Palavulu mainviva ku jues
18
Se Djisu tan da nna balë dëli lazhan uan palavulu pa ëli shina ineñ amea shi pa ineñ ja të dishamentu lezha olatuvëdji shin pëndë añimu.
LUK 18.1-17
2 Se ëli faa ineñ:
«Uan tela se bi të uan jues ku ëli na bi ja mendu Nashianfa ñi ëli na ja da zhugan nguë ondolof.
3 Se dantu tela sai ten bi të uan mainviva,
ku ja toja ëli ja pindji ëli:
“Fë amu djustishi ku nguë shi sa ku amu ku tavadji”.
4 Fo uan böjö tempu,
se ëli naga,
mandji se ëli mazhna ku öguë dëli:
“Benga zha pa amu na ja mendu Nashianf,
ñi amu na ja da zhugan nguë ondolof,
5 mandji se mainviva na ska chama fonta amuf,
amu ske fë ëli djustishi,
pa na sa fa ku bi se ëli ja ska bi iai,
pa ëli fë amu machi”».
6 Se Shiölö tan faa:
«Tëndë jö shi jues fëiu se fala.
7 ¿Se kë amea shi Nashian na ske fë djustishi ku nna nguë ineñ shi ku ëli se maf,
ku ja limian ëli solo ku nöchif?
¿Ëli ske ma tave kundji ineñ?
8 Amu faa namsëdji a na ske ma tave fë namsëdji djustishif.
Mandji ta Mina Napai Dösë tan ske bi,
¿ëli tan ske dajonta ku jonfa liba san tela?».
Palavulu fariseo ku nna nguë ma tesu
9 Zhugan nguë ku ja jonfa öguë dëneñ me shimafan nguë dëtu se ineñ ja ska nozho utu dji nguë,
se Djisu tan faa ineñ palavulu sai:
10 «Napai dösu se subili ba jadji Nashian ba lezha.
Uan ineñ sa fariseo,
se utu ineñ sa nguë ma tesu.
11 Se fariseo lanta mdjadu,
se ëli jomesa ja lezha ku öguë dëli amea sai:
“Nashian iai,
amu da bo da dezhupaga,
pakë amu na sa shimafan utu napaif:
futadölö,
nna nguë fë ja fëfëiu,
nna nguë kabajölöiö,
se amu na sa shimafan nguë ma tesu sef.
12 Ope dösu dantu sumanu se amu ja ta ku zhedu böjö,
se amu ja da pagu uan deshi pachi jö shi amu ja ngana”.
13 »Mandji se nguë ma tesu sai,
fo löndji,
se ëli na ngongo ñi lanta öiö dëli pa ëli pa ösëf,
jö shi moso ku ëli ska fë sa ligui öma da böjö kusan dëli,
ja faa:
“Nashian ia,
të mindjikodji amu,
amu sa pekadölö”.
14 *Amu faa namsëdji fa nguë sai,
ba jadji dëli legadu deenchi Nashiolo mashi ku nguë shiki.
Pakë ja sa nguë shi ja këlëdöguë dëli,
a ske ja fë pa ëli ja da masu,
se nguë shi ja sa masu se a ske ja lanta ëli ba liba».
Djisu ska da nna mina besa
15 Se a ma nna mina kichi kichi ba da Djisu,
valadji pa ëli fala ineñ ku pa ëli ten da ineñ besa;
mandji se nna balë sa fa ja lonja öiö da nna nguë ineñ shi ma ineñ bai.
16 Mandji se Djisu,
sama ineñ,
se faa ineñ:
«Namsëdji lega pa nna mina kichi kichi bi toja amu,
na tan panta ineñf;
pakë nna nguë shimafan ineñ se ske sa dantu gövöndölö Nashiolo.
17 Anta vedadji se amu faa namsëdji,
nguë shi na ja ma gövöndölö Nashiolo shimafan uan mina kichif,
na ske lantela dantu dëlif».
Uan masebu liku
18 Uan nna jasa jasa nna judio pongota Djisu:
—Meeth gavu,
¿kë ja amu ja fo fë pa amu të vida chindadji?
LUK 18.18-43
19 Se Djisu kundji ëli:
—¿Jama fë bo ska sama amu nguë gavu?
Na të zhugan nguë gavuf shina Nashian moso se gavu.
20 Se bo jönsë mandamentu Nashian bebezha:
“Na ja kabajölöiöf,
na ja chila nguë vida folof,
na ja futaf,
na ja mucha da nguëf,
da pai bo ku main bo ondolo”.
21 Se masebu se faa ëli:
—Jö ineñ se tudu amu kumpli fo djia shi amu bi sa mashivin.
22 Ta Djisu tëndë jö sai,
se ëli faa ëli:
—Ontolo fata bo uan kuzhu:
Vëndë jö ineñ shi sa ku bo tudu,
pa bo da nna puvili,
pa amea sai pa bo të gagavu liba dösë.
Zha pa bo bi pa bo lë amu.
23 Tadashi ku ëli tëndë jö sai,
se ëli vla modoia pakë ëli bi sa liku mochi muntë.
24 Ta Djisu bë amea shi ëli vla modoia monchi,
se ëli faa:
«¡Ske kuta monchi muntë pa nna nguë liku lantela dantu gövöndölö Nashiolo!
25 Pakë ja sa levu mashi pa uan javalu lömba pasa dantu uan fuladu guian mashi ku pa uan liku lantela dantu gövöndölö Nashiolo».
26 Nna nguë ineñ shi ku tëndë jö sai se pongota:
«Tadashi,
¿a kë nguë ske paadji sava?».
27 Mandji se Djisu kundji ineñ:
«Jö shi nna pöjödölö na ja fo fëf ai,
Nashian ja paadji fë».
28 Tadashi se Pudul faa:
—No lega jö ineñ shi bi sa ku no tudu pë valadji pa no lë bo.
29 Se Djisu kundji ëli:
—Anta vedadji se amu faa namsëdji zhugan nguë ku lega jadji dëli,
ö miela dëli ö namain dëli,
ö pai dëli,
nna mina dëli,
dajantu gövöndölö Nashiolo,
30 ëli tan ske të mashi uan vida chindadji tempu sai ku tempu shi tan ska bi.
Djisu tan ska da lazhan amea shi ëli ske mölë
31 Tadashi se Djisu ma nna balë dëli deshi ku dösu ba apachi se ëli faa ineñ:
«Öseshi no ska subili ba Jerusalen,
se jö ineñ shi nna pantafala bi skëvë tëjantu ku Mina Napai Dösë tudu ske kumpli.
32 Pakë a ske ma ëli pa da nna nguë ineñ shi na sa judiof,
pa ineñ li ëli,
se ineñ ske fë ëli machi,
pa ta aböjö pë ëli.
33 Pa ineñ da ëli ku valasöchi,
zha pa ineñ chila ëli vida folo,
mandji se ëli ske lanta bi vida ta ske fë tëishi djia».
34 Mandji se nna balë dëli na bi ska tëndë zhugan jö ineñ sef,
pakë sinchidu bi sa jöndjidu,
dajantu shi se ineñ na bi ska tëndë jö shi a bi ska faa ineñf.
Djisu kula uan nguë sebu dantu Jeriko
35 Se bi shiga fa ta Djisu bi ska da Jeriko,
se uan nguë sebu ku bi ska tusan bodo jamangandji ja pindji nguë pa chila ëli djimolo.
36 Se öshi ëli tëndë möi pöjödölö ineñ shi bi ska pasa,
se ëli pongota,
kë ja ska shiga ala.
37 Se a kundji ëli fa Djisu Nasaret se ska pasa iai.
38 Tadashi se ëli jomesa ja ta kidëlë:
«¡Djisu,
Mina alë David,
të mindjikodji amu!».
39 Se nna nguë ineñ shi bi ska be deenchi jomesa ja lonja öiö da ëli valadji pa ëli jaböjö;
mandji se ëli bi ska ta kidëlë ku foshi mashi:
«¡Mina David,
të mindjikodji amu!».
40 Se Djisu da ta mdjadu se manda pa ma ëli bi deenchi dëli.
Ta sebu sai iaba lome dëli,
se Djisu pongota ëli:
41 —¿Ja bo ngongo pa amu fë da bo?
Se ëli kundji ëli:
—Shiöla,
pa amu tan bë kuzhu.
42 Se Djisu faa ëli:
—¡Tan të vita!
Jonfa bo se kula bo.
43 Se öshi öshime se ëli tan të vita.
Tadashi se ëli da Nashian gloria,
se ëli jomesa ja lë Djisu,
se ta pövu tudu bë jö sai,
se ineñ da Nashian ilö.