ska lanta pedji dantu pövu Judea tudu,
jomesa fo Galilea shi bi toja iai.
Djisu deenchi Erodes
6 Se ta Pilatu tëndë jö sai,
se ëli pongota i shi Djisu sa nguë galilea.
7 Se öshi ëli ba sëbë fa Djisu sa nguë pachi tela shi Erodes sa gövöndölö,
se manda ëli ba da Erodes,
ku ten bi sa Jerusalen tempu sai.
8 Ta Erodes bë Djisu,
se lantela ëli uan liguilia,
pakë fo tempu löngö se ëli bi ngongo bë ëli dajantu jö ineñ shi ëli bi tëndë tëjantu ku ëli iai,
se ëli bi ska gada pa ëli bë uan shinali ineñ shi ëli bi ske fë.
9 Se ëli pongota Djisu uan sapa kuzhu,
mandji se ëli na kundji ëli zhugan jaf.
10 Se nna jasa jasa padjil ku nna meeth dalë bi ska mucha ödu da ëli.
11 Tadashi se Erodes ku nna sodadji dëli sa fa ja nozho ëli ku ja li ëli,
se ineñ bishi ëli uan bobolonda dondolo se ineñ tan vlame da ëli ba da Pilatu.
12 Se Erodes ku Pilatu tan vla fë jamada djia sai,
pakë tudjia ineñ bi sa namigu ku ineñ me.
A manda Djisu ba mölë, benga zha pa ëli sa nasenchi
13 Tadashi se Pilatu zhunta nna jasa jasa padjil,
nna nguë gövöndölö tela ku nna pövu.
14 Se ëli faa ineñ:
«Namsëdji ma masebu se bi da amu faa ëli ska lanta djiskatudjia dantu pövu,
mandji se amu golo ëli deenchi namsëdji,
se amu na ska bë kupa pedji shi namsëdji ska faaf.
15 Se ñi Erodes na ten bë kupa pedji ku ëlif,
se fë ku ëli tan da ëli bi no.
Amea shi namsëdji paadji bë,
ëli na fë zhugan pedji pa mësë pa chila ëli vida folof.
16 Se fë amu ske da odji pa da ëli ku valasöchi zha pa lega ëli bai».
17 Se ëli bi sa ku dishamentu pa ëli sota unian da ineñ dantu fesa tudu.*+
18 Se möi pöjödölö tudu ta kidëlë ku uan falagochi soso:
«¡Chila masebu se fo iai,
pa bo sota Barabas da no!».
19 A bi mëtë ëli pë djili pakë ëli bi lanta uan pedji dantu tela,
ku dajantu ku ëli chila nguë vida folo.
20 Se dajantu ku Pilatu bi ngongo sota Djisu pa ëli bai dëli,
21 se fë ëli tan vlame faa ineñ,
mandji se ineñ ontolo ska ta kidëlë:
«¡Da ëli pë kusu!
¡Da ëli pë kusu!».
22 Se ëli tan faa ineñ ope shi tëishi:
«¿Kë ja fëiu ku nguë sai fë?
Amu na bë fa ëli sa kupa zhugan ja pa ëli mësë pa ëli mölëf,
dajantu shi amu ske da odji pa jatiga ëli zha se amu ske sota ëli».
23 Mandji se ineñ bi ska ta kidëlë mashi ja faa ta pa chila ëli vida folo dadu pë kusu;
se falagochi dëneñ ba së mashi.
24 Tadashi se Pilatu fë jö shi ku ineñ bi ska pindji.
25 Se ëli lega masebu shi ineñ bi ska pindji iai,
nguë shi dajantu djiskatudjia ku chila nguë vida folo se a bi mëtë ëli pë djili iai;
se ëli da ineñ Djisu pa ineñ fë ku ëli jö shi ja sa vintadji dëneñ.
A da Djisu pë kusu
26 Öshi ineñ ska ma ëli ja bai,
se ineñ të uan masebu ku a ja sama ëli Shiman,
ku sa uan nguë loso loso Sirene,
ta ëli bi ska së fo matu,
se a ligui kusu pë liba dëli valadji pa ëli gaga ja lë Djisu tashi.
LUK 23.26-43
27 Se uan sapa nguë bi ska lë Djisu,
se ten bi të uan sapa naamain ku bi ska sula ja fë dödö dajantu dëli.
28 Se Djisu vla öiö da ineñ se faa ineñ:
«Naamain Jerusalen,
na tan sula da amuf,
sula da öguë namsëdji ku da nna mina namsëdji.
29 Pakë djia djia ske bi bi ku a ske ja faa:
“¡Besa se ske sa ku naamain ineñ shi na paadji pali minaf,
ineñ shi ku na palif ñi na da mina mamaf!”.
30 *Tadashi se ineñ ske faa iki ineñ se:
“Namsëdji pono da liba no”,
se ineñ ten ske faa nna iki:
“¡Ntela no!”.
31 Pakë,
shi jö sai se ineñ ja fë ku ope döpa ta ja sa vëdji,
¿kë ja na ske shiga ku i shi sojaduf?».*+
32 A shime a ten bi ska be utu nguë dösu ku sa nguë fë ja fëfëiu,
valadji pa ten ba chila ineñ vida folo.
33 Ta ineñ ba da jamian shi a ja sama Kalavera,
ala se ineñ da ëli pë kusu,
zhuntadu ku nna nguë fë ja fëfëiu,
uan nguë benda dëtu se nguë shiki benda skedji.
34 Se Djisu faa:
«Pai amu,
pada ineñ,
pakë ineñ na sëbë jö shi ineñ ska fëf».
Se nna sodadji pachi bitidu dëli ja jua suleta.
35 Se pövu bi sa ala ja ua,
se ba toja nna jasa jasa tela bi ska li ëli,
faa ëli:
«Ëli sava utu nguë,
ten sava tuludöguë dëli me shi ëli se ja sa Kilitu Nashiolo,
nguë shi Nashian se ma».
36 A shime nna sodadji ten iaba ope dëli valadji pa ineñ ba li ëli.
Se ineñ ma viniligui bi da ëli.
37 Se ineñ ja faa ëli:
«Shi bo se ja Alë nna judio,
¡sava tuludöguë bo me!».
38 Se bi sa ku zhugan latela skividu pë van jasa dëli,
ku bi ska faa:
«Nguë sai se sa Alë nna judio».
39 Se uan nna nguë fë ja fëfëiu ineñ shi ku bi sa pindjadu iai,
jomesa ja suta ëli ja faa ëli:
«¿Bo na se sa Kilitu ua?
¡Sava tuludöguë bo pa bo ten sava no!».
40 Mandji se nguë shi fëiu shiki lonja öiö da ëli,
ja faa:
«¿Ñi bo na ja mendu Nashian öseshi ku bo sa kondenadu pa bo mölëfa?
41 No mësë pa no mölë da ja fëfëiu ineñ shi no fë,
mandji se masebu se na fë zhugan ja fëiuf».
42 Zha se ëli faa:
—Djisu,
bo ja lambela amu ta bo ja sa gövöndölö bo iai.
43 Se Djisu faa ëli:
—Anta vedadji se amu plomëtë bo fa ödjai bo ske sa ku amu dantu paraiso.
Mölë Djisu
44 Se ta bi sa vala solomedjian ba toja tetadji se liba tela tudu vla kulu kulu.
LUK 23.44-56
45 Se solo vla kulu.
Se panu dantu jadji Nashiolo baga fë metadji dösu.
46 Tadashi se Djisu ta kidëlë ku uan falagochi atu se ëli faa:
«Pai,
öma bo se amu lega spitu amu pë».
Ta ëli faa jö sai se ëli lanja alma.
47 Ta feshali sodadji roma shi bi sa ala bë jö ineñ shi shiga ala,
se ëli da Nashian gloria ja faa:
«¡Anta vedadji masebu sai bi sa uan nguë dëtu!».
48 Se ta nna nguë ineñ shi tudu zhunta pë ala valadji pa ineñ bë ja tudu,
se ta ineñ tudu bë jö ineñ shi shiga ala,
se ineñ bi ska be ja ligui öma da böjö kusan.
49 *Mandji se nna jönshidu dëli tudu,
a shime nna naamain ineñ shi lë ëli fo Galilea,
se ineñ bi mdja fo löndji ja pia.
A da Djisu spitula
50-51 Ala bi sa ku uan masebu ku a ja sama ëli Sandzhe,
ku sa uan nguë palea Arimatea,
loso loso Judea.
Se ëli bi sa uan nna nguë pachi Zhunta shi Ngandji nna judio,
se ëli bi sa uan masebu gavu ku dëtu.
Se benga zha pa ëli na bi ngongo ku jö ineñ shi ineñ fëf ai,
ëli ten bi ska gada gövöndölö Nashiolo.
52 Se ëli ba bë Pilatu se ëli pindji ëli mochi Djisu.
53 Se ta ëli da ëli bi basu,
se ëli boshia ëli ku uan sabana,
se a pë ëli dantu uan spitula ku bi sa jobodu pë dantu uan lapa,
ku a na bi sa ntela zhugan nguë pëf.
54 Se bi sa djia shi a ja fë vadu ja pa djiskansa djasubudu,
ku bi ske jomesa goleme.