Djisu ba jadji Sakeo
19
Se ta Djisu lantela dantu Jeriko,
se ëli jomesa ja pasa dantu loso sai.
LUK 19.1-27
2 Se ala bi sa ku uan masebu ku a ja sama Sakeo,
ku bi sa ja jasa nna nguë ma tesu,
se ëli bi sa liku.
3 Ëli bi ngongo bë Djisu,
mandji se möi pöjödölö sai na bi ska lega ëlif,
pakë ëli bi sa uan masebu kutu.
4 Dajantu shi se ëli jölë be deenchi se ëli subili ba liba uan öpa sikomoro valadji pa ëli paadji bë ëli,
pakë Djisu bi ske pasa ala.
5 Ta Djisu ba da basu jamian shi,
se ëli pia liba se ëli faa ëli:
«¡Sakeo!,
dësë öseshi.
Nöchi sai ta pa amu mdja jadji bo».
6 Tadashi se ëli ten dësë dandjian,
ku liguilia se ëli ma Djisu ba jadji dëli.
7 Ta nguë tudu bë jö sai,
se ineñ jomesa ja lo Djisu mali ja faa:
«Ëli ba djuni jadji uan masebu pekadölö».
8 Mandji se Sakeo tan mdjadu se faa Shiölö:
—Tëndë amu,
Shiölö,
öseshi amu ske da nna puvili metadji gagavu amu tudu.
Se amu tan ske da nna pöjödölö ineñ shi amu ma ja fo ineñ pagu da mashi,
amu ske da ineñ jatulu vëdji jö ineñ shi amu chila fo ineñ iai.
9 Se Djisu faa:
—Ödjai se savasan bi jadji sai.
Pakë masebu sai ten sa mina Abraam.
10 *Pakë Mina Napai Dösë bi pa ëli bi jua ku pa ëli ten bi sava nna nguë ineñ shi bi sa pindjidu.
Palavulu uan deshi djiëlu
11 Ta nna nguë ineñ shi ku Djisu bi ska be ja tëndë jö ineñ shi ëli bi ska shina ineñ,
se ëli jonta ineñ uan palavulu,
pakë ineñ bi sa lome Jerusalen,
se nguë tudu bi ska mazhna fa gövöndölö Nashiolo bi ske jomesa öshi öshime.
12 Se Djisu faa ineñ:
«Uan masebu ku sa nguë dondolo se ëli bi ba vadji utu tela löndji,
valadji pa ba fë pa ëli sa gövöndölö zha pa ëli tan vlame bi tela dëli.
13 Se ëli sama uan deshi nna shividölö dëli.
Se ëli da unian unian ineñ uan sapa djiëlu.
Se ëli faa ineñ:
“Fë nongosu ku djiëlu sai ba toja ta amu tan ja vlame bi”.
14 Mandji se nna nguë ineñ shi sa basu gövöndölö dëli bi ska të pashian dëli.
Se fë ineñ manda zhugan nna nguë dëneñ pa ba faa:
“No na ngongo pa nguë sai sa alë liba nof”.
15 »Mandji se,
a fë pa ëli sa alë.
Ta ëli tan vlame bi tela dëli,
se ëli manda sama nna shividölö ineñ shi ëli bi da djiëlu iai,
valadji pa ëli sëbë jantu ineñ ngana.
16 Se nguë shi pimëlu bi,
se faa ëli:
“Shiöla,
ku djiëlu bo se amu tan ngana uan deshi mashi pë liba”.
17 »Se alë faa ëli:
“¡Bo fë gavu,
shividölö gavu!
Se dajantu shi ku liba uan fi kuzhu se bo sa jonfadu,
bo ske sa gövöndölö liba uan deshi palea”.
18 »Se ten bi nguë shi fë dösu se faa ëli:
“Shiöla,
djiëlu bo tan ngana ope shinku mashi.”
19 »Se ëli ten faa nguë sai:
“Bo ske sa gövöndölö liba palea shinku”.
20 »Se bi utu shividölö se faa ëli:
“Shiöla,
djiëlu bo lele iai;
amu bi gada ëli boshadu pë uan lensu.
21 Pakë amu bi ska mendu bo,
dajantu ku bo sa uan masebu ödu ku ja ma jö shi bo na pëf,
ku ja totolo jö shi ku bo na shimianf”.
22 »Tadashi se alë faa ëli:
“Shividölö fëiu,
se ku maian fala bo me se amu ske juzhga bo.
Bo sëbë fa amu sa uan masebu ödu,
se amu ja totolo jamian shi amu na ja pëf,
se amu ja totolo jamian shi ku amu na ja shimianf.
23 Tadashi,
¿ja fë bo na mëtë djiëlu amu pë uan bankif,
pa ta amu tan ja bi pa amu paadji chila djiëlu amu ku bembe mashi pë libaf?”.
24 »Se alë faa nna shividölö ineñ shi bi sa plesteñi iai:
“Chila djiëlu fo ëli pa namsëdji da nguë shi ngana uan deshi ope mashi iai”.
25 »Se ineñ faa ëli:
“Shiöla,
¡ëli sa ku uan deshi ope djiëlu mashi bebezha!”.
26 *»Se alë kundji ineñ:
“Anta vedadji se amu faa namsëdji,
nguë shi ja të,
se a tan ske da ëli mashi,
mandji se nguë shi na ja tëf,
se a tan ske chila ba toja i shi ja sa ku ëli.
27 *Mandji,
se tëjantu nna namigu amu ineñ shi ku na bi ngongo pa amu sa alë dëneñf,
¡ma ineñ bi pa namsëdji chila ineñ vida deenchi amu!”».
Djisu ska lantela Jerusalen
28 Ta Djisu faa jö sai jaba se ëli ma ja se ëli vla be deenchi ja subili ba Jerusalen.
LUK 19.28-48
29 Ta ëli ska da lome loso Betfage ku Betania,
lome iki shi ku a ja sama Olivos,
se ëli manda nna balë dösu ku lazhan sai:
30 Se ëli faa ineñ:
«Namsëdji ba loso se sa deenchi namsëdji iai,
se i shi moso ku namsëdji ja lantela,
se namsëdji ske dajonta ku uan mina javalu kutu maladu ku jodo,
ku zhugan pöjödölö jabötu na sa vada liba dëli ie zhaf,
se namsëdji ja sota pa ma bi iai.
31 Se shi uan nguë ja pongota namsëdji:
“¿Jama fë namsëdji ska sota javalu sai?”,
se namsëdji ja kundji ineñ:
“Fë Shiölö fata”».
32 Se ineñ ten bai se ineñ ten dajonta amea shi ku ëli bi bi faa ineñ iai.
33 Ta ineñ bi ska sota mina javalu kutu sai,
se nna shiölö dëli pongota ineñ:
—¿Ja fë namsëdji ska sota mina javalu sai?
34 Se ineñ faa:
—Pakë fë Shiölö fata.
35 Se ineñ ten ma ba da Djisu.
Zha se ineñ pë panu dëneñ liba mina javalu kutu sai se ineñ ten subili Djisu pë liba.
36 Se amea shi ëli bi ska bai,
se nguë tudu bi ska sëndë panu dëneñ pë jamangandji.
37 Ta Djisu iaba jamian shi jamangandji a ja dësë fo iki Olivos,
se nna balë tudu jomesa ja da Nashian ilö da ja ngangandji ineñ shi ku ineñ bë iai.
Se ineñ bi ska ta kidëlë:
38 «¡Besa ja sa ku Alë shi ja bi a namu Shiölö!
¡Pa të padji liba ösë,
ku gloria van liba mashi!».
39 Se zhugan nna fariseo ku bi sa dantu nna pövu faa Djisu:
—¡Meetha,
lonja öiö da nna balë bo!
40 Mandji se ëli kundji ineñ:
—Anta vedadji se amu faa namsëdji fa,
shi ineñ jaböjö,
budu budu se ske ta kidëlë.
Djisu ska sula da Jerusalen
41 Ta ëli bi sa peetu Jerusalen,
se Djisu ba bë palea sai se ëli sula dajantu dëli.
42 Se ëli faa:
«¡Shi bo bi jönsë fa ödjai jö shi ja paadji ma padji bi da bo!
Mandji se öseshi,
se sa jöndjidu fo öiö bo.
43 Pakë ske bi djia djia liba bo,
ta nna namigu bo ske ludja bo ku nguintali,
se ineñ ske fë ögö pa ineñ ludja bo,
se ineñ ske sua bo jamian tudu.
44 Se ineñ ske ligui bo da san,
se nna mina bo ske sa ku bo.
Se ineñ na ske lega ku bo budu pë liba buduf,
dajantu ku bo na bi jönsë tempu savasan bof».
Djisu jölë nguë fo jadji Nashian nna judio
45 Se ta ëli lantela dantu jadji Nashiolo.
Se ëli jomesa ja jölë nna nguë ineñ shi bi sa ala ja vëndë ku ja kumpa kuzhu tudu fo ala.
46 Se ëli faa ineñ:
«Sa skividu:
“Jadji amu sa jadji lezha”.
¡Mandji se namsëdji të vla fë iöjö lapa nna futadölö!».
47 *Se djia tudu se ëli bi ska shina nguë kuzhu dantu jadji Nashiolo,
mandji se nna jasa jasa padjil ku nna meeth dalë ku nna jasa jasa pövu bi ska jua amea shi pa ineñ chila ëli vida folo.
48 Mandji se ineñ na bi ska bë amea shi pa ineñ fëf,
pakë pövu tudu bi sa ala ja ngongo tëndë ëli ku böjö betu.