Pinchidu pekadu
17
Zha se Djisu faa nna balë dëli:
«A na ja paadji chama da topuf,
¡mandji se puvili nguë shi ja fë pa ja pono da!
LUK 17.1-19
2 Ske sa gavu mashi pa ta ëli ba omali ku uan makuku budu mla kuzhu pa mala pë gochi dëli,
mashi ku pa ëli fë pa uan namina kichi kichi ineñ sai da topu.
3 *Dajantu shi,
¡namsëdji ja ska pinchidu!
»Shi namain bo ja fë pekadu tëjantu ku bo,
faa ëli kuzhu;
se shi ëli tan ja vla ku ope tashi,
bo ja pada ëli.
4 Benga pa ope seta se ëli fë pekadu tëjantu ku bo,
se ope seta se ëli tan ja vlame bi toja bo,
ja pindji bo:
“Amu na tan ske fëf”,
ta pa bo ja pada ëli».
Zhuda no pa no jonfa bo mashi
5 Tadashi se nna apostol faa Shiölö:
—Fë pa jonfa no këësë mashi.
6 Se Shiölö faa ineñ:
—Shi namsëdji ja paadji të uan fi jonfa,
shimafan uan mina iku mostasa,
namsëdji ja fo faa öpa sikomoro sai:
“Lanja fo iai bo ba shimian pë omali”,
se ëli ske tëndë namsëdji.
Dëtu shividölö
7 »Zhugan namsëdji ja të uan shividölö,
ku ta ja fo matu fo da san pajada bi ö ku ëli ten ja fë lazhan jabala.
¿Sa fa shiölö ja faa ëli:
“Lantela,
dandjian tusan liba mezha pa bo kumu”?
8 ¿Namsëdji na ja faa ëli:
“Pa ëli kudji kumu,
pa ëli fë lazhan jadji pa ëli shivi bo ba toja öshi bo ja kumu ku bo ja bëbë jaba,
zha se bo ja faa ëli,
kumu pa bo bëbë ua”?
9 ¿Sa fa namsëdji ja da shividölö namsëdji dezhupaga pakë ëli fë jö ineñ shi namsëdji bi manda pa ëli fë?
10 Se ten sa amea shi namsëdji,
ta ëli ja fë jö ineñ shi namsëdji manda ëli,
ta pa ëli faa:
“No sa shividölö laladu,
pakë no fë jö ineñ shi dëtu manda no moso”.
Djisu kula uan deshi napai ku sa ku lepla
11 Uan djia,
se Djisu bi ska bai Jerusalen,
se ëli pasa metadji Samaria ku Galilea.
12 Se ta ëli bi ska lantela dantu uan loso,
se së bi toja ëli uan deshi napai ku sa ku lepla,
se ineñ mdja pë löndji,
13 se ineñ ja ta kidëlë,
ja faa:
—¡Djisu,
Meetha,
të mindjikodji no!
14 Ta ëli bë ineñ,
se ëli faa ineñ:
—Namsëdji bai,
pa namsëdji ba msa nna padjil öguë namsëdji.
Se ta ineñ bi ska bai,
se toja ineñ sa limpi bebezha.
15 Tadashi,
se uan ineñ bë fa ëli sa kuladu bebezha,
se ëli tan vlame bi ja da Nashian ilö ku kidëlë böjö.
16 Se ëli dajözhöiö san ku jala dëli ope Djisu,
se ëli da ëli dezhupaga.
Masebu se bi sa uan samaritano.
17 Se Djisu pongota ëli:
«¿Namsëdji deshi na se mdja limpi ua?
¿Kë jamian nna nguë novu ineñ shiki sa?
18 ¿Zhugan ineñ na tan vlame bi pa da Nashian gloriaf,
shina masebu se ku sa nguë utu tela patadu iai moso?».
19 Se Djisu faa masebu sai:
«Lanta,
pa bo bai,
jonfa bo,
se kula bo».
Gövöndölö Nashian ske bi
20 Se nna fariseo pongota Djisu kë djia gövöndölö Nashian ske bi,
se ëli kundji ineñ:
—Ta gövöndölö Nashian ske bi a na ske paadji fë kuentaf.
LUK 17.20-37
21 A na ske ja faa:
“¡Ëli sa iai!”,
ö “¡Ëli sa ala!”,
pakë gövöndölö Nashian sa dantu namsëdji bebezha.
22 Se ëli faa nna balë dëli:
«Djia djia ske bi da ku namsëdji ske dishia pa bë Mina Napai Dösë,
mandji se a na ske bi paadjif.
23 Se a ske faa namsëdji:
“¡Ëli sa iai!”,
ö “¡Ëli sa ala!”,
mandji se namsëdji na ja befa ñi lë ineñf.
24 Pakë amea shi ta lali ja chila blin,
ku ëli ja dëdë ösë fo uan ponto ba utu ponto,
se sa amea shi Mina Napai Dösë ten ske sa djia dëli.
25 Mandji se pimëlu ta pa ëli padësë monchi,
pa zhenchi sai tudu naga ëli.
26 »Amea shi bi shiga tempu Noe,
se ten ske sa tempu Mina Napai Dösë.
27 A bi ska kumu,
ja bëbë,
ja jazha ku ten ska jazha nguë,
ba toja djia shi Noe lantela dantu alka,
se sa öshi bi fadaua ngandji se jaba ku nguë tudu.
28 »Se jö shime se ten pasa tempu Lot:
a bi ska kumu,
ja bëbë,
ja kumpa kuzhu ku vëndë kuzhu,
ja shimian kuzhu ku ja fë jadji.
29 Mandji se djia shi Lot ska së fo tela Sodoma,
se fögö ku asufre bi ska pono fo ösë,
se jaba ku nguë tudu.
30 Se sa amea shime ku ten ske pasa djia shi Mina Napai Dösë ske msa tuludöguë dëli.
31 *Ta ske da djia sala,
nguë shi ja sa van dötë jadji,
se gagavu dëli tudu ja sa dantu jadji,
pa ëli na dësë pa ëli bi maf.
Se sa amea shime,
nguë shi ja sa dantu matu,
pa ëli na tan ja bi ku tashif.
32 ¡Ja lambela miela Lot!
33 *Nguë shi ja ngongo sava vida dëli,
ëli ske pëndë ëli,
se nguë shi ja pëndë vida dëli,
ske sava ëli.
34 Amu faa namsëdji fa nöchi sala pöjödölö dösu ske sa liba uan jaama;
se a ske ma unian se a ske lega nguë shiki pë.
35 Naamain dösu ske ja mla kuzhu zhuntadu,
se a ske ma unian se a ske lega nguë shiki pë.
36 Nguë dösu ske sa matu,
se a ske ma uan nguë,
se ske gua uan nguë pë».*+
37 Se nna balë pongota ëli:
—¿Shiöla,
kë jamian?
Se Djisu kundji ineñ:
—Jamian shi ja sa ku uan mochi,
se paatu kumu mochi tudu ja zhunta pë.