Judas ske vëndë Djisu
22
Bi sa peetu djia fesa Ampan shin levadura,
i shi ku a ja sama Paskua.
LUK 22.1-38
2 Se nna jasa jasa padjil ku nna meeth dalë bi ska jua amea shi pa ineñ chila Djisu vida folo,
pakë ineñ bi ska mendu pövu.
3 Tadashi se Satanas lantela dantu Judas,
ku a ten ja sama ëli Iskariote,
ku ëli bi sa uan nna deshi ku dösu.
4 Se ëli bai se ëli faa ku nna jasa jasa padjil,
ku nna jatan nna guada jadji Nashiolo,
valadji pa ineñ da lazhan amea shi ku ëli ske vëndë Djisu da ineñ.
5 Se fë gavu da ineñ se ineñ faa ëli a ske da ëli djiëlu.
6 Se Judas faa shiën,
se ëli jomesa ja jua uan fölöshö jamian valadji pa ëli ba vëndë Djisu da ineñ ta na ja të zhugan nguëf.
Djisu ku nna balë ska fë vadu kumu Paskua
7 Ta da djia fesa Ampan shin levadura,
ku ta pa fë jabala Paskua saklifisu.
8 Se Djisu manda Pudul ku Zhuan,
se ëli faa ineñ:
—Namsëdji bai pa ba fë vadu jö ineñ shi valadji pa no kumu djia Paskua.
9 Se ineñ pongota ëli:
—¿Kë jamian bo ngongo pa no fë vadu pë?
10 Se ëli kundji ineñ:
—Ta namsëdji ske lantela dantu palea se namsëdji ske dajonta ku uan masebu ku ska gaga uan polon daua ngandji,
se namsëdji ja lë ëli ba da jadji shi ëli ja lantela,
11 se namsëdji ja faa shiölö jadji sai:
“Meeth pongota:
¿Kë jamian jochian shi amu ske kumu Paskua ku nna balë amu sa?”.
12 Se ëli ske msa namsëdji van liba jadji uan jochian ngandji ku sa vadu pë bebezha.
Se namsëdji ja va ala pë.
13 Se ineñ bai se ineñ ten dajonta ku amea shi Djisu bi faa ineñ tudu.
Se ineñ ten fë vadu kumu Paskua.
Kumu Shiölö
14 Ta da ola,
se Djisu ku nna apostol dëli ten tusan mezha.
15 Tadashi se ëli faa ineñ:
«Amu bi dishia monchi pa amu kumu ku namsëdji djia Paskua sai,
anta pa amu padësë.
16 Pakë amu faa namsëdji amu na tan ske kumuf ba toja djia shi gövöndölö Nashiolo ske kumpli».
17 Zha se ëli ma pukulu,
se ëli da dezhupaga se ëli faa:
«Namsëdji ma jö sai pa namsëdji pachi dantu namsëdji.
18 Pakë amu faa namsëdji fa fo öseshi amu na tan ske bëbë fo fuluta pali döpa uvaf ba toja ta gövöndölö Nashiolo bi».
19 Se ëli ten ma ampan se ëli da dezhupaga,
se ëli pachi se ëli da ineñ,
se ëli faa:
«Jö sai se sa öguë amu,
ku amu da dajantu namsëdji;
namsëdji ja fë jö sai pa ja lambela amu».
20 Se amea shime,
ta a kumu jaba,
se ëli ma pukulu,
se ëli faa:
«Pukulu sai se sa bechi shi novu ku sangui amu,
ku se amu jölë dajantu namsëdji.
21 »Mandji se öma nguë shi ske vëndë amu ku dji amu,
sa liba mezha.
22 Anta vedadji se Mina Napai Dösë ske bai amea shi a bi faa pë bebezha,
mandji se ¡puvili da masebu shi ske vëndë ëli!».
23 Tadashi se nna balë jomesa ja pongota ineñ ineñ me kë nguë dantu ineñ ku ske fë jö sai.
Nguë shi ske sa ngandji mashi
24 *Vlame se dantu nna balë,
se lanta uan djisputa dantu ineñ tëjantu ku kë nguë ske sa nguë shi ngandji mashi.
25 Mandji se Djisu faa ineñ:
«Nna alë nna nguë ineñ shi na sa judiof ja sa liba pövu dëneñ ku pödë,
se nna nguë ineñ shi ja të odji liba dëneñ se ineñ ja sama tuludöguë dëneñ “nna nguë zhuda nguë”.
26 **Mandji se na ske sa shi dantu namsëdjif,
shina pa fidu ja nguë shi ngandji ja sa shimafan dji nguë shi kichi,
pa nguë shi ja manda ja sa shimafan nguë shi ja shivi.
27 *Pakë,
¿kë nguë ja sa ngandji mashi,
nguë shi tusan mezha ö nguë shi ska shivi?
¿Na ja sa nguë shi ska tusan mezha ua?
Mandji,
se amu sa dantu namsëdji shimafan uan nguë ja shivi.
28 »Namsëdji se bi sa ope amu ola tempu fëiu amu tudu.
29 Se amea shi Pai amu da amu uan gövöndölö se amu ten ske da namsëdji dëtu sai,
30 *valadji pa namsëdji kumu ku bëbë liba mezha ku amu dantu gövöndölö amu,
ku pa namsëdji tusan liba töli töli valadji pa namsëdji se juzhga nna deshi ku dösu zhenchi Israel.
Djisu ska da Pudul lazhan fa ëli ske naga ëli
31 »Shiman,
Shiman,
ja pia sa fa Satanas pindji amu pa ëli sugudji namsëdji shimafan ope tulugu.
32 Mandji se amu lezha da bo,
pa jonfa bo na chila taföf.
Pa ta bo tan ja vla bi toja amu,
pa bo ten da nna namain bo foshi».
33 Se Pudul faa ëli:
—Shiöla,
amu sa plesteñi pa amu be ku bo na ja sa djili moso fa,
shina ku a shime ba toja mölë.
34 Se Djisu kundji ëli:
—Pudul,
amu faa bo ödjai ödjai,
anta pa galu ngañia janta,
bo ske naga amu ope tëishi fa bo na jönsë amuf.
35 *Zha se Djisu faa ineñ tudu:
—Ta amu manda namsëdji bai shin bondëlë kichi,
shin bondëlë ngandji ñi ja mëtëpope,
¿bi fata namsëdji zhugan kuzhu?
Se ineñ kundji ëli:
—Na.
36 Se ëli faa ineñ:
—Mandji se öseshi,
nguë shi ja të uan bondëlë kichi,
pa ëli ma bai,
a shime,
ku bondëlë ngandji.
Se nguë shi na ja të zhugan jaf,
pa ëli ja vëndë bobolonda dëli ku pa ëli kumpa uan jatana.
37 Pakë amu faa namsëdji ta pa kumpli ku amu jö ineñ shi sa skividu:
“A jonta ëli dantu nna nguë fëfëiu”.
Pakë jö ineñ shi sa skividu tëjantu ku amu ska kumpli.
38 Se ineñ faa ëli:
—Pia,
Shiölö,
iai sa ku jatana dösu.
Se ëli kundji ineñ:
—Dagoli zha.
Djisu ska lezha dantu iki Olivos
39 Se Djisu së fo palea se,
se amea shi bi sa kutumu dëli se ëli ba iki Olivos,
se nna balë dëli ten lë ëli bai.
LUK 22.39-71
40 Ta ineñ ba da jamian shi,
se Djisu faa ineñ:
«Namsëdji lezha valadji pa namsëdji na pono da tentasanf».
41 Tadashi se Djisu safa fo ineñ ba löndji uan fi kuzhu,
se ëli dajözhöiö se ëli jomesa ja lezha:
42 «Pai amu,
shi bo ja ngongo,
bo ja chila pukulu suflimentu sai fo amu;
mandji pa na sa vintadji amuf,
shina vintadji bo».
43 Tadashi se së ëli ku supichi uan anzhu fo ösë pa da ëli foshi.
44 Mandji,
amea shi ëli bi sa ku padësë,
se ëli jomesa ja lezha ku foshi mashi,
se jalma dëli bi sa shimafan gota sangui ku bi ska pono da san.
45 Ta Djisu lezha jaba,
se ëli lanta se ëli tan ba jamian shi nna balë dëli bi sa,
se ëli dajonta ku ineñ ja djuni,
jansadu dajantu ku ineñ bi sa modoia.
46 Tadashi se Djisu faa ineñ:
«¿Jama fë namsëdji sa iai ja djuni?
Namsëdji lanta pa namsëdji lezha valadji pa namsëdji na pono da tentasanf».
A të Djisu
47 Ontolo Djisu ska faa fala,
ja pia,
se bi uan möi pöjödölö,
se deenchi dëneñ se bi sa uan nna balë deshi shi ku dösu,
nguë shi a ja sama Judas,
se ëli iabi ope Djisu valadji pa ëli da ëli beso.
48 Tadashi se Djisu faa ëli:
«Judas,
¿ku uan beso se bo ja vëndë Mina Napai Dösë?».
49 Ta utu nna balë bë jö shi ske shiga ala,
se ineñ faa ëli:
«Shiöla,
¿pa no pezha ku ineñ ku jatana?».
50 Se uan ineñ ma jatana se pota shividölö jasa jasa padjil olea shi dëtu.
51 Mandji se Djisu faa ineñ:
«Dagoli zha».
Tadashi se ëli fala olea masebu se ëli kula ëli.
52 Se Djisu faa nna jasa jasa padjil,
ku nna jatan nna guada jadji Nashiolo,
ku nna jasa jasa pövu ku tudu bi ala pa ba të ëli:
«¿Sa fa amu sa uan futadölö,
valadji pa namsëdji bi të amu ku jatana ku budan?
53 *Djia tudu se amu ku namsëdji ja sa dantu jadji Nashiolo,
se namsëdji na lanta öma ku amuf,
mandji öseshi se sa tempu namsëdji,
tempu shi gövöndölö jamian kulu ja sa ku pödë».
Pudul faa ëli na jönsë Djisuf
54 Tadashi se a të Djisu,
se a ma ëli ba jadji jasa jasa padjil.
Se Pudul bi ska lë ëli fo löndji löndji.
55 Mandji se uan vëdji,
ta ineñ bi sëndë uan taba ope fögö pë mete balandia jadji,
se ineñ tusan ludjadu pë lome fögö,
se Pudul ten tusan lome dëneñ.
56 Se uan namina miela shividölö bë ëli tusan lome ope fögö,
se pia ëli gavu se faa:
«Nguë sai bi sa ku ëli».
57 Mandji se ëli naga,
ja faa:
«Mooso sai,
amu na jönsë ëlif».
58 Ta pasa uan tempu,
se uan nguë tan bë ëli,
se faa ëli:
—Bo ten sa nguë dëneñ.
Se Pudul faa:
—¡Na,
masebu,
amu na saf!
59 Ta da vala uan ola tadji mashi,
se uan nguë tan faa jö shime,
ja faa:
«Anta vedadji a shime nguë sai ten bi sa ku ëli;
pakë ëli ten sa nguë galilea».
60 Mandji se Pudul faa:
«Masebu ua,
amu na sëbë jö shi bo ska faaf».
Öshi öshime ku ontolo ëli bi ska faa fala,
se galu ngañia janta.
61 Se sa öshi Shiölö vla öiö pia Pudul.
Tadashi se Pudul lambela fala shi Shiölö bi faa ëli iai:
«Ödjai ödjai,
anta ja fë pa galu ngañia janta,
bo ske naga amu ope tëishi».
62 Se Pudul së bi öluia,
se ëli sula ku moga.
Nna sodadji ska li Djisu
63 Se napai ineñ shi bi ska ludja Djisu jomesa ja li ëli ku ten ja da ëli ku kuzhu.
64 Se a mala ëli panu öiö,
ja da ëli ku kuzhu jala dëli,
ja pongota ëli,
ja faa ëli:
«¡Pantafala ua!
¿Kë nguë sa nguë shi da bo ku kuzhu?».
65 Se ineñ bi ska faa utu kuzhu mashi ja suta ëli.
Djisu sa deenchi Zhunta shi Ngandji
66 Ta pamasedu bla,
se nna jasa jasa pövu,
ku nna jasa jasa padjil ku nna meeth dalë zhunta,
se a ma Djisu ba deenchi Zhunta shi Ngandji
67 se ineñ faa ëli:
—¿Bo se sa Kilitu?
Da no lazhan.
Se ëli faa ineñ:
—Shi amu ja faa namsëdji,
namsëdji na ske këlëf.
68 A shinke amu ja pongota namsëdji uan kuzhu,
namsëdji na ske kundji amuf.
69 Mandji se fo öseshi be deenchi Mina Napai Dösë ske ja tusan benda dëtu Nashian shi sa Pödë Tudu.
70 Se ineñ tudu faa:
—¿Tadashi bo se sa Mina Nashiolo?
Se ëli kundji:
—Namsëdji me se ja faa amu se sa.
71 Tadashi se ineñ faa:
«¿Kë lazhan mashi tan fë fata?
No me se tëndë amea shi ku ëli fala fo böjö dëli».