Mainviva puvili da mashi ku nna liku
21
Ta Djisu lanta öiö,
se ëli ba bë amea shi nna liku bi ska ta djiëlu pë alka dantu jadji Nashiolo.
LUK 21.1-28
3 Tadashi se Djisu faa:
«Anta vedadji se amu faa namsëdji fa,
puvili mainviva sai se ta djiëlu pë mashi ku ineñ tudu.
4 Pakë ineñ tudu da jö ineñ shi sovezha ineñ,
mandji se mainviva sai dantu puvili dëli,
se ëli ta jö ineñ shi sa ku ëli pa ëli ma bibe tudu pë».
Djisu ska da lazhan amea shi jadji Nashiolo ske lolo
5 Se zhugan nna balë dëli bi ska da lazhan amea budu fumözhö fumözhö ineñ shi a ma fë jadji Nashiolo,
ku amea ja fumözhö fumözhö ineñ shi nna pövu da pë dantu jadji Nashiolo.
Mandji se Djisu faa:
6 «Se tëjantu ku jö ineñ se namsëdji ska bë tudu iai,
ske bi da djia djia ku na tan ske mdja budu pë liba buduf,
ku a na ske të lolof».
7 Se ineñ pongota ëli:
—Meetha,
¿kë djia jö ineñ se ske shiga?
¿Se kë shinali ske sa fa ja tudu sa puluntu pa shiga?
8 Se Djisu faa ineñ:
—Namsëdji ja pinchidu pa zhugan nguë na ja ngaña namsëdjif.
Pakë ske bi uan sapa nguë ku namu amu,
ja faa:
“Amu se sa Kilitu”,
se:
“Tempu sa peetu”.
Mandji se namsëdji na ja lë ineñf.
9 Ta namsëdji ja tëndë ja tëjantu ku guela guela,
ku pedji pedji,
namsëdji na ja kabela kusanf.
Pakë ske fë fata pa jö ineñ sai tudu shiga pimëlu,
mandji se jabamentu na ske sa öshi öshimef.
10 Tadashi se ëli faa ineñ:
—Se ske ja lanta tela ku utu tela,
se gövöndölö ske ja lanta ku utu gövöndölö;
11 se ske të san vlamëtë ngangandji,
fomu ku uan sapa danchi fëfëiu dantu jamian tudu,
se ske ja të ja pa ja mendu ku shinali ngangandji fo ösë.
Nashian ske sava pövu dëli ta a ske ja pëtëpë ineñ
12 »Mandji se anta pa jö ineñ se tudu shiga,
a ske ta öma ba namsëdji se a ske pëtëpë namsëdji.
Se a ske ma namsëdji ba jadji Nashian nna judio se ska mëtë namsëdji pë djili.
Se a ske ma namsëdji ba deenchi nna alë ku nna gövöndölö dajantu namu amu.
13 Se amea sai se namsëdji ske të fölöshö pa paadji da ineñ lazhan gavu.
14 *Mandji se pa namsëdji ja fë vadu kusan pa na ja sa tave jö ineñ shi namsëdji ske kundji ineñf,
15 pakë amu ske da namsëdji palavulu ku tëndëmentu,
ku se zhugan namigu na ske paadji gagafa ñi chila folof.
16 Mandji se namsëdji,
ba toja nna pai namsëdji,
ku nna namain namsëdji,
ku nna jamada namsëdji a ske ja ma namsëdji,
se a ske chila zhugan namsëdji vida folo.
17 Se mundu nguintëlu nguintëlu ske ja të pashian namsëdji dajantu namu amu.
18 Mandji se zhugan pono jabelu jasa namsëdji na ske pëndëf.
19 Se shi namsëdji ten ja mdja dëtu ba toja jabamentu,
se namsëdji ske sava.
A ske të Jerusalen të lolo
20 »Se ta namsëdji ja bë nna sodadji ludja Jerusalen,
namsëdji ja sëbë fa goleme a ske të ëli të lolo.
21 Tadashi se nna nguë ineñ shi ja ta Judea,
ja jölë ba jöndë pë van iki,
se nna nguë ineñ shi ja sa dantu palea,
pa ineñ ten jölë fo ala,
se nna nguë ineñ shi ja sa dantu matu,
pa ineñ na tan vla paleaf.
22 Se ske sa tempu fë djustishi amea shi ta pa kumpli jö ineñ shi tudu sa skividu iai.
23 ¡Puvili nna naamain ineñ shi ske sa pañia ö ku ska da nna mina mama djia ineñ sa ala!,
pakë tela ske ma mavida monchi ku jatigu liba pövu sai.
24 A ske chila ineñ vida folo ku jatana jotadu se a ske ma ineñ shimafan djilima ba utu tela.
Se nna nguë ineñ shi na sa judiof ske fë pa Jerusalen ma mavida monchi ba toja pa kumpli tempu shi sa dji nna nguë ineñ na sa judiof da.
Mina Nashian tan ske vlame bi
25 *»Tadashi,
se ske të shinali shinali dantu solo,
dantu önuian ku ntëla ntëla.
Se dantu tela,
nna nguë mundu ske ja mendu ja mazhna kuzhu dajantu fala domali babu ku dji pukulu domali.
26 Se nna napai ske sa mëmë mölidu dajantu mendu da jö ineñ shi ske bi shiga mundu,
pakë pödë pödë ineñ shi dösë tudu ske ja sugudji.
27 *Tadashi se namsëdji ske bë Mina Napai Dösë ja ske bi liba uan növu ku pödë ku gloria ngandji.
28 Ta jö ineñ sai ja ska shiga,
namsëdji ja ska ma añimu pa namsëdji ja lanta jasa pakë legadu namsëdji sa peetu.
Palavulu öpa abada
29 Se Djisu tan da ineñ lazhan uan palavulu:
—Namsëdji ja pia öpa abada ku utu ope döpa tudu.
LUK 21.29-38
30 Ta namsëdji ja bë fa fadöpa novu ska labenta,
se namsëdji ja sëbë fa goleme ske da jalima.
31 Se ten sa amea shime,
ta namsëdji ja bë jö ineñ se tudu ska shiga iai,
namsëdji ja sëbë fa goleme gövöndölö Nashian sa peetu.
32 Anta vedadji se amu faa namsëdji,
zhenchi sai na ske pasaf anta pa jö ineñ sai tudu shiga.
33 Se ösë ku tela tudu ske pasa,
mandji se fala amu jabötu na ske pasaf.
Nna balë Djisu tudu ta pa sa plesteñi
34 »Namsëdji ja pinchidu pa kusan namsëdji na ja vla öduf dajantu fochi kumu,
ku bedadu,
ku tave vida sai.
Pa djia sai na së namsëdji ku supichif.
35 Pakë ske bi shimafan uan lasu liba nna nguë ineñ shi ja ta liba tela tudu.
36 Ja sa vatu olatuvëdji,
ku pa namsëdji ja ska lezha valadji pa namsëdji paadji jölë da jö ineñ se ske shiga iai,
ku pa namsëdji paadji ta mdjadu deenchi Mina Napai Dösë.